قىزىلشا ۆيرۋستىق ينفەكتسيا بولعاندىقتان, ونى دەنەگە شىققان بورتپەدەن بىردەن بىلۋگە بولادى. تەز جۇعاتىن اۋرۋ اۋا ارقىلى تارالادى جانە ۆيرۋس ادام بويىندا بىرنەشە اپتاعا سوزىلادى. سوندىقتان بولار قىزىلشا قارقىن الىپ تۇر. ماماندار اۋرۋ بەلگىلەرى بايقالسا, دارىگەرگە جۇگىنۋگە جانە قارسى كورسەتىلىمدەرى بولماسا, ەكپە الۋعا كەڭەس بەرەدى.
وڭىرىمىزدە قىزىلشامەن اۋىرعاندار ءالى دە تىركەلىپ جاتىر. بىلتىردان كەشەگى كۇنگە دەيىن قىزىلشاعا كۇدىكپەن 1 468 جاعداي تىركەلدى, ونىڭ 991 جاعدايىندا اۋرۋ راستالدى (67,5 پايىز). ماماندار اۋىرعانداردىڭ 88 پايىزى ەكپە الماعانىن ايتادى.
– جاس قۇرىلىمىندا 14 جاسقا دەيىنگى بالالار باسىم. ولاردىڭ ۇلەسى – 70 پايىز. ولاردىڭ جارتىسىنان كوبى – 5 جاسقا دەيىنگى بالالار. جىل باسىنان بەرى 372 جاعداي تىركەلدى, ونىڭ جارتىسىنا جۋىعى, ياعني 186-سى راستالدى. قىزىلشاعا قارسى جوسپارلى ۆاكتسينالاۋمەن قامتۋداعى ولقىلىقتارعا بايلانىستى سىرقاتتانۋشىلىقتى تىركەۋ وبلىستىڭ بارلىق اۋماعىندا بايقالادى. ەكپە الماعانداردىڭ بولۋى جانە تۇرعىندار اراسىندا بەلسەندى كوشى-قون ينفەكتسيانىڭ تەز تارالۋىنا ىقپال ەتەدى. قىزىلشا وتە جۇقپالى بولعاندىقتان, قىزىلشامەن اۋىراتىن ناۋقاستارمەن بايلانىستا بولعان ەكپە الماعان جانە بۇرىن اۋىرماعان ادامداردىڭ بارلىعى دەرلىك اۋرۋعا شالدىعادى, – دەيدى وبلىستىق سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى گۇلجان بايعۇتانوۆا.
گۇلجان جاقتايقىزى دا اۋرۋدان ساقتانۋدىڭ دۇرىس جولى ۆاكتسينالاۋ دەيدى. وسىعان بايلانىستى ايماعىمىزدا قىزىلشاعا قارسى قوسىمشا يممۋنداۋ ءالى دە جۇرگىزىلىپ جاتىر.
– قىزىلشا جۇقتىرعان بالا ينكۋباتسيالىق كەزەڭنىڭ سوڭعى ەكى كۇنىندە, كاتارالدى كەزەڭدە (3-4 كۇن) جانە بورتپەلەردىڭ ءتورتىنشى كۇنىنە دەيىن, ياعني 9 كۇن ىشىندە باسقالارعا جۇقپالى بولادى. العاشقى ءۇش كۇندە قىزىلشا رەسپيراتورلىق ينفەكتسيا تۇرىندە كورىنەدى. دەنە قالتىراپ, باسى اۋىرادى. جوتەل پايدا بولادى, مۇرىننان سۋ اعىپ, تاماعى اۋىرادى. بۇل كەزدە سۋىق تيۋ بەلگىلەرىنە ۇقساس, – دەيدى قاراعاندى قالاسىنىڭ №5 ەمحاناسىنىڭ پەدياترى جۇپار قۇلبولاتوۆا.
