وڭىردە تسيفرلاندىرۋ جۇمىستارى بەلگىلەنگەن جوسپارعا سايكەس ىسكە اسىرىلىپ جاتىر. «تسيفرلى قازاقستان» باعدارلاماسى اياسىندا وبلىس بويىنشا مەملەكەتتىك قالا قۇرىلىسى كاداسترىنىڭ اۆتوماتتاندىرىلعان اقپاراتتىق جۇيەسىن قۇرۋعا بىرنەشە جىل بۇرىن باسىمدىق بەرىلگەن بولاتىن. ناتيجەسىندە, رەسپۋبليكالىق مەملەكەتتىك قالا قۇرىلىسىن جوسپارلاۋ جانە كاداستر ورتالىعىمەن مەموروندۋم جاسالىپ, ءىس-شارا جوسپارى بەكىتىلدى. سول جوسپار اياسىندا وبلىستا بىرقاتار اۋقىمدى جۇمىس قولعا الىندى. ونىڭ دەنى ۋاقتىلى اياقتالدى.
– شۋ قالاسى مەن 10 اۋدان ورتالىعىنا اەروفوتوتۇسىرىلىم جۇرگىزۋ جۇمىسىنىڭ ماڭىزى زور ەكەنى انىق. ويتكەنى قازىر اقپاراتتىق جۇيەنىڭ داۋرەنى ءجۇرىپ تۇر. سوندىقتان دا ءبىز بەلگىلەنگەن جوسپارعا سايكەس تاراز قالاسى مەن اۋدان ورتالىقتارىنداعى قۇرىلىس جۇمىستارى جۇرگىزىلگەن اۋماقتىڭ ينجەنەرلىك ينفراقۇرىلىمىن تۇگەندەۋ جۇمىستارىن ۋاقتىلى اتقاردىق. جىل بۇرىن حالىق سانى بەس مىڭنان اساتىن ەلدى مەكەندەردەگى 4 886 گەكتار اۋماقتىڭ ينجەنەرلىك جۇيەلەرىنە تۇگەندەۋ جۇمىستارىنا جەرگىلىكتى بيۋدجەتتەن قاراجات ءبولىندى. قولعا العان جۇمىس دەر كەزىندە ىسكە اسىرىلدى, – دەدى وبلىستىق ساۋلەت جانە قالا قۇرىلىسى باسقارماسىنىڭ باسشىسى ايتقازى قارابالاەۆ.
ونىڭ ايتۋىنشا, حالىق سانى 5 مىڭنان اساتىن ەلدى مەكەندەردى اقپاراتتىق جۇيەگە ەنگىزۋ جۇمىسى وسى جىلى دا ساتىمەن جالعاسقان. قولعا الىنعان جۇمىس ۋاقتىلى جۇزەگە اسىرىلعان ەكەن. ناتيجەسىندە, 6011,95 گەكتار اۋماقتىڭ ينجەنەرلىك جۇيەسى تولىققاندى زەردەلەنگەن. وسىلايشا, اۋداندارداعى جۇمىستار ۋاقتىلى ءارى ساپالى اياقتالعان. ال تاراز قالاسى بويىنشا قولعا الىنعان ءىس جىل سوڭىنا دەيىن تامامدالماق.
ا.قارابالاەۆ كەلتىرگەن دەرەككە جۇگىنسەك, «تسيفرلاندىرۋ, عىلىم جانە تەحنولوگيالىق سەرپىلىس» ۇلتتىق جوباسىن ىسكە اسىرۋ بويىنشا دا بىرقاتار جۇمىس اتقارىلعان. قالا قۇرىلىسى كاداسترىنىڭ تسيفرلى جوسپارلى نەگىزىن قۇرۋ ءۇشىن ەلدى مەكەندەردىڭ قۇرىلىس جۇمىستارى جۇرگىزىلگەن اۋماعىنىڭ ينجەنەرلىك-ينفراقۇرىلىمدىق جۇيەلەرى تولىقتاي گەودەزيالىق-توپوگرافيالىق زەردەلەۋدەن وتەدى. بۇل جۇمىستىڭ ماڭىزى زور.
– وبلىس بويىنشا بارلىعى 371 ەلدى مەكەننىڭ 12-ءسىنىڭ قالا قۇرىلىسى جوبالارىن تسيفرلاندىرۋ جۇمىستارى بىرنەشە جىل بۇرىن «قازگيسا» جشس تاراپىنان جۇزەگە اسقان بولاتىن. بيىل قالعان ەلدى مەكەندەردىڭ باس جوسپارىن تسيفرلاندىرۋ جوسپارلانىپ, قازىرگى كۇنگە 355 ەلدى مەكەننىڭ جوباسى گەوپورتالعا ەنگىزىلدى. قالعان 4 ەلدى مەكەننىڭ باس جوسپارىن تسيفرلاندىرۋ جۇمىستارى الداعى كۇندەرى اياقتالماق. تالاس اۋدانىنا قاراستى كوشەك باتىر اۋىلىنىڭ وڭتايلاندىرىلعان سىزباسىن ازىرلەۋ جۇمىستارى اۋدان اكىمدىگى تاراپىنان اتقارىلىپ جاتىر. اتالعان جۇمىس اياقتالعان جاعدايدا وبلىس بويىنشا بارلىق ەلدى مەكەننىڭ باس جوسپارى وبلىستىڭ گەوپورتالىنا 100 پايىز ەنگىزىلمەك, – دەپ ناقتىلادى باسقارما باسشىسى.
ا.قارابالاەۆتىڭ ايتۋىنشا, وسى جىلدىڭ باسىندا اەروفوتوتۇسىرىلىم جۇمىسىنا قاجەتتى قاراجات قاراستىرىلىپ, كونكۋرس نەگىزىندە مەردىگەر بولىپ «قازگيسا» جشس انىقتالعان. سەرىكتەستىك مامىر ايىندا جاڭاتاس, قاراتاۋ جانە شۋ (تولە بي اۋىلى) قالالارىنا اەروفوتوتۇسىرىلىم جۇمىسىن جۇرگىزگەن. زاڭناما تالاپتارىنا سايكەس قورعانىس مينيسترلىگىنىڭ كامەرالدىق قاراۋىنان ءوتىپ, كەلىسىم الىنعان. «سالاعا قاتىستى تسيفرلاندىرۋ جۇمىسى جوسپارعا سايكەس ىسكە اسىرىلىپ جاتىر. تاياۋدا باۋىرجان مومىش ۇلى, قورداي, مويىنقۇم, مەركى, قۇلان, اسا, سارىكەمەر اۋىلدارىنا ۇشقىشسىز ۇشۋ اپپاراتى اەروفوتوتۇسىرىلىم جۇمىسىن جۇرگىزدى», دەدى باسقارما باسشىسى.
جامبىل وبلىسى