اۋىل مەكتەبى قالا مەكتەبىنەن كەم بولماۋعا ءتيىس. وسى ماقساتتا «اۋىلدىق ايماقتارداعى تىرەك مەكتەپتەردىڭ الەۋەتىن دامىتۋ» جوباسى جەمىستى جۇمىس ىستەيدى. وساكاروۆ اۋدانىنىڭ ورتالىعىنداعى ءاليحان بوكەيحانوۆ اتىنداعى تىرەك مەكتەبى دە سونىڭ ەسەبىنەن جاڭعىرتىلدى.
«قازاقستان حالقىنا» قورى, ءبىلىم بەرۋ سالاسىن تۇراقتى دامىتۋ قورى جانە نازارباەۆ زياتكەرلىك مەكتەپتەرىنىڭ بىرلەسكەن جوباسى اۋىل مەكتەپتەرىنە جاڭا تىنىس سىيلاپ كەلەدى. وسىمەن وبلىستاعى ەكىنشى مەكتەپ زاماناۋي كابينەتتەرمەن جاساقتالىپ, جاڭا وقۋ جىلىندا بالالاردى ايرىقشا قۋانتتى.
مەكتەپتىڭ ىرگەتاسى 1932 جىلى قالانعان. 2015 جىلى ءۇش قاباتتى جاڭا عيماراتقا كوشكەن. جالپى سىيىمدىلىعى 600 بالاعا ارنالعان مەكتەپتە قازىر 769 وقۋشى ءبىلىم الىپ, 86 مۇعالىم ساباق بەرەدى.
جوبا اياسىندا مەكتەپكە جاڭا جيھازدار مەن تەحنيكالار الىندى. اتاپ ايتقاندا, روبوتتەحنيكا, پسيحولوگ, دەفەكتولوگ, مەكتەپكە دەيىنگى دايىندىق, شاحمات كابينەتتەرى, تىگىن جانە تاماقتانۋ مادەنيەتى شەبەرحاناسى, تەلەستۋديا, STEM زەرتحاناسى, اRT-ستۋدياسى, FabLab, كىتاپحانا, سپورت جابدىقتارىمەن بىرگە بارلىعى 36 بولمە جاڭارتىلدى. «قازاقستان حالقىنا» قورى مەكتەپتى جابدىقتاۋعا 250 ملن تەڭگە قاراجات ءبولدى.
– اۋىلداعى ءبىلىم بەرۋدى قولداۋ تۋرالى ايتىلعاندا ەڭ الدىمەن, تىرەك مەكتەپتەردى كوتەرۋدى ويلاۋى كەرەك. بىلتىر ءبىلىم بەرۋ سالاسىن تۇراقتى دامىتۋ قورىمەن بىرلەسىپ, 17 وڭىردە 17 اۋىلدىق تىرەك مەكتەپ قۇردىق. نازارباەۆ زياتكەرلىك مەكتەبىنىڭ ستاندارتى بويىنشا ماتەريالدىق-تەحنيكالىق بازانى تولىعىمەن جاڭارتتىق. سونداي-اق مەكتەپكە تالداۋ جۇرگىزىپ, مۇعالىمدەر مەن وقۋ ورنى اكىمشىلىگىنىڭ بىلىكتىلىگىن ارتتىردىق. سەرىكتەستەرىمىز ءۇش جىل بويى ادىستەمەلىك قولداۋ كورسەتەدى. وسىلايشا, وقۋ ۇدەرىسىنە دەگەن كوزقاراستى وزگەرتىپ, جاڭا ءبىلىم بەرۋ تەحنولوگيالارىن ەنگىزدىك. قازىر 17 وبلىستا تاعى 63 تىرەك مەكتەپتى جاڭارتۋ جۇمىستارىن جالعاستىرۋدامىز, – دەدى «قازاقستان حالقىنا» قورىنىڭ توراعاسى بولات جامىشەۆ.
مۇنىمەن قوسا نازارباەۆ زياتكەرلىك مەكتەپتەرى ارنايى وقىتۋ باعدارلامالارىن تەگىن جۇرگىزبەك. ءبىلىم بەرۋ سالاسىن تۇراقتى دامىتۋ قورىنىڭ بارلىق شىعىنىن AITAS حولدينگى وتەيدى.
