بۇگىن ەلوردادا «قازاقستاننىڭ ۇزدىك تاۋارى» رەسپۋبليكالىق-كورمە بايقاۋىنىڭ جەڭىمپازدارى انىقتالدى. بايقاۋدا «وندىرىستىك ماقساتتاعى ۇزدىك تاۋارلار», «حالىققا ارنالعان ۇزدىك تاۋارلار», «ۇزدىك ازىق-ت ۇلىك تاۋارلارى» نوميناتسيالارى بويىنشا جۇلدەلەر بەرىلدى. ەندى بايقاۋ لاۋرەاتتارى مەن ديپلومانتتارى بايقاۋدىڭ ەمبلەماسىن ءتورت جىل بويى جارنامالىق ماقساتتا پايدالانۋ قۇقىعىن الادى, دەپ حابارلايدى Egemen.kz.
بيىل «قازاقستاننىڭ ۇزدىك تاۋارى» وڭىرلىك كورمە-بايقاۋلارعا رەسپۋبليكا بويىنشا 1,3 مىڭنان اسا كاسىپورىن قاتىستى. سونىڭ ىشىندە 27 فيناليست ونلاين-داۋىس بەرۋ كەزەڭىنە ءوتتى. سوڭعى كەزەڭدە جەڭىسكە جەتكەن 9 ديپلومانت «قازاقستاننىڭ ۇزدىك تاۋارى» كورمە-بايقاۋىنىڭ ديپلومدارى جانە ەمبلەماسىمەن ماراپاتتالادى.
وسى جىلى «وندىرىستىك ماقساتتاعى ۇزدىك تاۋارلار» نوميناتسياسىندا قوستاناي قالاسىنىڭ «بولشەۆيچكا» جشس, اباي وبلىسىنىڭ «ۋك يۋنيس» جشس, جەتىسۋ وبلىسىنىڭ «الماتينسكيە كراسكي» جشس جەڭىمپاز اتاندى. ديپلومانتتارعا جۇلدەنى ونەركاسىپ جانە قۇرىلىس ءمينيسترى قانات شارلاپاەۆ تابىس ەتتى.
«بولشەۆيچكا» جشس باس ديرەكتورى ارسەن جەتپىسباەۆ كاسىپورىن ساپا سالاسىنداعى بايقاۋعا بىرنەشە رەت قاتىسقانىن, ال جۇلدەنى بيىل الىپ جاتقانىن ايتتى.
«وتكەن جىلداردا قاتىسقان ءار بايقاۋدان كەيىن كەمشىن تۇستارىمىزدى سارالاپ, قورىتىندى جاسادىق. كورسەتكىشتەردى جاقسارتىپ, ۇزدىك بولۋعا تالپىندىق. بۇگىن, مىنە, جەڭىسكە جەتتىك. بۇل جەڭىس ءبىز ءۇشىن ۇلكەن جەتىستىك, ۇجىمنىڭ قاجىرلى ەڭبەگىنىڭ جەمىسى. بۇگىنگى ماراپات ءبىزدى جاڭا بەلەستەرگە جەتەلەپ, جاڭا جوبالاردى قولعا الۋعا شابىت بەردى. الداعى ۋاقىتتا ءورشىل ماقساتتار مەن مىندەتتەرگە قاناتتاندىردى», دەدى ارسەن جەتپىسباەۆ.
«حالىققا ارنالعان ۇزدىك تاۋارلار» نوميناتسياسىندا جامبىل وبلىسىنىڭ «تارازكوجوبۋۆ» جشس, اقتوبە وبلىسىنىڭ «تك فارم اقتوبە» جشس, قاراعاندى وبلىسىنىڭ «A.V.Group» جشس ۇزدىك اتاندى.
ء«بىزدىڭ كاسىپورىننىڭ تاجىريبەسى مول ءارى الەمدىك نارىقتا دا باسەكەلەسە الادى. وندىرىستەگى قۋاتى دا جەتكىلىكتى. زاۋىتتىڭ بىرەگەيلىگى اياق كيىم جاساۋعا قاجەتتى بىلعارىنى ءوزى وندىرە الادى. 2024 جىلدان باستاپ تەرى-بىلعارى زاۋىتىن تولىق قۋاتتا ىسكە قوسۋدى جوسپارلاپ وتىرمىز. ساپا جاعىن دا جەتىلدىرىپ كەلەمىز. ءبىزدىڭ اياق كيىمنىڭ ساپاسى جوعارى, ءاردايىم سۇرانىستا بولعانىن قالايمىز», دەدى جەڭىمپاز, «تارازكوجوبۋۆ» جشس باس ديرەكتورى ەركىن ابدىباەۆ.
«ۇزدىك ازىق-ت ۇلىك تاۋارلارى» نوميناتسياسىندا جامبىل وبلىسىنان «اۋليە-اتا فەنيكس» جشس, باتىس قازاقستاننان «بالزيا» جشس, ماڭعىستاۋدان «جاناوزەن ءسۇت زاۋىتى» جشس جەڭىمپاز بولدى.
«اۋليە-اتا فەنيكس» جشس قۇرىلتايشىسى فاريدا ءجۇنىسوۆانىڭ ايتۋىنشا, «ۇزدىك ازىق-ت ۇلىك تاۋارلارى» نوميناتسياسىنداعى جەڭىس كاسىپورىن ءۇشىن ۇلكەن جەتىستىك. كومپانيا ۇجىمى ءوز ءونىمىنىڭ حالىق اراسىندا سۇرانىستا بولعانىن ماقتان تۇتادى.
ەسكە سالساق, «قازاقستاننىڭ ۇزدىك تاۋارى» رەسپۋبليكالىق كورمە-بايقاۋى جىل سايىن وتەتىن شارا. بايقاۋدىڭ باستى ماقساتى – جەكە جانە زاڭدى تۇلعالاردىڭ وتاندىق ءونىمىنىڭ ساپاسىن ارتتىرۋعا باعىتتالعان قىزمەتىن جانداندىرۋ, قازاقستان نارىعىن جوعارى ساپالى جانە باسەكەگە قابىلەتتى ونىممەن تولىقتىرۋعا جاردەمدەسۋ. سونداي-اق وتاندىق جانە حالىقارالىق ستاندارتتار نەگىزىندە ساپانى باسقارۋ مەن قامتاماسىز ەتۋدىڭ قازىرگى زامانعى ادىستەرىن كەڭىنەن ەنگىزۋگە العىشارتتار جاساۋ جانە وعان جاردەمدەسۋ, حالىق اراسىندا ساپا يدەياسىن كەڭىنەن تانىتۋ.