مەملەكەتتىك سىيلىقتىڭ لاۋرەاتى, قازاقستاننىڭ ەڭبەك سىڭىرگەن ءارتىسى كەڭەس جۇمابەكوۆ 75 جاسىن ساحنا تورىندە قارسى الدى. ساكەن تەاترىندا بەلورۋس دراماتۋرگى الەكسەي دۋداراەۆتىڭ «كەش» قويىلىمىن ساحنالادى.
بۇل قويىلىمنىڭ وزگەشەلىگى سول, باس-اياعى ءۇش كەيىپكەر سومدايدى. ۇشەۋى دە – تەاتر ونەرىنىڭ ءىرى وكىلدەرى. باستى رولدە – كەڭەس جۇمابەكوۆ. قازاقستاننىڭ ەڭبەك سىڭىرگەن قايراتكەرى, «كەرەي حان» اتالىپ كەتكەن قايرات كەمالوۆ پەن دارىندى اكتريسا نۇرجىبەك جانسۇگىروۆا – ساحنادا. وسى ءبىر مەزەتتە پرەمەراعا كەلگەندەر دەمىن ىشكە تارتتى.
سپەكتاكل سوعىس سويقانىنان كەيىن شالعايداعى اۋىلدا قالعان ءۇش قاريانىڭ ءومىرىن باياندايدى. ۇشەۋى دە تاعدىردىڭ ءتۇرلى تاۋقىمەتىن تارتىپ-اق باققان. اشتىقتى دا, سوعىستى دا كورگەن. ەڭ سوراقىسى سول, ۇشەۋى دە بالالارىنا كەرەكسىز بولىپ قالعان. ىزدەپ قالار دەگەن جالعان ۇمىتپەن كۇنى بويى جولعا جاۋتەڭدەيدى. الايدا, جوق...
ۆاسيلي اقساقال (كەڭەس جۇمابەكوۆ) «بالام الگى گەولوگ دەي مە, بىردەمە بولىپ جۇمىس ىستەيدى. جەردىڭ ۇستىندە اكەسى جۇرگەندە, استىنداعى بايلىقتى نەمەنەسىنە ىزدەيدى؟», دەپ كۇيىنگەن كەزدە كورەرمەن تاڭداي قاقتى.
قىسقاسى, كەيىپكەرلەر جارىق الەمنىڭ ماحاببات مۇڭى, ساعىنىش شەرى, تاسباۋىرلىق تاۋقىمەتى جونىندە وي قوزعايدى.
– بۇل – تاعدىرى تراگەدياعا اينالعان بەيباقتار تۋرالى سپەكتاكل. بالالارىنا كەرەكسىز بولىپ قالعان قاريالاردىڭ مۇڭ-زارىن كورەمىز. قازىر قاراۋسىز قالعان قاريالار كوپ. قارتتار ۇيىنە بارىڭىز. جۇرەگىڭىز اۋىرادى. جاستار وسى قويىلىمنان تاعىلىم السا دەگەن تىلەگىم بار. انالار, اكەلەر جىلاماسىن. مىنا سپەكتاكل جوعارى دەڭگەيدە ءوتتى. جاقسى اسەر الدىم. اكتەرلەر وسى قويىلىمدى جۇرەكپەن, ىستىق سەزىممەن وينادى, – دەيدى قازاقستاننىڭ ەڭبەك سىڭىرگەن قايراتكەرى بولات ۇزاقوۆ.
ءوز كەزەگىندە كەش يەسى دە كورەرمەندەرىمەن قاۋىشقانىنا ريزا بولىپ, العىس جاۋدىرىپ, باس ءيدى.
«مەرەيتويىما وسىنداي سىي جاساپ جاتىر. قۋانىشىمدا كورەرمەنىممەن قاۋىشقانىما رازىمىن. بارشاڭىزعا العىسىم شەكسىز. شامامىز جەتكەنشە قاسيەتتى ونەرگە ادال بولۋعا تىرىسامىن», دەدى كەڭەس جۇمابەكوۆ.
قاراعاندى وبلىسى