بارلىق باعىتتاعى جولدار جابىلدى. قاۋىپسىزدىكتى قامتاماسىز ەتۋگە سقو پوليتسيا دەپارتامەنتى پاترۋلدىك پوليتسيا باتالونىنىڭ بارلىق اۋىسىمدارى عانا ەمەس, ءتىپتى بۇل ءبولىنىستىڭ باسشىلىعى دا جۇمىلدىرىلدى.
اسىرەسە استانا – پەتروپاۆل اۆتوجولىنىڭ تايىنشا اۋدانى ارقىلى وتەتىن ۋچاسكەسى جۇرگىزۋشىلەر ءۇشىن قيىن بولدى. اۋىر جۇك كولىكتەرى قاتتى جەل مەن كوكتايعاقتىڭ سالدارىنان دوڭەس ۋچاسكەلەرگە كوتەرىلە المادى. بۇگىن تاڭەرتەڭ بۇل جەردە 80-گە جۋىق جۇك كولىگى جينالىپ قالدى.
ال مامليۋت اۋدانىندا قوستاناي قالاسىنان پەتروپاۆل قالاسىنا اۋىل شارۋاشىلىعى تەحنيكاسىنىڭ قوسالقى بولشەكتەرىن تاسىمالداپ كەلە جاتقان Volvo جۇك كولىگىنىڭ تىركەمەسى جولدان شىعىپ كەتتى. تىركەمەنى شىعارىپ الۋ ءۇشىن قاجەتتى جۇمىستار جۇرگىزىلىپ جاتىر. وبلىس اۋماعىندا ءبىر تۇندە بارلىعى 7 اۆتوكولىك وسىنداي جاعدايعا تاپ بولدى, قۇتقارۋشىلار ولاردىڭ بارلىعىن شىعارىپ الدى.
رەسمي اقپارات بويىنشا جابىق جولداردا بارلىعى 159 جۇك جانە 132 جەڭىل كولىك تۇرىپ قالدى. پوليتسەيلەر مۇددەلى قىزمەتتەر مەن مەملەكەتتىك ورگانداردىڭ قىزمەتكەرلەرى 240-تان استام ادامدى شىعارىپ الىپ, جىلىتۋ ورىندارىنا جەتكىزدى.
مامليۋت اۋدانىنىڭ ورتالىعى مامليۋتكا قالاسىنداعى ءبىلىم بەرۋ مەكەمەلەرىنىڭ بىرىنە تاماقتانىپ, جىلىنۋ ءۇشىن 80-نەن استام ادام ورنالاستىردى. ولاردىڭ قاتارىندا رەسەيدەن تاجىكستانعا ترانزيت ارقىلى كەتىپ بارا جاتقان اۆتوبۋستىڭ 70 جولاۋشىسى دا بولدى, ونىڭ 17-ءسى بالالار.