قازاقستانىم – قاراشاڭىراعىم!

بىلتىردان باستاپ قايتا جاڭعىرعان رەسپۋبليكا كۇنىنىڭ ماڭىزىنا ارنالعان كونفەرەنتسياعا استانا قالاسى ىشكى ساياسات باسقارماسىنىڭ باسشىسى نۇرداۋلەت ءالمۇحانوۆ, مەملەكەتتىك ورگانداردىڭ, استانا قالاسى قازاقستان حالقى اسسامبلەياسى­نىڭ, قوعامدىق قۇرىلىمدار مەن ەتنوما­دەني بىرلەستىكتەردىڭ جانە ۇكىمەتتىك ەمەس ۇيىمداردىڭ وكىلدەرى قاتىسىپ, ءوز ويىن ورتاعا سالدى.

جيىن باسىندا ءسوز العان ىشكى ساياسات باسقارماسىنىڭ باسشىسى نۇرداۋلەت ءالمۇحانوۆ جينالعان قاۋىمدى الداعى مەرەكەمەن قۇتتىقتاپ, ەتنومادەني بىرلەستىكتەردىڭ ىنتىماعىنىڭ ماڭىزىنا توقتالدى.

«بۇگىندە ءتۇرلى ۇلت وكىلدەرى قازاق حالقىن تۋعانىنداي كورەدى. ولار وسىندا وزدەرى­نىڭ ۇلتتىق ءداستۇرىن, مادەنيەتىن, وزىندىك ەرەكشەلىگىن ساقتاپ قالۋعا مۇمكىندىك الدى. حالىقتار اراسىنداعى بەيبىتشىلىك وتە ماڭىزدى ەكەنى بەلگىلى. وسىمەن ەكىنشى جىل جاڭا مازمۇندا تويلاپ جاتقان رەسپۋبليكا كۇنىندە حالىقتار اراسىنداعى بەيبىتشىلىك پەن كەلىسىم ودان سايىن ارتا تۇسەدى. قايتا جاڭعىرعان ۇلتتىق مەرەكە – حالقىمىزدىڭ رۋحىن كوتەرىپ, ەلدىگىمىزدى نىعايتا تۇسەتىن اسا ماڭىزدى تاريحي قادام. ۇلتتىق ءتىلىمىز, ءدىنىمىز, رامىزدەرىمىز ارقىلى ازاتتىعىمىز بەن قازاقتىعىمىز ايقىندالدى. مۇنىڭ ءبارى بەرەكەلى بىرلىك پەن ەڭسەلى ەڭبەكتىڭ ارقاسىندا دەسەك ارتىق ايتقانىمىز ەمەس. ەلىمىزدىڭ ەڭسەسى بيىك, ابىرويى اسقاق بولسىن», دەدى باسقارما باسشىسى.

پارلامەنت سەناتىنىڭ دەپۋتاتى, قازاق­ستان حالقى اسسامبلەياسىنىڭ مۇشەسى اليشەر ساتۆالديەۆ قازاقستاننىڭ ەگەمەندىگى تۋرالى دەكلاراتسيانىڭ ءمان-ماعىناسىن ءاربىر ازامات جەتە ءتۇسىنۋ كەرەك دەيدى.

«بۇگىنگى جيىنعا قاتىسىپ وتىرعان اعا-اپكەلەرىمىز ەگەمەندىكتىڭ العاشقى جىل­دارىنداعى اۋىرتپالىقتى, سول زاماننىڭ قيىندىقتارىن تاباندىلىقپەن ەڭسەرگەنىن جاقسى بىلەمىز. ەگەمەندىك تۋرالى دەكلاراتسيا قابىلدانعان جىلدارى ءبىز مەكتەپ جاسىنداعى بالا بولعاندىقتان, بۇل قۇجاتتىڭ ءمان-ماعىناسىن جەتە تۇسىنە قويعان جوق ەدىك. ەسەيە كەلە بۇل كۇننىڭ قانشالىقتى ماڭىزدى ەكەنىن, سونداي قيىن-قىستاۋ زاماندا ەلىمىزدىڭ تاۋەلسىزدىگىن الۋعا جاسالعان العىشارتتاردىڭ ءبىرى ەكەنىن ۇعىندىق. سوندىقتان دا قازىرگى تاڭدا سوڭىمىزدان ءوسىپ كەلە جاتقان جاس ۇرپاققا وسىندا جيىندار ارقىلى, عىلىمي-پراكتيكالىق كونفەرەنتسيالاردا ايتىپ, جاستاردىڭ ساناسىنا سىڭىرە بەرگەن ءجون. بار-جوعى 17-باپتان تۇراتىن دەكلاراتسيا زاڭ تۇر­عىسىنان كۇشتى قۇجات بولماسا دا, سايا­سي تۇرعىدان تاۋەلسىزدىككە, ودان كەيىنگى قۇجات­تارعا جول اشقان ساياسي قۇجات دەپ ەسەپ­تەيمىن», دەيدى سەنات دەپۋتاتى.

ءىس-شارا بارىسىندا بايان­داما جاساعان استانا قالاسى  قوعامدىق كەڭەسىنىڭ توراعاسى زۋلفۋحار عايىپوۆ وسىدان 33 جىل بۇرىن قابىلدانعان دەكلاراتسيا ەل تاۋەلسىزدىگىنىڭ نەگىزىن قالاپ بەرگەنىن, وسى قۇجات ارقىلى ەلىمىزدىڭ رامىزدەرى, قازاقستاننىڭ تەرريتورياسى بەكىتىلگەنىن اتاپ ءوتتى.

«ۇزاق ۇزىلىستەن كەيىن بيىل ەكىنشى مارتە تويلانىپ جاتقان رەسپۋبليكا كۇنى ەلىمىزدىڭ ۇلتتىق مەرەكەسىنە اينالىپ ۇلگەردى. ەگەمەن­دىك جىلدارى قازاقستان قىرۋار تابىستارعا قول جەتكىزىپ, ىشكى-سىرتقى ساۋدا-ساتتىقتى ءبىر ىزگە قويدى. ءتىپتى وسى قۇجات ارقىلى ەلىمىزدىڭ تاۋەلسىزدىگى دە قابىلدانعانىن ايتا كەتكەن ءجون. سونداي-اق ىشكى ساياساتتا, ونىڭ ىشىندە ۇلىستار بىرلىگىن ساقتاۋداعى ساياساتى جاقسى جۇزەگە استى. وسى كۇنگە دەيىن قازاقستان دەيتىن ورتاق وتانىمىزدا ۇلىستار اراسىندا اسا كۇردەلى بىردە-ءبىر كيكىلجىڭ, جانجال بولعان ەمەس. وسى ارقىلى ەلىمىزدىڭ ىشكى سايا­ساتى دۇرىس باعىتتا اتقارىلىپ جاتقانىن باعامداي بەرۋگە بولادى. ءبىزدىڭ بايلىعىمىز دا, ءبىزدىڭ كۇشىمىز دە – بىرلىكتە. بىرلىگىمىزدى ارقاشان ارداقتاي بىلەيىك», دەيدى ز.عايىپوۆ.

سونداي-اق كونفەرەنتسيا بارىسىندا تاريح عىلىمدارىنىڭ دوكتورى اليما اۋاناسوۆا, استانا قحا عىلىمي-ساراپ­تامالىق توبىنىڭ مۇشەسى تاتيانا برىنزا, ل.ن.گۋميلەۆ اتىنداعى ەۇۋ دوتسەنتى گۇلنار قاجەنوۆا رەسپۋبليكا كۇنىنە وراي بايانداما جاسادى.