قۋاتتى كۇننەن الاتىن جۇيە

ءىرى جوبانىڭ قۇرىلىسى ناۋرىز ايىندا باستالعان. 10 گەكتار ستانسا اۋماعىنا 8850 كۇن ساۋلەسىنەن قۋات الاتىن پانەل ورناتىلعان. كۇن-ەلەكتر ستانساسى جىلىنا 4,77 مەگاۆاتت ەلەكتر ەنەرگياسىن وندىرمەك. وندىرىلەتىن ەلەكتر ەنەرگياسىن تۇتىنۋ ارقىلى كومىر جاعۋدى 16-18 پايىزعا ازايتۋ جوسپارلانعان.

قۋات ءوندىرۋ ورنىن سالۋ جۇمىستارىن وتاندىق قۇرىلىس كومپانياسى اتقارعان. قۇرىلىسقا 10-عا جۋىق جۇمىسكەر جۇ­مىل­دىرىلعان. ال قازىر 2 ادام تۇراقتى جۇمىس ىستەيدى.

التى شاقىرىمنان استام ۇڭعىمالار بۇرعىلاندى. سالماعى 200 توننادان اساتىن 177 مەتالل كونسترۋكتسيالار جيىن­­تى­عى ورناتىلدى. 64 شاقىرىمعا سىم مەن كابىل تارتىلدى.

– ستانساعا ورناتىلعان ەكى جاقتى پانەلدەر تىكەلەي كۇن ساۋلەسىن دە, جەردەن شاعىلىسقان ساۋلەلەردى دە پايدالانۋعا مۇمكىندىك بەرەدى. ولاردىڭ بەلگىلەنگەن قۋات كوەففيتسيەنتى جوعارىلايدى, بۇل پاي­دالانۋ تيىمدىلىگىن ارتتىرادى. كوم­پا­نيامىز تازا جانە تۇراقتى ەنەرگياعا ۇمتىلاتىن باسقا ايماقتارعا ۇلگى بولۋدى ماقسات ەتەدى. 2035 جىلعا قاراي قازاقستاندا جەك ۇلەسى شامامەن 15 پايىز بولادى دەپ بولجانىپ وتىر. ءبىز ءوز ۇلەسىمىزدى وسىعان از دا بولسىن قوستىق. جۇمىستى ۋاقىتىندا ورىنداعان بۇرعىلاۋشىلار توبىنا العىسىم شەكسىز. ەلەكتريكتەر مەن بپپ رەتتەۋشىلەرگە مەردىگەرلەردىڭ قاتىسۋىمەن ستانسا جاب­دىقتارىن ىسكە قوسقانى ءۇشىن راحمەت ايتامىن. ءبىزدىڭ كومپانيا ۇسىناتىن كۇن ەلەكتر ستانساسى – بۇل يننوۆاتسيالىق تەحنولوگيالار مەن ەكولوگيالىق تازا ەنەرگيا كوزدەرىن قۇرۋعا دەگەن كۇش-جىگەرىمىزدىڭ كورىنىسى, – دەيدى «كوۋنراد مىس كومپانياسى» جشس تەحنيكالىق ديرەكتورى ۆيتالي لوگاچەۆ.

مۇنىمەن قوسا, «سەس 4,77 مۆت» كۇن ەلەكتر ستانساسىنىڭ اشىلۋىنا قاتىسقان بالقاش قالاسىنىڭ اكىمى ساپار ساتاەۆ, قالالىق ءماسليحات توراعاسى احات ءمۇسلىموۆ, وبلىستىق ەكولوگيا دەپار­تامەنتىنىڭ باستىعى دارحان ەرعالي ۇلى جانە تاپسىرىس بەرۋشى كومپانيانىڭ دەپارتامەنت باسشىلارى قۇتتىقتاۋلارىن جەتكىزدى.

– مەملەكەت باسشىسى قاسىم-جومارت توقاەۆ 2021-2025 جىلدارعا ارنالعان «جاسىل قازاقستان» ۇلتتىق جوباسىن ازىرلەۋگە باستاماشى بولا وتىرىپ, ەكونوميكانى جاسىلداندىرۋ مەن قورشاعان ورتانى قورعاۋدى ەكونوميكالىق باعىتتىڭ نەگىزگى باعىتتارىنىڭ ءبىرى دەپ اتادى. ەلىمىزدىڭ وڭىرلەرىندە كومىرقىشقىل گازىنىڭ ءبولىنۋىن شەكتەۋ جانە ءوسىپ كەلە جاتقان شولەيتتەنۋدى اۋىزدىقتاۋ ءۇشىن مەملەكەت باسشىسى بەس جىل ىشىندە ورماندارعا 2 ميل­لياردتان استام اعاش وتىرعىزۋ جانە ەلدى مەكەندەردە 15 ميلليوننان استام اعاش وتىرعىزۋ مىندەتىن العا قويىپ وتىر. مىنە, جاڭا كۇن ەلەكتر ستانساسى اشىلىپ وتىر. مەن بالقاشتىقتاردىڭ اتىنان العىس بىلدىرەمىن. حالىقتىڭ ۇنەمى ءوسىپ كەلە جاتقان قاجەتتىلىكتەرىن قاناعاتتاندىرۋ ءۇشىن قورشاعان ورتانى قورعاي وتىرىپ, قانشا ءوندىرۋ كەرەك, قالاي ءوندىرۋ كەرەك, كىمگە ءوندىرۋ كەرەك دەگەن ماسەلەلەرگە ۇلكەن ءمان بەرەتىن كەز كەلدى. ءبىز مۇنداي باستامالاردى قولداۋعا ءازىرمىز. جاڭا نىساننىڭ جۇمىسىنا ساتتىلىك تىلەيمىن, – دەدى بالقاش قالاسىنىڭ اكىمى ساپار ساتاەۆ.

بۇعان دەيىن دە بالقاشتا قۋاتتىلىعى 40 مۆت بولاتىن «گۇلشات» كۇن ەلەكتر ستانساسى ىسكە قوسىلعان ەدى. قۇنى 46 ميلليون دوللاردى قۇرايتىن جوبا بۇگىندە ەل يگىلىگىنە اينالىپ وتىر. جاڭا ەلەكتر ستانساسىنىڭ دا پايداسى وراسان بولماق.

قاراعاندى وبلىسى,

بالقاش قالاسى