تەرگەۋ كەزىندە كۇدىكتىنى ازاپتاپ ولتىرگەن پوليتسەيلەردىڭ جازاسى جەڭىلدەتىلدى

اپەللياتسيالىق القا ءۋاليحان جانىبەكوۆ پەن دىنمۇحامەد يساەۆقا قاتىستى قىلمىستىق ىستەر بويىنشا شىمكەنت قالالىق اۋدانارالىق سوتىنىڭ ۇكىمىن وزگەرتتى.

«سوت القاسى قىلمىستىق كودەكستىڭ 146-بابى 3-بولىگى بويىنشا سوتتالعان جانىبەكوۆتىڭ ارەكەتتەرىن 146-باپ 2-بولىك 1-تارماققا اۋىستىردى. وعان قۇقىق قورعاۋ ورگاندارىندا 3 جىل مەرزىمگە قىزمەت اتقارۋ قۇقىعىنان ايىرا وتىرىپ 3 جىل, 6 اي باس بوستاندىعىنان ايىرۋ جازاسى تاعايىندالدى», دەلىنگەن شىمكەنت سوتى ءباسپاسوز قىزمەتىنىڭ مالىمەتىندە.

ال بۇعان دەيىن سوت شەشىمى باسقا بولعان ەدى. ول كەزدە سوت جانىبەكوۆتى 7 جىلعا باس بوستاندىعىنان ايىرعان بولاتىن. قاراتاۋ اۋداندىق پوليتسيا ءبولىمىنىڭ باستىعى دىنمۇحامەد يساەۆتى ءبىرىنشى ساتىداعى سوت ءۇش جىلعا جانە التى ايعا قاماۋعا الىپ, پوليتسيا پودپولكوۆنيگى اتاعىنان ايىرعان ەدى. ەندى ول كىناسىز دەپ تانىلىپ, ونىڭ ارەكەتتەرىندە اتالعان قىلمىستىق قۇقىق بۇزۋشىلىق قۇرامىنىڭ بولماۋىنا بايلانىستى اقتالىپ وتىر.

ەسكە سالايىق, وسى جىلى ماۋسىمدا نۇربولات جۇماباەۆتىڭ پوليتسيا دەپارتامەنتى عيماراتىندا ءولى تابىلۋىنا بايلانىستى قۇقىق قورعاۋ ورگاندارىنىڭ قىزمەتكەرلەرى باس بوستاندىعىنان ايىرىلعان ەدى. جۇماباەۆ پەن ونىڭ دوسى سەرگەي پەتروۆتى پوليتسيا 2021 جىلى جەلتوقساندا اۆتوكولىك ۇرلاۋ ءىسى بويىنشا ۇستاعان بولاتىن. كەيىنىرەك بىرنەشە جاۋاپ الۋدان كەيىن نۇربولات جۇماباەۆتىڭ جۇرەگى توقتاپ قالعان. باستاپقىدا پوليتسياداعىلار تەرگەۋ كەزىندە ەر ادام ءوزىن ناشار سەزىنىپ, جەدەل جاردەم كەلگەنشە قايتىس بولىپ كەتكەنىن جەتكىزگەن. بىراق مارقۇمنىڭ تۋىستارى ەر ادامنىڭ دەنەسىندە جاراقاتتار بولعانىن ايتىپتى. بۇدان سوڭ قۇقىق قورعاۋ ورگاندارى قىزمەتتىك تەكسەرىس جۇرگىزدى. ءسويتىپ اتالعان ءىس بويىنشا ءتورت قىزمەتكەردىڭ كۇش قولدانىپ, ازاپتاعانى بەلگىلى بولدى.