قازىر شاعىن بيزنەس اشامىن دەگەندەرگە ۇكىمەتتىڭ تيگىزەتىن شاراپاتى كوپ. اسىرەسە, اكىم گرانتى – جاستارعا اجەپتاۋىر قولداۋ. بۇل جولى نۇرا اۋدانى اكىمىنىڭ گرانتىن 9 جاس كاسىپكەر جەڭىپ الدى.
سولاردىڭ قاتارىندا احمەت اۋىلىنىڭ تۇرعىنى نۇرجان كاكىباەۆ بار. ول ءسۇت ونىمدەرىن شىعاراتىن تسەح اشۋدى جوسپارلاپ وتىر. كاسىپكەر ءۇش جىلدان بەرى مال شارۋاشىلىعىمەن اينالىسادى. ەندى كاسىبىن ارمەن قاراي جەتىلدىرىپ, ءسۇت ونىمدەرىن شىعارماقشى. نەگىزگى باعىتى – ىرىمشىك.
– ىرىمشىك جاساۋدى اكەمنەن ۇيرەندىم. تابيعي ءونىم ارقاشان سۇرانىسقا يە. بۇرىن ءبىز تەك وزىمىزگە ازىرلەيتىنبىز. سودان وي كەلدى. قولىمىزدان كەلىپ تۇر. باستى تاۋاردى قوراداعى مالىمىز بەرىپ تۇر. مىنە, اۋدان اكىمىنىڭ گرانتىمەن ىرىمشىك جانە باسقا دا ءسۇت ونىمدەرىن ازىرلەپ, ساتاتىن بولامىز. گرانت قاراجاتىنا قاجەتتى جابدىقتار ساتىپ الۋدى جانە ءۇيدىڭ جانىنا شاعىن كونتەينەر ورناتۋدى جوسپارلاپ وتىرمىن. استاناعا ساتۋدى دا ويلاستىرىپ جاتىرمىز. اۋىلىمىز ەلوردادان نەبارى 60 شاقىرىم جەردە ورنالاسقان, –دەيدى نۇرجان كاكىباەۆ.
بارشىن وكرۋگىنە قاراستى قاراقاسقا اۋىلىنىڭ 25 جاستاعى تۇرعىنى سىمبات سالىمبەكوۆا نۇرا اۋدانى اكىمىنىڭ گرانتىن ۇتىپ الدى. وتكەن جىلى «باستاۋ بيزنەس» باعدارلاماسى اياسىندا كاسىپكەرلىك نەگىزدەرى بويىنشا وقۋىن تامامداعان. جاس كاسىپكەر ەشكى ءسۇتىن وندىرمەك.
«مەندە ءۇشىنشى توپتاعى مۇگەدەكتىك بار. ۇلىمدى دۇنيەگە اكەلگەن كەزدە ءوزىم ەمىزە المادىم. قازىر ەكىگە تولدى. ونىڭ دا مۇگەدەكتىگى بار. سوندىقتان بالاما مۇقيات كۇتىم كەرەك. ءبىر جىلعا دەيىن كوپتەگەن قوسپالاردى قولدانىپ كوردىك. بالامدا اللەرگيا بولدى. گيپواللەرگەندى تاعامدار دا بىزگە سايكەس كەلمەدى. ۇلىم ءۇشىن باسقا اۋىلعا كوشتىك. ويتكەنى ول جەردە ەشكى ءسۇتى ساتىلادى. بالاما جاقتى, ۇلىم تەز سالماق جينادى. وسىدان كەيىن مەنىڭ ويىما ەشكى ءوسىرىپ, ءسۇتىن ءوندىرۋ كەلدى. بيزنەس-جوسپارىمدى قۇرىپ, مىنە, گرانت الدىم. وسى قاراجاتقا ساۋاتىن اپپارات پەن 10 ەشكى ساتىپ الامىن», دەيدى سىمبات سالىمبەكوۆا.
مۇنىمەن قوسا, نۇرا اۋدانى اكىمىنىڭ گرانتتارىن بيوگۋمۋس, تۇيىرشىكتەلگەن قۇراما جەم ءوندىرۋ, شاشتاراز اشۋ, جيھازدى حيميالىق تازالاۋ, اۆتوكولىك جۋ, نان-توقاش ونىمدەرىن ءوندىرۋ بويىنشا تسەحتى كەڭەيتۋ, دەزينفەكتسيا, دەزينسەكتسيا جانە دەراتيزاتسيا قىزمەتتەرىن كورسەتۋ بويىنشا بيزنەس-جوبالار الدى.
بيىلعى اكىم گرانتىنا 10 ميلليون تەڭگە ءبولىندى. مەملەكەت قاراجاتى بىرنەشە جوباعا جول اشپاقشى. ءوز كەزەگىندە جاس كاسىپكەرلەر اكىمدىككە العىسىن جاۋدىرىپ, الداعى ۋاقىتتا ناتيجە شىعارىپ, شاعىن بيزنەستەرى ارقىلى اۋداننىڭ الەۋەتىن ارتتىرامىز دەگەن ۋادە بەردى.
قاراعاندى وبلىسى,
نۇرا اۋدانى