ۇلتقا قىزمەت قىلۋ قارەكەتپەن ولشەنەدى. قاراعاندى قالاسىنداعى №95 مەكتەپتىڭ ينفورماتيكا ءپانىنىڭ مۇعالىمى ءبىرجان بالتاباي ۇلىنىڭ وسى ءبىر يگى ىسىنە كوپشىلىك ءسۇيسىنىپ وتىر.
قاراپايىم مۇعالىم بالالارعا ارنالعان «جەتى قازىنا» اتتى شاعىن كىتاپشانى جارىققا شىعارعان. وندا جەتى قازىنا اتاۋلارىنىڭ ءمانىن اشاتىن شاعىن ءماتىن مەن سۋرەت بار. بالدىرعان الگى سۋرەتتى بوياۋ ارقىلى شىعارماشىلىققا بويىن ۇيرەتىپ, تانىمىن كەڭەيتە الادى. الماتىداعى «الگوريتم» باسپاسىنان 1000 دانامەن جارىققا شىعىپتى. الەۋمەتتىك جەلىدەگى جارناما ارقىلى جارتىسىن ساتىپ تا جىبەرگەن.
– العاشقى شاعىن بوياۋ جۋرنالىن شىعاردىق. ەندى, «الپامىس باتىر», «قوبىلاندى باتىر», «زارينا پاتشايىم», «توميريس پاتشايىم» سەكىلدى كىتاپشالارىمىز دايىن تۇر. ەرتەگى نەگىزىندە ازىرلەدىك. ءماتىنىن قۇرۋعا انام التىن تولەپبەرگەنقىزى اتسالىستى. ول – قازاق ءتىلىنىڭ مامانى. قازىر زەينەتتە. جوبانى جۇبايىم ەركەجان قۋاندىقوۆامەن بىرلەسىپ, پىسىقتادىق. ايەلىم – IT سالاسىنىڭ وكىلى. جىلدام ساتىلىپ كەتكەنىنە قاراپ, ءوتىمدى ەكەنىن, سۇرانىسقا يە ەكەنىن تۇسىندىك. بالالارىن ۇلتتىق تاربيەگە باۋليتىن اتا-انا بارىن بىلدىك. جوبامىز قولداۋ تاپسا, ءارى قاراي جەتىلدىرە بەرمەكپىز, – دەيدى ب.بالتاباي ۇلى.
جاڭا جۋرنالدارى ەندى ءۇش تىلدە جارىققا شىقپاق. قازاق, ورىس جانە اعىلشىن تىلىندە. قازاقى ويۋلار توپتاستىرىلعان جيناقتارى دا بار. بوياۋ جۋرنالدارىنىڭ سۋرەتىن سالعان – گۇلنۇر ەرلانقىزى مەن ۆيلاروم باقىتجانقىزى.
مىنە, قاراعاندىلىق جاس مۇعالىم ينفورماتيكا ساباعىن عانا وتكىزىپ قويماي, ۇلت بولاشاعىنا وسىلاي قىزمەت ەتىپ ءجۇر.
قاراعاندى وبلىسى