ۇلتتىق ونەر مەن بابادان ميراس بولىپ قالعان مۇرانى ناسيحاتتاۋ ماقساتىندا ۇيىمداستىرىلعان «مادەنيەت – اسىل قازىنام» اتتى اۋدانداردىڭ مادەنيەت كۇندەرى مارەسىنە جەتتى. بىرنەشە اي بويى ءار اۋدانعا بارىپ, مادەني ءىس-شارانىڭ باسى-قاسىندا بولعان كوميسسيا مۇشەلەرى اقىرعى شەشىمدى شىعارىپ, ۇزدىك دەپ تانىلعان اۋداندار باعالى سىيلىقتارمەن ماراپاتتالدى.
«كونە تاراز» ەتنومادەني كەشەنىنىڭ كورمە زالىندا ۇيىمداستىرىلعان سالتاناتتى ءىس-شاراعا ءوڭىر باسشىسى ەربول قاراشوكەەۆ ارنايى قاتىسىپ, مادەنيەت سالاسى قىزمەتكەرلەرىنىڭ ەرەن ەڭبەگىنە لايىقتى باعا بەردى. سونداي-اق وبلىس اكىمى بىرنەشە ايعا سوزىلعان مادەنيەت كۇندەرىنىڭ ماڭىزىنا توقتالدى.
«اسىلىندە, مادەنيەتسىز ەل دە, ۇلت تا بولمايدى. ۇلتتىق ءداستۇر, ونەر, رۋحانياتتىڭ بەرىك نەگىزى مادەنيەت سالاسىمەن استاسىپ جاتقانىنا ەشكىمنىڭ تالاسى جوق. ءوڭىر دامۋىنداعى ايرىقشا ماڭىزعا يە سالانى جاڭعىرتۋ ماقساتىندا «مادەنيەت – اسىل قازىنام» اتتى مادەنيەت كۇندەرى بارلىق اۋداندا وتكىزىلدى. كوپشىلىككە ءوڭىر تاريحى تانىستىرىلىپ, ءداستۇرلى ونەرىمىز ناسيحاتتالدى.
سالادا بۇدان وزگە دە اتقارىلعان جۇمىس از ەمەس. ماسەلەن, «ونەر كوزى – حالىقتا» اتتى ونەر ۇجىمدارىنىڭ فەستيۆالى قولعا الىنىپ, «ەڭ ۇزدىك» اۋىلدىق مادەنيەت ءۇيى مەن ادىستەمەلىك كابينەتتەر ىرىكتەلدى. ناتيجەسىندە, جۇمىس جاندانا ءتۇستى. ونەر ۇجىمدارىنىڭ جاڭاشىلدىققا دەگەن ۇمتىلىسى ايقىن بايقالدى.
جامبىل ءوڭىرى – ىقىلاس دۇكەن ۇلى, جامبىل جاباەۆ, كەنەن ازىرباەۆ, اياز بەتباەۆ سىندى ۇلتتىق رۋحانياتقا, مادەنيەتىمىزگە مول مۇرا قالدىرعان تاريحي تۇلعالاردىڭ شىعارمالارىن كەڭىنەن دارىپتەپ كەلە جاتقان تاريحي ولكە. ولاردان وزگە دە تالاي ونەر يەلەرى ءوڭىر مادەنيەتىنىڭ وركەندەۋىنە ولشەۋسىز ۇلەس قوستى. ارقايسىسى ءبىر تاۋعا اينالعان مادەنيەت مايتالماندارىنا دەگەن قۇرمەت, ءىلتيپات, ىزەت دەگەن ەشقاشان تولاستاماق ەمەس.
ىقىلىم زاماننىڭ ءىزىن جالعايتىن ۇرپاقتار ساباقتاستىعىن قالىپتاستىرۋ – قاشاندا وزەكتى. وسى ورايدا مەملەكەت باسشىسى قاسىم-جومارت كەمەل ۇلى توقاەۆ ۇلتتىق قۇرىلتايدا سويلەگەن سوزىندە «حالقىمىزدىڭ اتا-بابادان ميراس بولعان مول مۇراسى بار. ونى زامان تالابىنا ساي جاڭعىرتىپ, جەر جۇزىنە ناسيحاتتاۋ كەرەك», دەپ اتاپ وتكەن بولاتىن.
