قاراعاندى وبلىسىندا تەلەفون جانە ينتەرنەت-الاياقتارىنا الدانعان ازاماتتاردىڭ سانى جىل باسىنا قاراعاندا ازايعان. ءتورتىنشى توقساندا الاياقتاردىڭ قۇربانى بولعان جابىرلەنۋشىلەردىڭ بارلىعى الاياقتاردىڭ ايلا-تاسىلدەرىنەن حاباردار بولعان, دەپ حابارلايدى Egemen.kz Polisia.kz-كە سىلتەمە جاساپ.
– ماسەلەن, قاراعاندى قالاسىندا الاياقتىڭ قۇربانى بولعان جابىرلەنۋشىدەن جاۋاپ الۋ بارىسىندا ول: «مەن الاياقتاردىڭ قانداي تاسىلدەرمەن ازاماتتاردى الدايتىنىنان حاباردار بولدىم. بۇل تۋرالى بىرنەشە رەت تەلەارنالاردان دا اقپاراتتار بەرىلدى. الايدا بۇنىڭ ماعان قاتىسى بولمايدى دەپ ويلادىم», دەدى. قازىرگى ۋاقىتتا رەسپۋبليكا بويىنشا تەلەفون جانە ينتەرنەت-الاياقتىعىنىڭ الدىن الۋ ءىس-شاراسى وتكىزىلىپ جاتىر. مىسالى, قاراعاندى قالالىق پوليتسيا باسقارماسىنىڭ «كيبەرپول» قىزمەتكەرلەرىمەن قالاداعى مەكەمەلەردىڭ بىرىنە حاكەرلىك شابۋىل جاساعان تەمىرتاۋ قالاسىنىڭ تۇرعىنى ۇستالدى. ول ۆيرۋستى باعدارلامالاردى پايدالانۋ ارقىلى مەكەمەدەن 63 ملن تەڭگە اقشا جىمقىرعان. قازىرگى ۋاقىتتا كۇدىكتى ۇستالىپ, ونىڭ باسقا دا قىلمىستارعا قاتىسى بار-جوعى تەكسەرىلىپ جاتىر, – دەدى قاراعاندى وبلىستىق پوليتسيا دەپارتامەنتى باستىعىنىڭ ورىنباسارى ءابىل ءابىلدين.
سونداي-اق سپيكەردىڭ ايتۋىنشا, تەمىرتاۋ قالالىق پوليتسيا باسقارماسىنىڭ قىزمەتكەرلەرىمەن وزدەرىن پوليتسيا قىزمەتكەرىمىز دەپ تانىستىرىپ, جالعان قىزمەتتىك كۋالىك كورسەتىپ, ەلدى الداعان الاياقتار توبى ۇستالعان. كۇدىكتىلەر تۇرعىندارعا 7 ملن تەڭگە كولەمىندە شىعىن كەلتىرگەن. ولار ۇستالىپ, ۋاقىتشا ۇستاۋ يزولياتورىنا قامالدى. سونىمەن قاتار قاراعاندىلىق پوليتسەيلەر الماتى قالاسىندا كورشىلەس ەلدىڭ ازاماتىن ۇستادى. ول ءوزىن بانك قىزمەتكەرىمىن دەپ تانىستىرىپ, تۇرعىنداردان 35 ملن تەڭگە اقشا جىمقىرعان. كۇدىكتى قاماۋعا الىندى. تەرگەۋ امالدارى جۇرگىزىلىپ جاتىر.