«ارسەلورميتتال تەمىرتاۋ» اق ءالى دە الاڭسىز. وتكەندە عانا شاحتاسىنان ءورت شىعىپ, بەس كەنشى قازا تاۋىپ, ۇلكەن سىنعا ۇشىراعان ەدى. انەۋگۇنى تاعى دا سارانداعى شاحتاسىنان ءورت شىقتى. ابىروي بولعاندا جەر استىنداعى كەنشىلەر امان. ال الپاۋىت كومپانيانىڭ مىنا جاۋاپسىزدىعى كاسىپورىن يەلەرىنىڭ جۇيكەسىنە اسا قاتتى ءتيىپ تۇر. «امت» وتاندىق كاسىپورىندارعا قارىزىن وتەمەي, قاشىپ وتىر. قارىز سوماسى – 2 ملرد 610 ملن تەڭگە. مۇنىڭ سالدارى 500 جۇمىسكەردىڭ ءۇش ايدان بەرى جالاقى الماعانىنا الىپ كەلدى. زاۋىت جۇمىسى توقتاپ, 200-گە جۋىق ادام جۇمىسسىز قالدى. بۇعان باسى اۋىرىپ, بالتىرى سىزداعان الگى كومپانياڭىز ەمەس.
2022 جىلى 17 تامىزدا «مايقۇدىق قق ء«سۇ» جشس مەن «ارسەلورميتتال تەمىرتاۋ» اق اراسىندا №4600025567 كەلىسىمشارت جاسالعان. سول ۋاقىتتان بەرى «KAZ فەرريت» جشس وندىرىلگەن كومىر كونتسەنتراتىن «ارسەلورعا» وسى كەلىسىمشارت شەڭبەرىندە جونەلتىپ وتىردى. بىراق «ارسەلور» تاراپىنان كونتسەنتراتتىڭ ساپاسى, جەتكىزۋ مەرزىمى نەمەسە شارتتىڭ باسقا تالاپتارى بويىنشا بىردە-ءبىر ەسكەرتۋ بولماعان. كەلىسىمشارتتىڭ مەرزىمى – بيىل 31 جەلتوقسانعا دەيىن. بۇعان قاراماستان الپاۋىت كومپانيا كونتسەنترات الۋدى ماۋسىم ايىنان باستاپ ەش سەبەپسىز, ءتۇسىندىرۋسىز توقتاتقان.
– بيىل شىلدە ايىنان باستاپ كاسىپورىن قىزمەتىن توقتاتۋعا ءماجبۇر بولدى. بارلىق ۇجىم اقىسىز ەڭبەك دەمالىسىنا جىبەرىلدى. زاۋىتتىڭ جابىلۋى 200-دەن اسا جۇمىسكەر مەن ولاردىڭ وتباسىلارىنىڭ ماتەريالدىق ءال-اۋقاتىنا كەرى اسەرىن تيگىزەدى, كوپتەگەن جۇمىسشىنىڭ نەسيەلەرى بار. بۇل جاعداي فابريكا جۇمىسىن توقتاتۋعا, سالىق اۋدارىمدارىن كەشىكتىرۋگە, جۇمىسسىزدىققا الىپ كەلدى, – دەيدى «Kaz فەرريت» جشس ديرەكتورى بەكجان ومىربەك ۇلى.
ال «اقتاس كومىر» جشس ديرەكتورى نۇرىم بولات ۇلى «الپاۋىت كومپانياعا قىلار قايرانىمىز جوق», دەيدى. ۇكىمەت باسىنداعىلار ءۇن قاتسا دەگەن ءۇمىتى بار.