رەتى كەلىپ تۇرعاندا اقجولتاي حاباردى جەتكىزۋدى ءجون سانادىم. كەلەسى جىلى وبلىسىمىزدا «ايتىسكەر اقىندار مەن جىرشى-تەرمەشىلەر ورتالىعى» اشىلادى. بۇل ورتالىق تا ءوڭىر مادەنيەتىنىڭ وركەندەۋىنە سۇبەلى ۇلەس قوسادى دەپ ەسەپتەيمىن.
ۇلتتىق مادەنيەت پەن ونەردىڭ دامۋىنا, رۋحاني بايلىعىمىزدىڭ ەسەلەنە تۇسۋىنە ولشەۋسىز ۇلەس قوسىپ جۇرگەن بارشا مادەنيەت قىزمەتكەرلەرىنە شەكسىز العىس بىلدىرەمىن. ارقاشان ەسەلى ەڭبەكتىڭ جەمىسىن كورىپ, جاڭا بيىكتەردى باعىندىرا بەرىڭىزدەر», دەدى ە.قاراشوكەەۆ.
ءىس-شارا سوڭىندا «مادەنيەت – اسىل قازىنام» اتتى وبلىس اۋداندارىنىڭ مادەنيەت كۇندەرىندە ۇزدىك ونەرىمەن دارالانعان شۋ اۋدانىنىڭ ۇجىمى ءى ورىن يەگەرى اتاندى. دەرەككە سەنسەك, اتالعان اۋدان اكىمى باقىتجان جانىبەكوۆ اۋدان ونەرپازدارىنىڭ جوعارى دەڭگەيدە ونەر كورسەتۋىنە بار مۇمكىندىگىنشە قولداۋ كورسەتىپتى. ناتيجەسى بايقاۋ قورىتىندىسىنان بايقالىپ تۇر. جەڭىستىڭ بيىك تۇعىرىنان كورىنگەن شۋلىقتارعا شاعىن اۆتوبۋس بۇيىردى. بايقاۋ قورىتىندىسىنا زەر سالساق, جۇلدەلى ءىى ورىن العان قوردايلىقتار دا اۆتوكولىككە يە بولدى. ال ۇزدىك ۇشتىكتى قورىتىندىلاعان مەركى جانە مويىنقۇم اۋداندارىنىڭ ونەرپازدارىنا 1 كومپلەكت مۋزىكالىق قۇرىلعىلار تاپسىرىلدى. وزگە اۋداندارعا ىنتالاندىرۋ جۇلدەسىمەن بىرگە 5 دومبىرادان بەرىلدى.
سوڭىرا «حالىقتىق» اتاعى بار كوركەمونەرپازدار ۇجىمدارىنىڭ دەڭگەيىن انىقتاۋ, حالىق شىعارماشىلىعى جانرلارىن دامىتۋ ماقساتىندا وتكەن «ونەر كوزى – حالىقتا» وبلىستىق فەستيۆالىنىڭ «ۇزدىك بي ۇجىمى», «ۇزدىك حور ۇجىمى», «ۇزدىك ءان-بي ءانسامبلى», «ۇزدىك اسپاپتىق, فولكلورلىق ءانسامبلى» اتالىمدارىنىڭ جانە «ەڭ ۇزدىك اۋىلدىق مادەنيەت ءۇيى, كلۋب-2023», «ەڭ ۇزدىك ادىستەمەلىك كابينەت» وبلىستىق بايقاۋلارىنىڭ جەڭىمپازدارى مەن جۇلدەگەرلەرى ماراپاتتالىپ, قوماقتى قارجىلاي سىيلىقتار تابىستالدى.
جامبىل وبلىسى