مەملەكەت باسشىسىنا الماتى قالاسىنىڭ بيىلعى 9 ايداعى الەۋمەتتىك-ەكونوميكالىق دامۋىنىڭ الدىن الا قورىتىندىسى تۋرالى باياندالدى, دەپ حابارلايدى Egemen.kz اقوردا ءباسپاسوز قىزمەتىنە سىلتەمە جاساپ.
پرەزيدەنتكە قالا ەكونوميكاسىنىڭ قارقىندى ءوسىپ كەلە جاتقانى, قىسقا مەرزىمدى ەكونوميكالىق ينديكاتور جىل باسىنان بەرى 13,5 پايىزعا كوتەرىلگەنى جونىندە مالىمەت بەرىلدى. وڭدەۋ ونەركاسىبىنىڭ دامۋ قارقىنى (+21%) بويىنشا الماتى ەلىمىزدە تۇراقتى تۇردە ءبىرىنشى ورىندا كەلەدى. مەگاپوليس ەكونوميكاسىنا 1 تريلليون تەڭگەدەن استام ينۆەستيتسيا تارتىلدى. بۇل رەتتە جەكە ينۆەستيتسيالاردىڭ ءوسىمى 7,3 پايىزدى قۇرادى. بەلسەندى جۇمىس ىستەپ تۇرعان شاعىن جانە ورتا بيزنەس سۋبەكتىلەرىنىڭ سانى 341 مىڭعا دەيىن جەتىپ, 25,8 پايىزعا ارتتى. رەسپۋبليكالىق بيۋدجەتتىڭ ءتۇسىمى 38,4 پايىزعا ءوسىپ, 3,91 تريلليون تەڭگەگە دەيىن جەتتى. جەرگىلىكتى بيۋدجەتتىڭ تۇسىمىنە قاتىستى جوسپار 28,7 پايىزعا (243 ملرد تەڭگە) اسىرا ورىندالدى. جىل باسىنان بەرى 58,7 مىڭ جۇمىس ورنى اشىلدى, ونىڭ 77 پايىزى تۇراقتى جۇمىس ورنى. 2023 جىلدىڭ قورىتىندىسى بويىنشا ەكونوميكا ءوسىمىنىڭ قارقىنى 6,5 پايىزعا دەيىن جەتەدى دەگەن بولجام بار.
قاسىم-جومارت توقاەۆقا بيىلعى 18 تامىزدا الماتى قالاسىن دامىتۋ ماسەلەلەرى جونىندەگى كەڭەستە بەرىلگەن تاپسىرمالارىنىڭ ورىندالۋ بارىسى تۋرالى باياندالدى. سەيسميكالىق قاۋىپسىزدىكتى قامتاماسىز ەتۋ ءۇشىن جەر سىلكىنىسى تۋرالى الدىن الا حابارلايتىن 28 سەيسموستانتسيا ورناتۋ جۇمىستارى تولىعىمەن اياقتالدى. توتەنشە جاعداي كەزىندە ادامدار جينالاتىن 545 قاۋىپسىز ورىن انىقتالدى. مەديتسينالىق قىزمەت كورسەتۋ ساپاسىن ارتتىرۋ ءۇشىن العاشقى مەديتسينالىق-سانيتارلىق كومەكتىڭ بىرىڭعاي ستاندارتى ازىرلەندى. جىل باسىنان بەرى ءولىم-ءجىتىم كورسەتكىشى 11 پايىزعا, انا ءولىمى 32,4 پايىزعا, بالا ءولىمى 35,5 پايىزعا تومەندەدى. ءبىلىم بەرۋ سالاسىندا 4,9 مىڭ وقۋشىعا ارنالعان 10 مەكتەپ جانە 4 قوسىمشا وقۋ كورپۋسى سالىندى.
مەملەكەت باسشىسىنىڭ تاپسىرماسى بويىنشا قالانى كوگالداندىرۋعا جانە قوعامدىق كەڭىستىكتى دامىتۋعا ەرەكشە نازار اۋدارىلادى. جىل سوڭىنا دەيىن قالاداعى جاسىل-جەلەك كولەمى جان باسىنا شاققاندا 12,3 شارشى مەترگە دەيىن ۇلعايادى. الماتى قالاسىنىڭ اكىمى جىل باسىنان بەرى جاسىل-جەلەكتى اۆتوماتتاندىرىلعان سۋارۋ جۇيەسىمەن قامتۋ كورسەتكىشى 3,4 ەسە وسكەنىن مالىمدەدى. بيىلعى 9 ايدا 405 گەكتار اۋماقتا جۇمىس جۇرگىزىلدى. جىل سوڭىنا دەيىن بۇل كورسەتكىش 587 گەكتارعا دەيىن جەتكىزىلەدى.
سونىمەن قاتار پرەزيدەنتكە الماتىداعى ورتالىقسىزداندىرۋ ءىسىنىڭ ارالىق ناتيجەلەرى تانىستىرىلدى. مەملەكەت باسشىسى قولداعان باستاما اياسىندا اۋدان اكىمدىكتەرىنە ولاردىڭ بيۋدجەتتەرىن 3,1 ەسەگە, ياعني 184,3 ميلليارد تەڭگەگە دەيىن ۇلعايتا وتىرىپ, 15 فۋنكتسيا بەرىلدى. بۇگىندە 196 مىڭ شارشى مەتر جولعا اعىمداعى جوندەۋ جۇمىستارى جۇرگىزىلدى. 100 شاقىرىمنان استام سۋمەن جابدىقتاۋ جانە سۋ تارتۋ جەلىلەرى جانە ت.ب. سالىندى.
كەزدەسۋ سوڭىندا قاسىم-جومارت توقاەۆ تۇرعىنداردى ساپالى سۋمەن, سۋ بۇرۋ جەلىلەرىمەن قامتاماسىز ەتۋ, ينۆەستيتسيا تارتۋ جونىندەگى شارالاردى كۇشەيتۋ, سونداي-اق الماتى اگلومەراتسياسىمەن كولىك بايلانىسىن جاقسارتۋ جونىندەگى جوبالاردى ودان ءارى ىسكە اسىرۋعا ەرەكشە نازار اۋدارۋدى تاپسىردى.