– 2021 جىلى قىركۇيەك ايىندا ليتسەنزيا العانبىز. سودان بەرى اتالعان كومپانيالارمەن جۇمىس ىستەپ كەلدىك. بيىل ماۋسىمدا «ارسەلورميتتال تەمىرتاۋ» اق-دان شوتىمىزعا اقشا ءتۇسۋ توقتادى. سودان ءبىز دە شىلدە ايىنان باستاپ جۇمىستى توقتاتۋعا ءماجبۇر بولدىق. جۇمىسكەرلەرگە 10 ملن تەڭگەگە جۋىق جالاقى قارىزبىز. 800 ملن تەڭگە مەردىگەرلەرگە بەرەشەكپىز. تاسىمالداۋشى كومپانيالارعا 60-70 ملن قارىزبىز. جۇمىسكەرلەرىمىز 10 ماۋسىمنان باستاپ ەڭبەكاقى العان جوق. كاسىپورىن بولعان سوڭ, جۇمىستى كىدىرتۋگە تاعى بولمايدى. جۇمىسكەرلەردى جۇمىسقا شاقىرىپ الامىز. تولەۋگە ۋادە بەرىپ, الايدا اقشا جوق. ءبىز كومىر شىعارامىز. ال «KAZ فەرريت» كوكس وندىرەدى. ءبىزدىڭ وزىمىزگە قازىر 1 ملرد تەڭگە قارىز, – دەيدى «اقتاس كومىر» جشس ديرەكتورى نۇرىم باباس.
«ارسەلورميتتال تەمىرتاۋ» اق قازىر شەتەلدەن كومىر كونتسەنتراتىن ساتىپ الىپ وتىر. ال ساپاسى جوعارى, قاجەتتى كولەمدە ءونىم شىعاراتىن وتاندىق زاۋىتتى ەلەپ تە وتىرعان جوق. بۇعان قوسا 33 مىڭ توننا كونتسەنتراتتى ساتىپ العانى ءۇشىن 2 ملرد 610 ملن تەڭگەنىڭ ءوزىن وتەمەگەن.
– «امت» اق تاۋار جەتكىزىلگەن كۇننەن باستاپ 25 كۇنتىزبەلىك كۇن ىشىندە تولەم جۇرگىزۋگە مىندەتتى. الايدا جونەلتكەن ءونىمىمىزدىڭ اقشاسىن الا الماي وتىرمىز. ەسەسىنە مەردىگەرلەرگە, جۇمىسكەرلەرگە, مەملەكەتكە قارىزبىز. كوبى ۋاقىتشا اقىسىز دەمالىسقا كەتسە, ەندى بىرەۋلەرى جۇمىستان شىعىپ جاتىر. ءبىز ءوز تاراپىمىزدان «ارسەلورعا» جۇما سايىن حات جازامىز. الايدا ءالى كۇنگە دەيىن ماردىمدى جاۋاپ كەلمەدى. سەبەبى دە تۇسىنىكسىز. جۇمىسىمىزدا كىدىرىس بولعان ەمەس. 60 مىڭ تونناعا جۋىق كومىر جەتكىزىلدى. قالعان 33 مىڭ توننا كومىردىڭ قاراجاتى الاشاق كۇيىندە تۇر, – دەيدى «مايقۇدىق» قق ء«سۇ» جشس بۇرىنعى ديرەكتورى سۆەتلانا بوجيەۆا.
ايتا كەتەيىك, «مايقۇدىق قق ء«سۇ» – بىلتىر ءوڭىر بويىنشا «سەنىمدى سالىق تولەۋشى» جانە «سەنىمدى ءوندىرۋشى» اتالىمدارى بويىنشا ۇزدىك دەپ تانىلعان كومپانيا.
قىسقاسى, كاسىپورىن ۇجىمى مەملەكەتتىڭ بۇل جاعدايعا شۇعىل ارالاسقانىن وتىنەدى. ۇكىمەت وتاندىق ءوندىرىس ورىندارىن قولدايدى دەگەن ءۇمىت بار. الدە «ارسەلورعا» ۇكىمەتتىڭ ءامىرى جۇرمەي مە؟
ءبىز ءوز كەزەگىمىزدە وسى جاعدايعا بايلانىستى «ارسەلورميتتال تەمىرتاۋ» كومپانياسىنىڭ ءباسپاسوز قىزمەتىنە سۇراۋ سالعانبىز, ادەتتەگىدەي جاۋاپ كەشىگىپ جاتىر...
قاراعاندى وبلىسى