ەگەمەندىك دەكلاراتسياسى بەكىتىلىپ, ەلىمىز ازاتتىقتىڭ العاشقى قادامدارىن جاساعان توقسانىنشى جىلدارى دۇنيەگە كەلگەن ازاماتتاردىڭ بۇل كۇندەرى بۋىنى قاتايىپ, ءار سالادا ەلىمىزدىڭ دامۋى مەن وركەندەۋىنە ءوز ۇلەسىن قوسىپ كەلەدى. بۇگىن ءبىز سپورت سالاسىندا ەگەمەندىكپەن بىرگە ەسەيىپ, وسى ۋاقىت ارالىعىندا الەمدىك دودالاردا ەرەكشە ونەرىمەن دارالانىپ, ەلىمىزدىڭ داڭقىن شىعارىپ جۇرگەن ساڭلاقتار تۋرالى ءسوز قوزعاماقپىز.
- قازاقستاننىڭ ەگەمەندىگى تۋرالى دەكلاراتسيا قابىلدانعان جىلى دۇنيە ەسىگىن اشقانداردىڭ ءبىرى – تەڭبىلدوپ ونەرىنە قازاق بالاسىنىڭ دا تالاسى بار ەكەنىن دالەلدەپ جۇرگەن فۋتبولشى اسحات تاعىبەرگەن. 1990 جىلدىڭ تامىزىندا قىزىلوردا وبلىسىندا دۇنيەگە كەلگەن بالا اسحاتتى اكەسى قولىنان جەتەكتەپ, فۋتبول ۇيىرمەسىنە اكەلدى. فۋتبولدىڭ قىر-سىرىن مەڭگەرە باستاعان كەيىپكەرىمىز بىردەن جاتتىقتىرۋشىلاردىڭ كوزىنە ءتۇسىپ, جاستىعىنا قاراماستان وزىنەن جاسى ۇلكەن توپتىڭ بالالارىمەن بىرگە ەلىشىلىك ءىرى دودالاردا دوپ تەپتى. العىر فۋتبولشى دارا تالانتىمەن 2008 جىلدان باستاپ جەرگىلىكتى «قايسار» كلۋبىنىڭ نەگىزگى قۇرامىنا الىنىپ, سول ۋاقىتتان بەرى ەلىمىزدىڭ كاسىپقوي كوماندالارىندا دوپ تەۋىپ كەلەدى. ءار جىلدارى «قايسار», «اقتوبە», «استانا», «توبىل», «ورداباسى» كوماندالارىندا ويناپ, قازاقستاننىڭ بەس دۇركىن چەمپيونى اتاعىن جەڭىپ الدى.
«اقتوبە» كومانداسىندا ءتاۋىر ويىنىمەن كوزگە تۇسكەن ا.تاعىبەرگەن 2014 جىلدان باستاپ ەلىمىزدىڭ ۇلتتىق قۇراماسىنا شاقىرتۋ الدى. الاڭنىڭ جارتىلاي قورعانىسىنا جاۋاپ بەرەتىن كەيىپكەرىمىز بۇل كۇندەرى «ورداباسىنىڭ» دا, ۇلتتىق قۇرامانىڭ دا ناعىز كوشباسشىسىنا اينالىپ, كاپيتاندىق مىندەتتى دە اتقارىپ ءجۇر. جاسىل الاڭ جيەگىندە جوسپارلاناتىن تاكتيكاعا باس باپكەر جاۋاپتى بولسا, سول تاكتيكانىڭ الاڭدا جۇزەگە اسۋى كاپيتانعا بايلانىستى. سوندىقتان دا كاپيتاندىق مىندەتتىڭ جۇگى اۋىر. اسحات – الاڭدا وتە مىنەزدى ويىنشى. ۇلتتىق قۇراماداعى جاس فۋتبولشىلار تاعىبەرگەندى تىڭداپ, سوعان قاراپ بوي تۇزەيدى.
ايىپ دوبىن وتە شەبەر ورىندايتىن اسحاتتىڭ الاڭداعى مىندەتى ويىندى ۇيلەستىرۋ بولسا دا, قازىرگى تاڭدا ەلىمىزدەگى ەڭ ۇزدىك سۇرمەرگەن فۋتبولشىنىڭ ءبىرى. بيىل «ورداباسى» ساپىندا 11 مارتە مەرگەندىگىمەن كوزگە ءتۇستى. بۇل كورسەتكىشپەن اسحات سۇرمەرگەندەر تىزىمىندە قازىر ەكىنشى ورىندا تۇر. ونىڭ ناۋرىز ايىندا ەۋرو-2024 كەزەڭىندە دانيا قاقپاسىنا سوققان گولىنا تەك قازاق جۇرتى ەمەس, بۇكىل الەم جانكۇيەرلەرى دە كۋا بولدى. جۋىردا وتانداسىمىزدىڭ سول گولى جىلدىڭ ۇزدىك گولىنا بەرىلەتىن «پۋشكاش» سىيلىعىنا ۇمىتكەرلەردىڭ قاتارىنان تابىلىپ, ەل مەرەيىن تاعى ءبىر مارتە ۇستەم ەتتى.
كۇنى كەشە اسحات تاعىبەرگەن رەسپۋبليكا كۇنى قارساڭىندا پرەزيدەنت جارلىعىمەن «ەرەن ەڭبەگى ءۇشىن» مەدالىمەن ماراپاتتالدى.
