قاراعاندى مەديتسينا ۋنيۆەرسيتەتى كلينيكاسىنىڭ باس حيرۋرگى, حيرۋرگيالىق اۋرۋلار كافەدراسىنىڭ پروفەسسورى نۇرقاسي اباتوۆ رەسپۋبليكالىق «ەڭبەك جولى» بايقاۋىنان جەڭىمپاز اتانىپ, مەرەيى تاسىدى. بىلىكتى حيرۋرگ بايقاۋدىڭ «جۇمىس ىستەيتىن جاستاردىڭ ۇزدىك تالىمگەرى» اتالىمىندا توپ جاردى.
نۇرقاسي تولەپبەرگەن ۇلى – ءوزىنىڭ ەڭبەك جولىندا 6 مىڭنان اسا پاتسيەنتكە وپەراتسيا جاساعان جان. مەديتسيناداعى مىنا ءبىر جەتىستىگى اق جەلەڭدىلەردىڭ اراسىندا اسا قۇرمەتپەن اتالادى: ەلىمىزدە العاش رەت بۇيرەككە, سونداي-اق مەحانيكالىق سارى اۋرۋ كەزىندە ۇيقى بەزى مەن ءوت جولدارىنا لاپاروسكوپيالىق رەكونسترۋكتيۆتى وپەراتسيا جاساعانى. مۇنىمەن قوسا, 1996 جىلى قاراعاندىدا العاشقىلاردىڭ ءبىرى بولىپ قۇرساق قۋىسى مۇشەلەرىنىڭ ءارتۇرلى اۋرۋىن جەدەل ەمدەۋدىڭ ەندوۆيدەوحيرۋرگيالىق ادىستەرىن تاجىريبە جۇزىندە ىسكە اسىرعان مامان.
ودان بولەك, دەنساۋلىق ساقتاۋ مينيسترلىگىنىڭ كلينيكالىق پروتوكولدارىن, وقىتۋدىڭ جاڭا ادىستەرىن ازىرلەۋگە ۇنەمى قاتىسادى. كاسىبي ءبىلىمىن جەتىلدىرەمىن دەگەن دارىگەرلەر مەن حيرۋرگتەرگە ارناپ 30-عا جۋىق بەينەفيلم جاساعانىن, 100-دەن اسا عىلىمي جاريالانىمدارى بارىن دا قوسا كەتكەنىمىز ءجون.
كوپجىلدىق ەڭبەگى بار بىلىكتى حيرۋرگتىڭ بىلگەنىمەن ءبولىسۋىن ازاماتتىق دەر ەدىك. پروفەسسور قوسىمشا ستۋدەنتتەر مەن رەزيدەنت دارىگەرلەرگە ءدارىس وقيدى, شەبەرلىك ساباعىن وتكىزەدى, بىلگەنىن ۇيرەتەدى. سونداي شاكىرتتەرىنىڭ ءبىرى – قاراعاندى مەديتسينا ۋنيۆەرسيتەتى كلينيكاسى حيرۋرگيا ءبولىمىنىڭ مەڭگەرۋشىسى رۋسلان بادىروۆ.
– نۇرقاسي تولەپبەرگەن ۇلىنىڭ العاشقى شاكىرتتەرىنىڭ ءبىرى ەكەندىگىممەن ماقتانامىن. پروفەسسوردىڭ جەتەكشىلىگىمەن ماگيستراتۋرا مەن دوكتورانتۋرانى ءبىتىردىم. تالىمگەرلىگىمەن ءتورت دوكتورلىق جانە سەگىز ماگيسترلىك جۇمىس قورعادىم. بىلىكتى حيرۋرگ – رەزيدەنت دارىگەرلەردىڭ تالىمگەرى. ءوز وقۋشىلارىن كلينيكالىق ۇدەرىسكە بار ىنتا-ىقىلاسىمەن جۇمىلدىرادى. تالاي جاس حيرۋرگتەردىڭ قاسىندا تۇرىپ, وپەراتسيا جاساتتى. ۇنەمى اقىلىن ايتادى. ءوزىنىڭ تاجىريبەسىمەن ءبولىسىپ, جاناشىرلىق تانىتىپ جۇرەدى. كوپتەگەن ىزىنەن ەرگەن حيرۋرگتەرگە جول كورسەتكەن جومارت كىسى, دەيدى شاكىرتى رۋسلان.
نۇرقاسي تولەپبەرگەن ۇلى مەدۋنيۆەرسيتەتتى تامامداعان سوڭ ەڭبەك جولىن بۇرىنعى تورعاي وبلىسىنىڭ امانگەلدى اۋدانىندا دارىگەر-حيرۋرگ بولىپ باستايدى. كەيىن قاراعاندىعا قونىس اۋدارىپ, قىزمەتىن وبلىستىق كلينيكالىق اۋرۋحانادا جالعاستىرادى. العاش 1996 جىلى مەديتسينا عىلىمدارىنىڭ كانديداتى عىلىمي دارەجەسىن الادى. ودان سوڭ وبلىستىق دەنساۋلىق ساقتاۋ باسقارماسىنىڭ باس حيرۋرگى بولىپ قىزمەت ەتەدى. بىلىكتى دارىگەردىڭ باسشىلىعىمەن وبلىستا العاش رەت امبۋلاتوريالىق حيرۋرگيا جانە تراۆموتولوگيا ورتالىعى اشىلعانىن اتاپ ايتساق, ەش ارتىعى جوق. حيرۋرگيالىق وتالاردىڭ سىنىپتاماسى, ەمدەۋ مەكەمەلەرى تيىمدىلىگىنىڭ ەكونوميكالىق ەسەپتەرى, مەديتسينا مەكەمەلەرىنىڭ ەمدەۋ قىزمەتى بويىنشا تولەمى ازىرلەندى. وسىنداي ىزگىلىكتى ءىستىڭ بارىنە, جالپى قاراعاندىداعى دەنساۋلىق ساقتاۋ سالاسىن جەتىلدىرۋگە نۇرقاسي اباتوۆتىڭ سىڭىرگەن ەڭبەگى مول.
پروفەسسور نۇرقاسي تولەپبەرگەن ۇلىنىڭ ەڭبەگى ەسكەرۋسىز ەمەس. بۇگىن «ەڭبەك جولى» بايقاۋىندا باق جۇلدىزى جانسا, بۇعان دەيىن «دەنساۋلىق ساقتاۋ ءىسىنىڭ ۇزدىگى» توسبەلگىسىمەن ماراپاتتالعان. جەرلەسىمىز – «قازاقستاننىڭ 100 جاڭا ەسىمى» رەسپۋبليكالىق بايقاۋىنىڭ دا جەڭىمپازى. 2010 جىلى «ۇزدىك حيرۋرگ» اتالىمى بويىنشا قاراعاندى وبلىسى اكىمى سىيلىعىنىڭ لاۋرەاتى.
قاراعاندى وبلىسى