قازاقستاندا ەستەتيكالىق توپتىق گيمناستيكا سپورتى دامىپ كەلەدى

«ەستەتيكالىق گيمناستيكا - دەنساۋلىق اسپەكتىسىنە نەگىزدەلگەن ەڭ ادەمى سپورت ءتۇرى. ول الەمدە وتكەن عاسىردىڭ ەلۋىنشى جىلدارىنان باستاپ دامي باستادى, فينليانديادا پايدا بولدى. 2003 جىلدان باستاپ حالىقارالىق ەستەتيكالىق توپتىق گيمناستيكا فەدەراتسياسى بار. قازىرگى ۋاقىتتا ونىڭ قۇرامىنا 49 ەل كىرەدى, وسى سپورت ءتۇرىنىڭ وليمپيادا ويىندارىنىڭ باعدارلاماسىنا ەنۋى ءۇشىن ۇلكەن الەۋەت بار», دەدى فەدەراتسيا باسشىسى.

قازاقستاندا ەستەتيكالىق توپتىق گيمناستيكا فەدەراتسياسى 2018 جىلى قۇرىلعان. 2020 جىلى سپورت مينيسترلىگىنىڭ اككرەديتاتسياسىن الدى. بۇل سپورت قىز بالالاردىڭ بويىندا باسقا قىزدارمەن ىنتىماقتاسا ءبىلۋ قابىلەتىن قالىپتاستىرادى.

«سوڭعى بەس جىلدا قازاقستان ءتىپتى پاندەمياعا دا قاراماستان وسى سپورت تۇرىنەن ۇلكەن سەرپىلىس جاسادى. بىلتىر ءبىزدىڭ قىزدار اۆستريادا وتكەن الەم چەمپيوناتىنىڭ قولا جۇلدەگەرى اتاندى, سونداي-اق ازيا چەمپيوناتىندا جەڭىسكە جەتتى», دەدى م.بەكتۇرعانوۆا.

سپيكەردىڭ ايتۋىنشا, قىسقا مەرزىم ىشىندە قازاقستاندا 154 سپورت شەبەرى, 54 حالىقارالىق دارەجەدەگى سپورت شەبەرى, 25 ۇلتتىق تورەشى, 5 حالىقارالىق دارەجەدەگى تورەشى تاربيەلەنگەن. بۇگىندە وسى سپورت تۇرىمەن شۇعىلداناتىنداردىڭ جالپى سانى 1500 ادامدى قۇراپ وتىر.

فەدەراتسيا بىلتىر ەلىمىزدىڭ تۇكپىر-تۇكپىرىندە, ونىڭ ىشىندە شالعايداعى اۋىلداردا وسى سپورت ءتۇرىن دامىتۋ بويىنشا ۇلتتىق جوبانى قولعا العان. جىل سايىن قىزداردى تارتۋ, سونداي-اق جاتتىقتىرۋشىلاردى دايارلاۋ ءۇشىن ءۇش وبلىستى قامتىپ وتىرۋ جوسپارلانعان. بىلتىر پيلوتتىق جوباعا اباي وبلىسىنان ءۇش اۋىل – اقسۋات, قاراۋىل, قالباتاۋ قوسىلدى. اقمولا وبلىسىندا اقكول, شورتاندى, اقمول اۋىلدارى, قاراعاندى وبلىسىندا شاحتينسك قالاسى قامتىلعان.

«وسى جىلدىڭ 1 ماۋسىمىندا ءبىز ساباققا تارتىلعان بالالاردىڭ قاتىسۋىمەن ۇلكەن فەستيۆال وتكىزدىك. جوبا اياسىندا 7 جاتتىقتىرۋشى وقىتىلدى. بۇل ورتالىقتاردىڭ بارلىعى كىلەمدەرمەن, مۋزىكالىق ورتالىقتارمەن, سونداي-اق بالالارعا ارنالعان كيىم, جابدىقتارمەن قامتاماسىز ەتىلدى. جاڭا وقۋ جىلىنان باستاپ بىزگە تاعى ءۇش وبلىس – باتىس قازاقستان (ورال), پاۆلودار (ەكىباستۇز), قوستاناي (رۋدنىي) قوسىلدى», دەدى فەدەراتسيا باسشىسى.