شوقان ءۋاليحانوۆ اتىنداعى وبلىستىق امبەباپ عىلىمي كىتاپحاناسىنىڭ ۇيىمداستىرۋىمەن «جازۋشىمەن ءبىر كۇن» جوباسى اياسىندا جەرگىلىكتى اقىن, قازاقستان جازۋشىلار وداعىنىڭ مۇشەسى عايني الىمبەكقىزىنىڭ شىعارماشىلىعىنا ارنالعان «سوزدەن كۇمبەز تۇرعىزعان» تاقىرىبىندا ادەبي كەش ءوتتى.
ىبىرايىم سۇلەيمەنوۆ كوشەسىنىڭ بويىنداعى «جاستار اللەياسىندا», اشىق اسپان استىندا ۇيىمداستىرىلعان ءىس-شارا بارىسىندا عايني الىمبەكقىزى ليريكالىق سارىنداعى ولەڭدەرىن وقىپ, ادەبي كەشكە جينالعان وقىرماندارىمەن سىرلاستى. سونداي-اق كەنەن ازىرباەۆ اتىنداعى وبلىستىق فيلارمونيانىڭ انشىلەرى جاننا اسانقۇلوۆا, اسكەربەك دوسانوۆ اقىننىڭ سوزىنە جازىلعان «سەنى ءسۇيۋ», «قىز جۇرەگى», «كەلەرسىڭ ءوزىڭ», «قازدار قايتىپ بارادى قاراشادا», «تاعى دا كەلدى ءبىر كوكتەم» اندەرىن شارىقتاتا شىرقاپ, كوپشىلىكتىڭ ىقىلاسىنا بولەندى.
ءىس-شارادا قازاقستان جازۋشىلار وداعىنىڭ مۇشەلەرى, جەرگىلىكتى قالامگەرلەر شىرىن ماماسەرىكوۆا, ءۇمىت بيتەنوۆا, باقىتجان سوۆەت ۇلى عايني الىمبەكقىزىنىڭ پوەزياسى تۋرالى ويلارىمەن ءبولىسىپ, اقىنعا شىعارماشىلىق تابىس تىلەدى. وزدەرى دە سوڭعى جازعان ولەڭدەرىن وقىپ, ءبىر جاساپ قالدى.
ء«داستۇرلى جوبا اياسىندا كىتاپحاناشىلار اتقاراتىن جۇمىس از ەمەس. كىتاپحانا ۇجىمى الداعى ۋاقىتتا دا جەرگىلىكتى قالامگەرلەردىڭ شىعارمالارىن جاستار اراسىندا ناسيحاتتاۋ جۇمىستارىن جالعاستىرۋعا نيەتتى. ويتكەنى جامبىل جەرىندە الدىڭعى تولقىنمەن قاتار جاس بۋىن اقىن-جازۋشىلار دا جەتكىلىكتى», دەيدى كىتاپحانا قىزمەتكەرى جانات جەتپىسباەۆا.
ادەبي كەش سوڭىندا ءسوز العان عايني اقىن شىعارماشىلىعىن ەلەپ-ەسكەرىپ, ادەمى ءىس-شارا ۇيىمداستىرعان كىتاپحانا ۇجىمىنا, الىس-جاقىننان كەلگەن قالامداس ارىپتەستەرىنە ريزاشىلىعىن جەتكىزدى.
تاراز