ەڭبەك شارتى بويىنشا ءبىر جىل ىشىندە قىزمەتكەرگە باسشىلىق 12 مارتە ەڭبەكاقى تولەۋى ءتيىس. جەكەلەگەن كەيبىر كومپانيالاردا ءالى كۇنگە دەيىن جىلدىڭ سوڭىندا «13-جالاقى» تەرمينىمەن ءسىڭىستى بولعان ىنتالاندىرۋ قاراجاتى دا اۋدارىلادى, دەپ حابارلايدى Egemen.kz.
13-جالاقى تۇسىنىگى نارىقتىق قوعامدا دا قالىپتاستى. كومپانيا نەمەسە مەكەمەنىڭ باسشىلىعى قۇزىرەتىندەگى شارۋا وڭىنان شەشىلسە, قىزمەتكەرلەرگە بەرىلەتىن سىياقى مولشەرى دە ەسەلەنىپ ارتادى. قىزمەتكەردىڭ ءبىر جىلدا اتقارعان ەڭبەگىنىڭ ونبەگى مەن جەتكەن جەتىستىگىن سارالاي وتىرىپ تاعايىندالاتىن 13-جالاقىدان ءھام سىياقىدان اركىمنىڭ دە "بار تالاسى".
دەسە دە ايلىق ەڭبەكاقىدان تىس بەرىلەتىن بۇل جالاقى ەڭبەك كودەكسىنىڭ 107-بابىندا جازىلعان شارتقا ساي بەلگىلەنەدى. ەڭ اۋەلى 13-جالاقى تۋرالى ۇيىمنىڭ نە كومپانيانىڭ جارعىسىندا جازىلۋى ءتيىس. قۇجات تۇرىندە بەكىتىلگەنى ايقىن بولسا, ءار قىزمەتكەر ءوزى ىستەيتىن ۇجىمىنىڭ جىلدى تابىستى اياقتاعانىنا ساي سىياقىعا كەنەلۋىنە مۇمكىندىك تۋادى.
ارينە ەڭبەك شارتىندا سىياقى جايىندا ءتيىستى پۋنكتتىڭ جازىلۋىنا ساي, قىزمەتكەردىڭ ىشكى ەرەجەگە باعىنىپ, ءتارتىپتى بۇزباعانى دا ەسكەرىلەدى. ەڭبەك شارتىنا 13-جالاقى تولەۋ تۋرالى ەنگىزۋ جۇمىس بەرۋشىنىڭ مىرزالىعىنا بايلانىستى جۇزەگە اسىرىلادى. زاڭگەرلەر كومپانيا ءبىر جىلعا بولىنگەن بيۋدجەتىن ۇنەممەن جۇمساپ, ىسىراپقا جول بەرمەي قاراجاتى ارتىلسا, قىزمەتكەرلەرگە ەڭبەگىنە قاراي سىياقى ەسەبىندە ءبولىپ بەرۋىنە بولاتىنىن ايتادى.
ەڭبەك كودەكسىندە: «13-جالاقى» دەگەن تۇسىنىك جازىلماعان, 107-باپتا «جۇمىس بەرۋشى جۇمىسكەرلەردىڭ ءوندىرىس تيىمدىلىگى مەن ورىندالاتىن جۇمىستاردىڭ ساپاسىن جوعارىلاتۋعا مۇددەلىلىگىن ارتتىرۋدى كۇشەيتۋ ءۇشىن ۇجىمدىق شارت تالاپتارىندا جانە (نەمەسە) جۇمىس بەرۋشىنىڭ اكتىلەرىندە ايقىندالعان سىيلىقاقى بەرۋ جۇيەلەرىن جانە ەڭبەكتى ىنتالاندىرۋدىڭ باسقا دا نىساندارىن ەنگىزە الاتىنى» جازىلعان.