«التىن دومبىرالى» اقىن ماقسات اقانوۆتى جەرلەستەرى قاراعاندىنىڭ قاقپاسىنان ءسان-سالتاناتپەن قارسى الدى. گۇل-شوقتارىن ۇسىنىپ, قۇرمەت كورسەتتى. وبلىس اكىمى ەرماعانبەت بولەكپاەۆ جىر ءدۇلد ۇلىن قابىلداپ, 3 بولمەلى پاتەردىڭ كىلتىن سىيعا تارتتى.
مەرەيى تاسىعان ماقسات اقىنمەن بىرگە ءماجىلىس دەپۋتاتى امانجول التاەۆ تا كەلدى.
– ماقسات, ءسىزدىڭ جەڭىسىڭىزگە بۇكىل ارقا جۇرتى قۋاندى! بۇل – تاريحي جەڭىس. سەبەبى وسى ۋاقىتقا دەيىن قاراعاندىعا «التىن دومبىرا» كەلگەن ەمەس. ءوزىڭىزدى شىن جۇرەكتەن قۇتتىقتايمىن! وسى حاباردى ەستىگەندە توبەمىز كوككە ەكى ەلى عانا جەتپەي قالدى. ارقا اقىندارى مەكتەبىنىڭ مەرەيىن ۇستەم ەتتىڭىز. اقىنىمىزدى قولداۋعا قاشان دا دايىنبىز. سىزگە شىعارماشىلىق تابىس, كۇش-قۋات تىلەيمىز, – دەدى ە.بولەكباەۆ.
ايتىستىڭ ارداگەرى امانجول التاەۆ تا ءسوز الىپ, ماقسات اقانوۆقا جىلى لەبىزىن ءبىلدىردى.
– ماقسات اقانوۆ – مەنىڭ شاكىرتتەرىمنىڭ ءبىرى دە بىرەگەيى. تالاي جىل ايتىستا اتوي سالىپ, ەلىنىڭ مۇڭ-مۇقتاجىن جىرىنا قوسىپ كەلەدى. مەن ماقسات اقىنمەن ماقتانامىن. مەن عانا ەمەس, بۇكىل ارقانىڭ ەلى ماقتانادى. «التىن دومبىرا» ايتىسىندا جاسىنداي جارقىرادى. تۇيدەك-تۇيدەك شۋماقتارىمەن ەلدى تاڭ قىلدى. ماقسات باۋىرىمدى شاكىرتىمدى وسى ءبىر ايتۋلى جەڭىسىمەن قۇتتىقتايمىن, – دەدى امانجول التاەۆ.
اقىندار ايتىستا «ەڭبەك – ەل ىرىسى» تاقىرىبىندا جىر ءوربىتتى. ماقسات اقانوۆ اقتىق سىنعا دەيىن اپتىققان جوق. فينالدا مەيىربەك سۇلتانحانمەن ايتىستى. بۇل تارتىستا قازىلار القاسىنىڭ شەشىمىمەن جەرلەسىمىز ۇزدىك دەپ تانىلىپ, «التىن دومبىرانى» قولىنا الىپ, سۋ جاڭا تەمىر تۇلپاردى تىزگىندەدى.
1-ورىن العان مەيىربەك سۇلتانحان (قىزىلوردا وبلىسى) ەكى ميلليون تەڭگە جانە «ايتىستىڭ اقتاڭگەرى» اتاعىنا قول جەتكىزدى. اسپانبەك شۇعاتاەۆ (پاۆلودار وبلىسى) ەكىنشى ورىن السا, ۇزدىك ۇشتىكتە جانسايا مۋسينا (بقو), تولەگەن جامانوۆ ( ۇلىتاۋ وبلىسى) بار.
قاراعاندى وبلىسى