نازارباەۆ زياتكەرلىك مەكتەپتەرى بازاسىندا پەداگوگيكالىق ۇجىم مەن مەكتەپ باسشىلىعىنىڭ بىلىكتىلىگىن ارتتىرۋ باعدارلاماسى دا ىسكە قوسىلدى. مۇعالىمدەر 5-6 اي بويى وقىتۋدىڭ زاماناۋي ادىستەرى بويىنشا ارنايى كۋرستاردان وتەدى.
ءىس-شارا كەزىندە وبلىس اكىمى ەرماعانبەت بولەكپاەۆ ۇلت كوسەمى ءاليحان بوكەيحانوۆ ەسىمىن العان مەكتەپتىڭ ۇزدىكتەردىڭ قاتارىندا بولاتىنىنا سەنىم ءبىلدىردى. «بۇگىن بۇل مەكتەپتىڭ دە, جالپى اۋداننىڭ دا جاڭا تاراۋى باستالدى. ءبىلىم – تابىستى بولاشاق كەپىلى. سوندىقتان دا ءبىزدىڭ تىرەك مەكتەبىمىز بۇكىل وڭىرگە ساپالى ءبىلىم بەرۋدىڭ ۇلگىسى بولادى دەپ سەنەمىز. بۇل – وبلىسىمىزداعى جوبا اياسىندا جاڭعىرتىلعان ەكىنشى مەكتەپ. بيىل تاعى التى مەكتەپ جاڭعىرتىلماق», دەدى وبلىس اكىمى.
جاڭعىرتىلعان مەكتەپتىڭ اشىلۋ سالتاناتىنا ارنايى كەلگەن Aitas Foundation ديرەكتورى كسەنيا ۆەربا «اۋىلدىق ايماقتارداعى تىرەك مەكتەپتەردىڭ الەۋەتىن دامىتۋ» جوباسىنىڭ ماڭىزىنا توقتالىپ ءوتتى.
– جوبا ءبىلىم ساپاسىن ارتتىرۋعا, وزىق پەداگوگيكالىق تاجىريبەلەر مەن ادىستەمەلەردى ەنگىزۋگە جانە تىرەك مەكتەپتەردى قاجەتتى ماتەريالدىق-تەحنيكالىق بازامەن قامتاماسىز ەتۋگە باعىتتالعان. و باستا «Powered by NIS» جوباسى شىعىس قازاقستان مەن اقمولا وبلىسىنداعى بىرنەشە تىرەك مەكتەپتى دامىتۋدان باستالىپ ەدى. ال بۇگىندە, ياعني ەكى جىلدا ەل بويىنشا 80 اۋىل مەكتەبى قوسىلدى. ەندى مىڭداعان وقۋشى مەن مۇعالىمدەر جاڭا مەكتەپ جابدىقتارىمەن, ورتاق ادىستەمەمەن قامتىلادى. اۋىل نەمەسە قالا تۇرعىنى بولسىن, ءاربىر بالا تۇلعالىق جانە كاسىبي دامۋ جولىندا ساپالى ءبىلىم الۋعا لايىق. وسىلايشا, ول بولاشاقتا ەلىمىزدىڭ دامۋىنا ءوز ۇلەسىن قوسادى, – دەدى كسەنيا ۆەربا.
«اۋىلدىق جەرلەردە تىرەك مەكتەپتەردىڭ الەۋەتىن دامىتۋ» جوباسى اياسىندا وتكەن جىلى اقتوعاي اۋدانىندا كۇلاش بايسەيىتوۆا اتىنداعى مەكتەپ جاڭعىرتىلدى. بيىل شەت اۋدانى اقسۋ-ايۋلى اۋىلىنداعى جامبىل اقىلباەۆ اتىنداعى مەكتەپ-گيمنازيا, اباي اۋدانىنداعى شوقان ءۋاليحانوۆ اتىنداعى مەكتەپ-ليتسەي, شاحتينسك قالاسىنداعى ساكەن سەيفۋللين اتىنداعى مەكتەپ-گيمنازيا, تەمىرتاۋداعى ءاليحان بوكەيحانوۆ اتىنداعى مەكتەپ-گيمنازيا, بالقاشتاعى ءاليحان بوكەيحانوۆ اتىنداعى №15 مەكتەپ-ليتسەي جانە ساران قالاسىنداعى اباي اتىنداعى ورتا مەكتەپ جاڭارتىلادى.
قاراعاندى وبلىسى,
وساكاروۆ اۋدانى