2004 جىلى قورداي اۋدانى اكىمدىگىنىڭ جانە قورداي اۋىلدىق وكرۋگى اكىمىنىڭ اكتىلەرىمەن بولات نازارباەۆقا تيەسىلى «قاراساي بن-تاراز» جشس-عا «بارىس-2» ساۋدا كەشەنىنە قىزمەت كورسەتۋ ءۇشىن اۋدانى 34,3017 گا ۋچاسكە بەرىلدى. ۋچاسكەنى بەرۋ كەزىندە ونىڭ ءتارتىبى بۇزىلعان, اتاپ ايتقاندا اۋىل شارۋاشىلىعى ماقساتىنداعى ەرەكشە قورعالۋعا جاتاتىن اۋدانى 22,25 گا سۋارمالى ەگىستىك جەرلەردىڭ ءبىر بولىگى بازارعا قىزمەت كورسەتۋ ءۇشىن بەرىلگەن, دەپ حابارلايدى Egemen.kz
«جامبىل وبلىسى پروكۋراتۋراسىنىڭ حابارلاۋىنشا, اۋدان پروكۋراتۋراسى اۋدان جانە اۋىلدىق وكرۋگ اكىمدىكتەرىنىڭ اكتىلەرىن, ساتىپ الۋ-ساتۋ شارتتارىن جارامسىز دەپ تانۋ جانە كۇشىن جويۋ تۋرالى سوتقا تالاپ قويۋ بەردى», دەلىنگەن جامبىل وبلىسىنىڭ پروكۋراتۋراسى ۇسىنعان اقپاراتتا.
وبلىستىق سوتتىڭ ازاماتتىق ىستەر جونىندەگى سوت القاسىنىڭ 2023 جىلعى 28 جەلتوقسانداعى قاۋلىسىمەن «قاراساي بن-تاراز» جشس-مەن قورداي اۋدانى اكىمدىگىنىڭ جەر قاتىناستارى ءبولىمى اراسىنداعى 24.07.2007 جىلعى №81 جانە №82 جەر ۋچاسكەلەرىن ساتىپ الۋ-ساتۋ, جەر ۋچاسكەلەرىن وتەۋسىز بەرۋ تۋرالى «قورداي ينۆەست» جشس-نىڭ بارلىق شارتتارى جارامسىز دەپ تانىلىپ, كۇشتەرى جويىلدى.
«سوت قاۋلىسى 28.12.2023 جىلى زاڭدى كۇشىنە ەندى, جەر ۋچاسكەلەرىنە مەملەكەتتىك اكتىلەردىڭ كۇشى جويىلدى», دەلىنگەن حابارلامادا.