قاراعاندىدا احمەت بايتۇرسىن ۇلى اتىنداعى ءبىلىم وشاعى بار. مەكتەپ ۇجىمى ۇلت ۇستازىنىڭ ەسىمىن ءبىلىم وشاعىنا بەرۋ ماسەلەسىن كوپ جىل بۇرىن كوتەرگەنىمەن, ءساتى كەيىندە عانا ءتۇستى. وسى يگىلىكتى شاراعا ۇستاز ءسابيرا كۇلپەيىسوۆانىڭ قوسقان ۇلەسى زور.
مەكتەپتە ەڭبەك ەتىپ كەلە جاتقانىنا قىرىق جىل بولعان ءسابيرا ىزباسارقىزى ۇلت ۇستازىن بويتۇمارى سانايدى. بالا كەزىنەن اقاڭنىڭ شىعارماشىلىعىنا ەرەكشە سۇيىسپەنشىلىكپەن قارايدى. قايراتكەرلىگىنە, ءىلىم مەن ءبىلىم جولىنداعى ىزدەنىستەرىنە, ەڭبەگىنە ەرتە كەزدەن قانىققان مۇعالىم مىنانى ماقسات ەتەدى: «قازاق بالالارىنا الاش قايراتكەرىنىڭ ىزگىلىگىن ۇقتىرا بەرۋ كە-رەك».
سول ماقسات ۇدەسىندە ۇلكەن ەڭبەك جاسايدى. اقاڭ ەسىمىن مەكتەپكە بەرۋ ءۇشىن قالالىق, وبلىستىق فورۋمدار وتكىزۋگە مۇرىندىق بولادى. جىلدا ءتۇرلى كونفەرەنتسيا وتكىزەدى. مۇنىمەن قوسا وقۋشىلاردى اقاڭنىڭ شىعارماشىلىعىنا باعىتتالعان عىلىمي زەرتتەۋ جۇمىستارىنا باۋليدى.
بيىل اقاڭ اتىنداعى مەكتەپكە – 60 جىل. بىلتىر 150 جىلدىق مەرەيلى داتاسىندا اتالعان ءبىلىم ورداسى ۇلت ۇستازىن لايىقتى ۇلىقتادى. «احمەت بايتۇرسىن ۇلىنىڭ پەداگوگيكالىق مۇراسى» اتتى قازاق ءتىلى مەن ادەبيەتى ءپانى مۇعالىمدەرىنىڭ ۇلكەن فورۋمى ءوتتى. سول فورۋم اياسىندا «احمەتتانۋ» كابينەتىنىڭ تۇساۋى كەسىلگەن-ءتىن. كابينەتتىڭ جەتەكشىسى – س.ىزباسارقىزى. مۇندا احمەت بايتۇرسىن ۇلىنىڭ كىتاپتارى مەن ەڭبەكتەرى بار. ءار پارتاعا نوۋتبۋك قويىلعان. سونداي-اق كابينەتتە كورسەتىلگەن QR كود ارقىلى ا.بايتۇرسىن ۇلىنىڭ ەڭبەكتەرىمەن تانىسا الادى. بۇعان قوسا اتاتەك شەجىرەسى جازىلعان ستەند ءىلىنىپتى. بۇل وقۋشىلاردىڭ ىزدەنىسىمەن ازىرلەنگەن. مەكتەپ مۇعالىمدەرى «احمەت. ۇلت ۇستازى» اتتى قويىلىم دا قويعان بولاتىن. سونىڭ ستسەناريىن دە ءسابيرا ۇستاز جازعان.
