قاراعاندىداعى «دوستىق» ۇيىندە حالىق اقىنى جاكەن بايتۋوۆتىڭ ء«بورى باتىر» داستانىن جىرلاۋدان وبلىستىق جىرشىلار سايىسى ءوتتى. اقىن دا, باتىر دا ۇلىقتالعان بۇل بايقاۋدىڭ باستى ەرەكشەلىگى مىنادا: ەكى اتالىمنان ۇزدىك شىققان قوس جەڭىمپازدىڭ جەتەگىنە جىلقى بايلادى.
مادەني ءىس-شارانى «ارقا» ايتىس اقىندارى مەن جىرشى-تەرمەشىلەر مەكتەبى ۇيىمداستىرىپ وتىر.
– بىلتىر كەنەسارى بابامىزدىڭ 220 جىلدىعىنا وراي جىرشىلار بايقاۋىن وتكىزگەنبىز. جاس جىرشىلارىمىز دوسكەي ءالىمبايدىڭ «حان كەنەسىن», نىسانباي جىراۋدىڭ «كەنەسارى-ناۋرىزباي» داستانىن جىرلاعان ەدى. وتە جوعارى دەڭگەيدە ونەر كورسەتتى دەي الامىز. بيىل دا ءبورى باتىردىڭ ۇرپاقتارىمەن بىرىگىپ, جاكەن بايتۋوۆتىڭ داستانىن ناسيحات ەتىپ وتىرمىز. بۇل ءىس-شارامىز ارقىلى اقىندى دا, باتىردى دا ۇلىقتاي الدىق, – دەيدى ايتىسكەر اقىن ايتباي جۇماعۇلوۆ.
جىرشىلار سايىسىنا وڭىرىمىزدەگى وتىزدان استام ورەن قاتىسىپ, باقتارىن سىنادى.
جىرشى, پروفەسسور ەربولات شالدىبەكوۆ استانادان ارنايى كەلىپ قاتىسىپ, قازىلار القاسىنا توراعا بولدى. بەلگىلى پروفەسسور سايىستىڭ قورىتىندى كەزەڭىندە ارقاداعى جاس جىرشىلاردىڭ تالابىنا تاڭدانىسىن ءبىلدىرىپ, جىرشى-تەرمەشىلەر مەكتەبىنە ساتتىلىگىن تىلەدى.
بايقاۋعا باس دەمەۋشى بولعان ايان قيىنبەكوۆ اۋلەتىنىڭ اتىنان ەكى جىلقى جانە ءبورى باتىر ۇرپاقتارى 1 ميلليون تەڭگە قاراجات بەرگەن. بوتاقارا قوسىمشا ءبىلىم بەرۋ رۋحانيات ورتالىعىنىڭ وقۋشىسى ۆيكتوريا الەنينا بايقاۋدىڭ اسپاپپەن جىرلاۋ اتالىمىندا قاتارلاستارىنان باسىم ءتۇسىپ, باس بايگەگە, ياعني جۇلدەگە تىگىلگەن جىلقىعا يە بولدى. ال داستاندى مانەرلەپ وقۋ اتالىمىندا قاسىم امانجولوۆ اتىنداعى بالالار مۋزىكا مەكتەبىنىڭ وقۋشىسى كامىل تىلەۋقابىل وزىق شىعىپ, ەكىنشى جىلقىنىڭ يەسى اتاندى. بايقاۋعا قاتىسقان باسقا دا جۇلدەلى ورىن العان ونەرلى ورەندەرگە اقشالاي سىيلىق ۇلەستىرىلدى. مۇنىمەن قوسا, وبلىستىق ءبىلىم باسقارماسى اۋىلدىڭ ءۇش بالاسىنا كوكشەتاۋداعى «بالداۋرەن» رەسپۋبليكالىق وقۋ-ساۋىقتىرۋ ورتالىعىنا جولداما تابىستادى.
«العاش رەت ات ءمىنىپ تۇرمىن. ۇيدەگى اتا-انام قاتتى قۋاناتىن بولدى. قازاق حالقى قۇرمەتتىلەرگە ات مىنگىزەدى عوي. سونى جاقسى ىرىمعا بالاپ تۇرمىن. جىرشى-تەرمەشىلەر سايىسىنا ۇنەمى قاتىسامىن. ء«بورى باتىر» داستانىن دومبىرامەن ورىنداپ بەردىم. بۇگىنگى ونەرىم قازىلار القاسىنىڭ, كورەرمەندەردىڭ كوڭىلىنەن شىققانىنا اسا قۋانىشتىمىن», دەگەن اسەرىمەن ءبولىستى بايقاۋ جەڭىمپازى ۆيكتوريا الەنينا.
ۇيىمداستىرۋشىلار ۇرپاققا رۋحاني ازىق, جىر دۋمان سىيلاعان ءبورى باتىر ۇرپاقتارىنا العىسىن جاۋدىردى. باس دەمەۋشى ايان اقساقال دا اق باتاسىن جاۋدىردى.
– ءبىز بابامىزدى وسىلاي ۇلىقتايىق دەپ شەشتىك. اس پەن تويدان گورى وسىنداي ۇرپاققا يگىلىگى بار دۇنيە جاساعىمىز كەلدى. ءبورى بابامىزدىڭ باتىرلىعى وسى بۇلدىرشىندەردىڭ بويىنا دارىسىن! ءىس-شارانى ۇيىمداستىرعان ايتباي بوتپاي ۇلى جانە ديدار قامي باستاعان ازاماتتارعا ەرەكشە ريزامىن! – دەپ اق تىلەۋىن جەتكىزدى.
قاراعاندى وبلىسى