وتكەن ءتۇن بوتاقارالىقتار ءۇشىن جايسىز بولدى. 30 قاڭتار كۇنى ساعات 00:07-دە ەكى قاباتتى 12 پاتەرلى تۇرعىن ءۇيدىڭ ەكىنشى قاباتىنداعى 10-پاتەردە گاز باللونى جارىلدى. جارىلىس سالدارىنان ءبىر عانا پاتەردىڭ ەمەس, تۇتاس ءۇيدىڭ ورتاسى وپىرىلىپ ءتۇستى. وكىنىشكە قاراي, وقىس وقيعا كەزىندە ەكى ادام كوز جۇمدى.
اياق استىنان بولعان اپات ءتۇننىڭ جارىمىندا ەلدى الاڭداتىپ-اق تاستادى. اۋەزوۆ كوشەسى, 8ا مەكەنجايىندا ورنالاسقان بۇل ءۇي 2014 جىلى پايدالانۋعا بەرىلگەن. اتالعان ءۇي ءالى ورتالىقتاندىرىلعان جىلىتۋ قازاندىعىنا مۇلدەم قوسىلماعان.
جالپى, ۇيدە 46 ادام تۇرادى ەكەن, جارىلىس كەزىندە 35 ادام بولعان. جاراقات العان بەس ادام ءۇيىندى اراسىنان قۇتقارىلىپ, ءۇش بالا اۋرۋحاناعا جەدەل جەتكىزىلدى. قۇتقارۋ جۇمىسىنا 139 ادام, 32 تەحنيكا جۇمىلدىرىلعان.
– ۇيىندىلەر تازارتىلدى. جەرگىلىكتى اتقارۋشى ورگاندار بارلىق قاجەتتى تەحنيكانى ۋاقتىلى ۇسىندى, سونىڭ ارقاسىندا بەس ادام قۇتقارىلدى. ادامدار ۇيىندىلەردىڭ استىندا, پليتالاردىڭ اراسىندا قالىپ قويعان. كراندار مەن ءۇش ەكسكاۆاتور تارتىلدى. بۇگىنگى كۇنى توتەنشە جاعدايلار دەپارتامەنتى مەن پوليتسيا قىزمەتكەرلەرى تەكسەرۋ جۇرگىزىپ جاتىر. جارىلىستىڭ الدىن الا سەبەبى – گاز باللونىنىڭ دۇرىس جۇمىس ىستەمەۋى. گاز باللونى سۋىقتان جىلى بولمەگە كىرگىزىلگەن. بولعان وقيعاعا كىم كىنالى ەكەنىن قۇقىق قورعاۋ ورگاندارى انىقتايدى, – دەيدى وبلىستىق توتەنشە جاعدايلار دەپارتامەنتى باستىعىنىڭ ورىنباسارى امانبەك بەيسەمباەۆ.
جوعارىدا ايتا كەتكەنىمىزدەي, گاز باللونى جارىلعان پاتەردىڭ عانا ەمەس, جالپى ءۇيدىڭ توبەسى وپىرىلىپ, باسقا دا پاتەرلەردىڭ قابىرعالارى سوگىلگەن. قازىر جەرگىلىكتى سيپاتتاعى توتەنشە جاعداي جاريالاندى. اپاتتى ءۇيدىڭ تۇرعىندارى تۋىسقاندارىنىڭ ۇيىنە ورنالاستىرىلدى.
– زارداپ شەككەن وتباسىلارعا كومەك كورسەتىلەدى. پاتەر جالداپ تۇرامىز دەسە, ونى دا تولەپ بەرەمىز. قازىر كەلتىرىلگەن شىعىندى باعالايتىن كوميسسيا قۇرۋ جۇمىستارى ءجۇرىپ جاتىر. ازىرگە ۇيدە KazMIRR ماماندارىنىڭ كومەگىمەن تەكسەرىس ءجۇرىپ جاتىر. ساراپشىلار ءۇيدى قالپىنا كەلتىرۋ مۇمكىن ەمەستىگىن ايتسا, جاڭا ءۇي سالۋدى ويلاستىرامىز, – دەيدى بۇقار جىراۋ اۋدانىنىڭ اكىمى ابىلاي سۇلتانعالي.
اپات كەزىندە كوز جۇمعان مارقۇمداردىڭ ەسىمى انىقتالدى. ەرلى-زايىپتى تولەگەن تۇرسىنبەك ۇلى مەن الما ومارقىزىنىڭ مەزگىلسىز دۇنيەدەن وتكەندىگى ەستىگەن جاندى ەسەڭگىرەتتى. قاراعاندى وبلىستىق پوليتسيا دەپارتامەنتى وزدەرىنىڭ, الەۋمەتتىك جەلىدەگى پاراقشالارىندا بۇقار جىراۋ اۋداندىق پوليتسيا باسقارماسىنىڭ جەدەل ۋاكىلى داۋرەن تولەگەن ۇلىنا اتا-اناسىنىڭ مەزگىلسىز قايتىس بولۋىنا وراي قايعىسىنا ورتاقتاسىپ, كوڭىل ايتىپتى.
– وبلىستاعى مەديتسينالىق مەكەمەلەرگە زارداپ شەككەن بەس ادام ءتۇستى. ونىڭ ۇشەۋى – بالا. ەكى بالا امبۋلاتورلىق ەمگە شىعارىلدى, ءبىر بالا وبلىستىق بالالار كلينيكالىق اۋرۋحاناسىنا جەتكىزىلدى. ەكى ەرەسەك ناۋقاس بۇقار جىراۋ اۋداندىق اۋرۋحاناسىندا ستاتسيونارلىق ەم الىپ جاتىر. بىرەۋىنىڭ دەنەسىن 80 پايىز كۇيىك شالعان. جاعدايى اۋىر. ەكىنشىسىنىڭ جاعدايى قالىپتى, 26 پايىز كۇيىك شالعان. جاراقات العان جاندارعا بارلىق مەديتسينالىق كومەك كورسەتىلىپ وتىر, – دەيدى وبلىستىق دەنساۋلىق ساقتاۋ باسقارماسىنىڭ باسشىسى بيبىگۇل تولەگەنوۆا.
قالاي دەسەك تە قاۋىپسىزدىك قاپەرىمىزدە بولماي تۇر. بىلتىر تۇرمىستىق گاز باللونىنىڭ جارىلۋى بەس رەت قايتالانعان. جازاتايىم وقيعالاردىڭ كوپشىلىگى جوعارىداعى سەكىلدى تۇرعىن ۇيدە وقىستان ورىن الىپ جاتادى. گاز باللونى وتقا ورانباي تۇرىپ, اۋا اعىنىمەن جارىلعان كۇننىڭ وزىندە دە ادامعا قاۋپى اسا زور ەكەن.
توتەنشە جاعدايلار دەپارتامەنتىنىڭ ماماندارى قاتتى ەسكەرتەدى: گاز باللونىن كولىك ستانسالارىندا تولتىرۋ اسا قاۋىپتى! ويتكەنى گاز قۇتىسىنا نەبارى 80-85 پايىز كولەمىندە عانا تولتىرىلعانى ماڭىزدى. جانە ونداي جەرلەردە گاز جابدىعىنىڭ قاۋىپسىزدىگى تەكسەرىلمەيتىنى ايان.
سوندىقتان ساقتانعان ابزال, اعايىن!
قاراعاندى وبلىسى
بۇقار جىراۋ اۋدانى