– مەكتەبىمىزدە 2014 جىلدان بەرى «احمەتتانۋ» كۋرسى وتكىزىلەدى. ۇلى ۇستازدىڭ سان قىرلى شىعارمالارىن جەتىك ءبىلۋ ءۇشىن «احمەتتانۋ» كۋرسىنىڭ ارنايى باعدارلاماسى جاسالعان بولاتىن. مىنە, كابينەت اشىلعالى بەرى كۋرسىمىزدى وسىندا وتكىزەمىز. قازىرگى كۇنى پەداگوگيكالىق باعىتىن زەرتتەدىك. ەندى ەكونوميكالىق جاعىنان زەرتتەۋدى باستاپ جاتىرمىز. بۇل جونىندە دە قايراتكەر تۇلعانىڭ ەڭبەكتەرى كوپ. بۇل كابينەت – وسكەلەڭ ۇرپاقتى زەرتتەۋشىلىك, شىعارماشىلىق قابىلەتىن دامىتىپ, قالامىنىڭ ۇشتالۋىنا سەپ بولسىن دەگەن نيەتپەن اشىلدى. ءار وقۋشىنىڭ بويىندا احمەت عيبراتى بولۋى كەرەك, – دەيدى قازاق ءتىلى مەن ادەبيەتى ءپانىنىڭ مۇعالىمى س.ىزباسارقىزى.
ول اقتوعاي اۋدانى قىزىلاراي اۋىلىنداعى مەكتەپتى ءتامامداپ, الماتىداعى اباي اتىنداعى پەداگوگيكالىق ينستيتۋتقا وقۋعا تۇسەدى. مۇحتار ماعاۋين, سەرىك قيراباەۆ, نىعمەت عابدۋللين, سەرىك ابىلقاەۆ, فاتيما مۇسابەكوۆا سەكىلدى ۇلكەن عالىمداردان ءدارىس الادى. مارتەبەلى مۇعالىمنىڭ ءوزى «ادەبيەتكە, عىلىمعا سول كىسىلەردىڭ تاعىلىمى جول اشتى. مەنىڭ ومىرىمدەگى ەڭ ۇلكەن جەتىستىگىم دە – وسى», دەيدى.
ەكىنشى كۋرس وقىپ جۇرگەندە عابيدەن مۇستافين شىعارمالارىنا عىلىمي زەرتتەۋ جۇرگىزىپ, سىيلىققا اقىن قادىر مىرزا ءالىنىڭ شاعىن كىتابىن الىپتى. ەسكىرگەن كىتاپتى قولىنا ۇستاپ, سوناۋ ينستيتۋت قابىرعاسىنداعى ستۋدەنتتىك شاعىن ساعىنا ەسكە الادى.
العاش ەڭبەك جولىن اقتوعايدىڭ اقشي اۋىلىنداعى مەكتەپتەن باستايدى. «اۋىل مەكتەبى مەن ءۇشىن ۇلكەن تاجىريبە بولدى. اۋىل بالالارىنا سەگىز جىل ءبىلىم بەرىپ, قالاعا قونىس اۋداردىق. بۇعان دەيىن نىعمەت نۇرماقوۆ, ءاليحان بوكەيحان اتىنداعى مەكتەپتەردە دە ساباق بەردىم. قالاعا كەلىپ تە ۇستازدىق تاجىريبەمىزدى ءارى قاراي جەتىلدىردىك. ەڭ ۇلكەن جەتىستىگىم – شاكىرتتەرىم. بەلگىلى قالامگەر تولەن تىلەۋباي باستاعان بىرنەشە جۋرناليستكە ساباق بەردىم. جىلدا بىرنەشە وقۋشىم جوعارى وقۋ ورنىنا گرانتقا تۇسەدى», دەيدى ول.
مارتەبەلى مۇعالىم 1997 جىلى ء«بىلىم بەرۋ ءىسىنىڭ ۇزدىگى» توسبەلگىسىمەن ماراپاتتالسا, جاقىندا عانا مەملەكەت باسشىسىنىڭ قولىنان «قازاقستاننىڭ ەڭبەك سىڭىرگەن قۇرمەتتى ۇستازى» اتاعىن الدى. كوپ جىلعى ەڭبەگى ەلەنگەن س.ىزباسارقىزىنىڭ ىزگىلىكتى ءىزى وسىنداي.
قاراعاندى وبلىسى