قازاقستان رەسپۋبليكاسى قارۋلى كۇشتەرى مەملەكەتتىك اسكەري-تاريحي مۇراجايىنىڭ فيليالىندا كەڭەس وداعىنىڭ باتىرى, گەنەرال-مايور يۆان ۆاسيلەۆيچ پانفيلوۆ پەن ونىڭ وتباسى مۇشەلەرىنە ارنالعان «وتباسى تاريحى – ەل تاريحى» اتتى كورمە اشىلدى, دەپ حابارلايدى Egemen.kz اتالعان ۆەدومستۆونىڭ ءباسپاسوز قىزمەتىنە سىلتەمە جاساپ.
ءىس-شاراعا قورعانىس ءمينيسترىنىڭ ورىنباسارى گەنەرال-لەيتەنانت سۇلتان قامالەتدينوۆ, الماتى وڭىرلىك گارنيزونىنىڭ قولباسشىلىعى, اسكەري جوعارى وقۋ ورىندارىنىڭ كۋرسانتتارى جانە «جاس سارباز» اسكەري-پاتريوتتىق قوزعالىسىنىڭ تاربيەلەنۋشىلەرى قاتىستى.
28 گۆاردياشى-پانفيلوۆشىلار ساياباعى داڭق مەموريالىنداعى ماڭگىلىك الاۋعا گۇل شوقتارىن قويۋدان باستالعان ءىس-شارادا ەكىنشى دۇنيەجۇزىلىك سوعىسىنىڭ, جەرگىلىكتى ۇرىس قيمىلدارى مەن قارۋلى كۇشتەردىڭ ارداگەرلەرى ءسوز سويلەدى.
ەكسپوزيتسيانى گەنەرال پانفيلوۆتىڭ نەمەرەسى, قازاق كسر-ءنىڭ ەڭبەك سىڭىرگەن ونەر قايراتكەرى, بەلگىلى كومپوزيتور باقىتجان بايقاداموۆتىڭ قىزى ۇيىمداستىرىپ وتىر.
«وتباسى تاريحى – ەل تاريحى» كورمەسىنە پانفيلوۆتەر, قارالديندەر, بايقاداموۆتار وتباسى مۇشەلەرىنە قاتىستى فوتوسۋرەتتەر, مۇراعاتتىق قۇجاتتار مەن ولاردىڭ تۇتىنعان جەكە زاتتارى قويىلعان. ەكسپوناتتار پاتشالىق رەسەي, رەۆوليۋتسيا, ازاماتتىق, ءبىرىنشى جانە ەكىنشى دۇنيەجۇزىلىك سوعىستار, سونداي-اق جاپپاي ساياسي قۋعىن-سۇرگىن كەزەڭىن قامتيدى.
كورمەنى ۇيىمداستىرۋعا كەڭەس وداعىنىڭ باتىرى, 316-شى اتقىشتار ديۆيزياسىنىڭ كومانديرى گەنەرال-مايور يۆان ۆاسيلەۆيچ پانفيلوۆتىڭ 130 جىلدىعى, ونىڭ جۇبايى ماريا يۆانوۆنا پانفيلوۆانىڭ 120 جىلدىعى جانە قىزى ۆالەنتينا يۆانوۆنا پانفيلوۆانىڭ 100 جىلدىعى سەبەپ بولعان.
پانفيلوۆ-بايقاداموۆتار وتباسى ءومىرىنىڭ كوپ بولىگى الماتى قالاسىمەن تىعىز بايلانىستى. ماسكەۋدى قورعاۋدا وشپەس ەرلىك كورسەتكەن 316-شى اتقىشتار ديۆيزياسى الماتى قالاسىندا قۇرىلعانى ءمالىم.
باقىتجان بايقاداموۆتىڭ تاماشا شىعارمالارى الماتىدا جازىلدى. ال وسى كۇندەرى قارۋلى كۇشتەر مەملەكەتتىك اسكەري-تاريحي مۇراجايى فيليالىنىڭ ديرەكتورى الۋا بايقاداموۆا جاس ۇرپاقتىڭ اسكەري-پاتريوتتىق تاربيەسىن دامىتۋعا باعا جەتپەس ۇلەس قوسىپ كەلەدى.
ءىس-شارا اياسىندا قارۋلى كۇشتەردىڭ ۇلتتىق اسكەري-پاتريوتتىق ورتالىعى فيليالىنىڭ ارتىستەرى باقىتجان بايقاداموۆتىڭ مۋزىكاسىنا قويىلعان تۋىندىلاردى ورىندادى.