قاراعاندىدا كەنشىلەردىڭ داڭقىن ولەڭمەن اسپانداتقان «كەندى ولكە – قاراعاندى» اتتى رەسپۋبليكالىق ءمۇشايرا دۇركىرەپ ءوتتى. ولەڭ دوداسىن قاراعاندى قالاسىنىڭ اكىمدىگى ۇيىمداستىردى. جۇلدەگەرلەر كەنشىلەر شاھارىنىڭ ورتالىق ساياباعىنداعى ساحنادا ماراپاتتالىپ, جىرلارىن وقىدى.
مۇشايراعا رەسپۋبليكا بويىنشا 18 بەن 45 جاس ارالىعىنداعى قىرىقتان اسا اقىن ولەڭ جولداعان. قازىلاردىڭ ۇيعارىمىمەن وسىلاردىڭ ىشىنەن 9 اقىن ىرىكتەلىپ, جۇلدەگە لايىق دەپ تانىلدى. القا قۇرامىندا اقىن, مەملەكەتتىك اباي اتىنداعى سىيلىقتىڭ لاۋرەاتى عالىم جايلىباي, اقىن باۋىرجان باباجان ۇلى, جازۋشى, ەتنوگراف تورەحان مايباس, اقىن, قازاقستان جازۋشىلار وداعى وبلىستىق فيليالىنىڭ توراعاسى جانات جاڭقاش بولدى. اقىن, مەملەكەتتىك اباي اتىنداعى سىيلىقتىڭ لاۋرەاتى سەرىك اقسۇڭقار ۇلى توراعالىق ەتتى.
ءمۇشايرانىڭ شارتى بويىنشا اقىندار قاراعاندىعا, كەنشىلەرگە ولەڭ ارنادى. اقىن, قازاقستان جازۋشىلار وداعى وبلىستىق فيليالىنىڭ توراعاسى جانات جاڭقاش ۇلى بۇل جولعى مۇشايراعا تۇسكەن ولەڭدەردىڭ دەڭگەيى جوعارى ەكەنىن اتاپ ءوتتى.
– بۇل جولى ەكى اقىنعا ءبىرىنشى ورىندى بەرۋدى ۇيعاردىق. ويتكەنى كەلىپ تۇسكەن ولەڭدەردىڭ دەڭگەيى جوعارى. جاقسى ولەڭگە جاقسى جۇلدە بەرگەندى ءجون سانادىق. ءوز باعاسىن الۋعا ءتيىس. جۇلدەگەرلەردى انىقتاۋ وڭاي بولمادى. ءمۇشايرانى وتكىزۋدەگى ماقسات – كەندى ولكە قاراعاندىنىڭ توپىراعىندا وتكەن تاريحي وقيعالار مەن تۇلعالار تاعىلىمىن دارىپتەۋ, ولەڭ وزەگىنە اينالدىرۋ ءھام كەنشىلەر ءومىرىن جىرعا قوسىپ, ەڭبەك جولىن ناسيحاتتاۋ, – دەيدى ج.جاڭقاش ۇلى.
بۇل ءمۇشايرادا ەكى اقىنعا ءبىرىنشى ورىن بەرىلدى. اتىراۋ قالاسىنان كەلگەن ءاليا داۋلەتباەۆا مەن تەمىرتاۋلىق ادىلەت شوپەنگە بۇيىردى. قوس قالامگەرگە 700 مىڭ تەڭگەنىڭ سەرتيفيكاتى تابىستالدى. ەكىنشى ورىن اقىن, «Egemen Qazaqstan» گازەتىنىڭ ءتىلشىسى جانىبەك اليمانعا بۇيىردى. ءۇشىنشى ورىندى استانادان كەلگەن ۇلاربەك دالەي ۇلى مەن الماتىلىق اسىلان تىلەگەن ءبولىستى. ىنتالاندىرۋ سىيلىعىنا سالتانات قايىربەك, ەرىك نارىن, داۋلەت جادىراسىن, تاڭساۋلە اگەنقىزى يە بولدى.
اۋەلدە اقىندار ءۇشىن 6 جۇلدە عانا تاعايىندالىپتى. قازىلاردىڭ شەشىمىمەن تاعى قوسىمشا 3 جۇلدە قوسىلعان. اكىمدىكتەن بولىنگەن قاراجاتتان بولەك دەمەۋشىلەردەن دە قولداۋ بولعان. ۇيىمداستىرۋشىلار نۇرگەلدى ومارحانوۆقا, بەكزات قومار ۇلىنا جانە «Exim Artis» كومپانياسىنا العىس ءبىلدىردى.
كەش بارىسىندا ارقانىڭ تانىمال انشىلەرى مەدەت وساتاەۆ, ارايلىم جۇكەنوۆا, سايان بودەس, نياز قانافيا, نۇربەك شابان اننەن شاشۋ شاشتى.
قاراعاندى وبلىسى