سوفيا داساەۆا مەن لەيلا نۇرلىباەۆا ەسىمدى نازارباەۆ زياتكەرلىك مەكتەبىنىڭ وقۋشىلارى كەزەكتى رەت ولجالى بولدى. Solve for tomorrow 2023 رەسپۋبليكالىق الەۋمەتتىك جوبالار بايقاۋىندا ەكىنشى ورىنعا يە بولىپ, 2,5 ملن تەڭگە كولەمىندە گرانت الدى.
Samsung كومپانياسىنىڭ الەۋمەتتىك جوبالار بايقاۋىنا ەلىمىزدىڭ تۇپكىر-تۇپكىرىنەن كەلگەن وقۋشىلاردىڭ 400-دەن اسا جۇمىسى ۇسىنىلدى. ەكىنشى تۋرعا 33 جوبا ءوتتى. بايقاۋ فينالىندا 10 جوبا جۇلدەلى ورىندار ءۇشىن باق تالاستىردى. بايقاۋدا ەكىنشى ورىن العان ون بەس جاستاعى قاراعاندىلىق جاس ورەندەر زياتكەرلىك مەكتەپتىڭ 10-سىنىبىندا وقيدى. ولار بايقاۋعا ەكى جىل بۇرىن باستاعان Full Speed Wheelchair جوباسىن ۇسىندى.
– قىزدار جوبا بويىنشا جۇمىستى ەكى جىل بۇرىن باستادى. الدىمەن ولار قاراعاندى ينفراقۇرىلىمىنىڭ موبيلدىلىگى تومەن توپتارعا قولجەتىمدىلىگىن زەرتتەدى. ءبىزدىڭ ينفراقۇرىلىمدى ەسكەرە وتىرىپ, وڭاي قوزعالاتىن اربا قاجەت دەپ تاپتى. بۇل ماسەلەنى شەشۋ ءۇشىن قىزدار مۇگەدەكتەر ارباسىن گيروسكۋتەرمەن بىرىكتىردى. ارنايى نەگىزدەردىڭ كومەگىمەن ولار ارتقى دوڭگەلەكتەردىڭ ورنىنا گيروسكۋتەردى بەكىتتى. مۇنداي ءپروتوتيپتىڭ قۇنى ەلەكتر ارباسىنا قاراعاندا ارزان, – دەيدى جوبا جەتەكشىسى جانار بايمەتوۆا.
– بۇل اربانى جاساۋ كوپ ۋاقىتتى قاجەت ەتپەدى. ءبىز ءبىرىنشى ءپروتوتيپتى جاساعاندا, ەش كەمشىلىگى بايقالمادى. بىراق تەستىلەۋ كەزىندە كەمشىلىكتەر انىقتالدى. كرەسلودا وتىرعاندا اربانى وشىرۋگە بولمايدى. سوندىقتان ءبىز تۇيمەلەردى رىچاگتارعا قوسۋ كەرەك دەپ شەشتىك, – دەيدى لەيلا نۇرلىباەۆا.
بايقاۋعا جۇمىستارىن ۇسىنىپ, ول بىرنەشە ىرىكتەۋدەن وتكەنشە التى اي ۋاقىت كەتكەن. دەگەنمەن, جوبا اۆتورلارى بايقاۋدىڭ جوعارى دەڭگەيدە ۇيىمداستىرىلعانىن, قاتىسۋ ارقىلى جاڭا مۇمكىندىكتەرگە جول اشىلعانىن جەتكىزدى.
– بايقاۋ بارىسىندا جوبانىڭ ەكونوميكالىق قۇرامداس بولىگىن ەسەپتەۋگە كومەكتەسكەن Samsung كومپانياسىنىڭ تالىمگەرىمەن ءوزارا بايلانىس ورناتتىق. بايقاۋدا پايدالى اقپاراتتارعا قانىقتىق, فينالدا ءوز جوبالارىمىزدى باسقا قاتىسۋشىلاردىڭ يدەيالارىمەن سالىستىرىپ, تاجىريبە جينادىق. بەرىلگەن 2,5 ملن تەڭگەگە جوبامىزدى ودان ءارى ىلگەرىلەتۋدى, ونى جاقسارتۋدى جوسپارلاپ وتىرمىز. ءبىز پاتەنت العىمىز كەلەدى. بولاشاقتا جوبامىزدى مونەتيزاتسيالاۋىمىز مۇمكىن, – دەيدى سوفيا داساەۆا.
بۇعان دەيىن دە بۇل جوبا زياتكەرلىك مەكتەپتەر وقۋشىلارى اراسىنداعى بايقاۋدا جانە ءال-فارابي اتىنداعى قازاق ۇلتتىق ۋنيۆەرسيتەتى ۇيىمداستىرعان رەسپۋبليكالىق جوبالار بايقاۋىندا جۇلدەلى ورىندارعا يە بولعانىن ەسكە سالا كەتەيىك.
قاراعاندى