- كەيىنگى جىلدارى ەلىمىزدە فۋتبولمەن قاتار شاعىن فۋتبول دا (فۋتزال) قارقىندى دامىپ كەلە جاتقانى بەلگىلى. قازاقستان قۇراماسىنىڭ ويىنشىلارى تۇراقتى تۇردە ەۋروپا, الەم چەمپيوناتتارىنا قاتىسىپ ءجۇر. 2016 جىلى سەربيانىڭ باس شاھارى بەلگرادتا وتكەن ەۋروپا بىرىنشىلىگىندە تاريحي ناتيجەنى تىركەپ, العاش رەت قارت قۇرلىقتىڭ قولا جۇلدەسىن موينىندا جارقىراتتى. سونىمەن قاتار 2021 جىلى ليتۆانىڭ ۆيلنيۋس, كاۋناس, كلايپەدا قالالارىندا الاۋى تۇتانعان الەم چەمپيوناتىندا جەرلەستەرىمىز جاسىنداي جارقىلداپ, العاش رەت الەمدەگى ەڭ ۇزدىك ءتورت قۇرامانىڭ قاتارىنان تابىلدى. ەل فۋتزالشىلارىنىڭ وسىنداي تاريحي جەتىستىككە قول جەتكىزۋىنە ۇلەس قوسقانداردىڭ ءبىرى داۋرەن نۇرعوجين دە – 1990 جىلى تۋعان دارىندى فۋتزالشىنىڭ ءبىرى.
قاراعاندى فۋتزال مەكتەبىنىڭ تۇلەگى 2007 جىلدان بيىلعا دەيىن بىرنەشە جىل قاراعاندىنىڭ «تۇلپارى», الماتىنىڭ «قايراتى» ساپىندا جانە قازاقستان ۇلتتىق قۇراماسىندا ونەر كورسەتىپ, جۋىردا عانا مانسابىن اياقتادى. الدىمەن «تۇلپار-يكار», سوسىن «تۇلپار» ساپىندا ويناعان د.نۇرعوجين قاراعاندى كومانداسىمەن بىرگە التى مارتە ەل بىرىنشىلىگىنىڭ كۇمىس جۇلدەگەرى اتانىپ, ءبىر رەت قولا جۇلدەگە يە بولدى. ەكى رەت قازاقستان كۋبوگىندە توپ جاردى. سونىمەن قاتار ەل سۋپەركۋبوگىندە دە جەڭىسكە جەتكەن. كەيىننەن 2015 جىلى الماتىنىڭ «قايراتىنا» اۋىسىپ, ءبىرتالاي بەلەستى باعىندىردى. الماتىلىق ۇجىممەن بىرگە ەل بىرىنشىلىگىندە سەگىز مارتە ۇزدىك شىعىپ, كۋبوك باسەكەسىندە دە سەگىز مارتە باس جۇلدەنى جەڭىپ الدى. سونىمەن قاتار ءۇش رەت «ەرەمەنكو كۋبوگىن» باسىنان اسىرا كوتەردى. «قايرات» كلۋبىندا ول 193 ماتچقا قاتىسىپ, 36 مارتە مەرگەندىگىمەن كوزگە ءتۇستى. ال ۇلتتىق قۇرامادا 75 ماتچتا 18 گولدىڭ اۆتورى اتاندى. بيىلدان باستاپ د.نۇرعوجين ۇلتتىق قۇرامانىڭ جاتتىقتىرۋشىلار شتابىنا قوسىلىپ, سوڭىنان ەرگەن جاستارعا بىلگەنىن ۇيرەتىپ, اقىل-كەڭەسىن ايتىپ ءجۇر.
- 1990 جىلى دۇنيەگە كەلگەن تاعى ءبىر كەيىپكەرىمىز – تالانتتى بوكسشى, كەيىنگى جاستارعا ۇلگى بولاتىن سپورتشى – ءىلياس سۇلەيمەنوۆ. ۇندەمەي ءجۇرىپ ۇلكەن ىستەردى تىندىرعان وتانداسىمىز بوكس قولعابىن 2002 جىلى كيىپ, بۇگىنگە دەيىن باعىندىرعان بەلەسى ءبىر توبە. حالىقارالىق سپورت شەبەرى دەگەن اتاعى بار وتانداسىمىز – 56 كگ سالماقتا ەكى دۇركىن ەل بىرىنشىلىگىنىڭ جەڭىمپازى. 2011 جىلى كورەيانىڭ ينچحون قالاسىندا الاۋى تۇتانعان ازيا چەمپيوناتىنىڭ كۇمىس جۇلدەسىن يەلەنسە, ارادا ءۇش جىل وتكەندە ءدال سول ينچحون قالاسىنداعى ازيا ويىندارىندا جەڭىس تۇعىرىنان كورىندى. سونىمەن قاتار بوكسشىمىز 2012 جىلعى لوندون وليمپياداسىندا دا باق سىناۋ قۇرمەتىنە يە بولدى. العاشقى جەكپە-جەگىن ءساتتى وتكىزگەنىمەن, وكىنىشكە قاراي, ەكىنشى اينالىمدا 2011 جىلعى ەۋروپا چەمپيونى, باكۋدەگى الەم بىرىنشىلىگىنىڭ كۇمىس جۇلدەگەرى بريتانيالىق ەندريۋ سەلبيدەن جەڭىلىپ, جارىستى ەرتە اياقتاۋعا ءماجبۇر بولدى.
P.S. جوعارىدا ءسوز ەتكەن سپورتشىلارىمىز – ەگەمەندىكپەن بىرگە ەسەيگەندەردىڭ ءبىر پاراسى عانا. ايتپەسە, ەلىمىزدە توقسانىنشى جىلى تۋعان تالاناتتى ساڭلاقتار جەتىپ ارتىلادى.