سىرقاتتىڭ العاشقى بەلگىلەرى 3-5 كۇننىڭ ىشىندە سەزىلەدى. بالا تەز شارشايدى جانە دەنە تەمپەراتۋراسى كوتەرىلۋى مۇمكىن. بۇل كەزەڭدە قىزىلشانىڭ نەگىزگى سيمپتومى – ناۋقاستىڭ اۋزىندا تىستەردىڭ تۇبىندە ەرەكشە بورتپە پايدا بولادى. ول ەرتەرەك دياگنوز قويىپ, ەرتەرەك وقشاۋلاۋعا مۇمكىندىك بەرەدى. قىزىلشا جۇقتىرعان بالالاردا جوتەل جيىلەپ, دەنە قىزۋى بىرتىندەپ 40 گرادۋسقا جەتۋى مۇمكىندىگىن ايتادى پەدياترلار.
سىرقات جۇقتىرعان ءبىر جاستاعى بالالاردا قىزىلشا بايقالا قويمايدى ەكەن. بورتپە دە بىردەن بىلىنبەيدى. بىراق بالانىڭ ءىشى ءوتىپ, قۇسا باستايدى. اۋرۋدىڭ الدىن الماي, اسقىندىرىپ السا, اۋىر سالدارعا الىپ كەلۋى مۇمكىن.
– قىزىلشا بورتپەسى باستاپقىدا قۇلاقتىڭ ارتىندا جانە شاشتىڭ ءوسۋ ايماعىندا, باس تەرىسىندە پايدا بولادى, كەيىن بەتكە, مويىن ايماعىنا جانە كەۋدەگە تارالادى. ناۋقاستىڭ ساۋساقتارى, اياعىنىڭ تومەنگى بولىگىندە دە پايدا بولادى. ءوڭى بوزارادى. دەنەدەگى بورتپەلەر بالالارعا قاراعاندا ەرەسەكتەردە انىق بىلىنەدى. اۋرۋدىڭ شارىقتاۋ كەزى – وسى بورتپەلەردىڭ پايدا بولعان كەزى. ۆيرۋستىڭ ەڭ اۋىر كەزەڭى دە وسى ساتتە جۇرەدى. ناۋقاستى تەكسەرۋ كەزىندە ارتەريالىق گيپوتەنزيا, تاحيكارديا, برونحيت نەمەسە تراحەوبرونحيت بەلگىلەرى انىقتالۋى مۇمكىن. سول سەبەپتى ناۋقاستىڭ جاعدايىن اسقىندىرماي, دەر كەزىندە دارىگەر كومەگىنە جۇگىنۋ كەرەك, – دەيدى ج.سابىرقىزى.
اۋرۋدى انىقتاۋ ءۇشىن الدىمەن ساراپتاما الىنادى. بالانىڭ قان سارىسۋىنداعى قىزىلشا ۆيرۋسىنا انتيدەنەلەردى انىقتاۋ قاجەت. قىزىلشامەن اۋىرعان بالالار كوبىنەسە ۇيدە ەمدەلەدى. ەگەر ناۋقاستىڭ جاعدايى اۋىر بولسا عانا اۋرۋحاناعا جاتقىزىلادى ەكەن.
– ءبىر جاسقا دەيىنگى بالالار مىندەتتى تۇردە اۋرۋحانادا ەم الادى. جالپى, اۋىرعان بالانىڭ گيگيەنا ساقتاۋىن قاداعالاپ, دارۋمەندەرگە باي سۇيىقتىقتى ءجيى ىشكىزۋ قاجەت. دەنەدەگى بورتپەلەرگە ەشتەڭە جاقپاۋ كەرەك. بولمە تەمپەراتۋراسىندا بالانى سۋمەن جۋىندىرۋ جەتكىلىكتى. وندا دا تەمپەراتۋراسى تۇسكەننەن كەيىن عانا, – دەيدى دارىگەر.
قاراعاندى وبلىسى