اينالاسى ون كۇن ءوتتى, وتكەندەگى «قازاقستان» شاحتاسىنداعى اپاتتى جاعدايدان كەيىن تاعى دا «ارسەلورميتتال تەمىرتاۋ» اق كومپانياسىنا تيەسىلى «ساران» شاحتاسىنان ءورت شىقتى. كەنشىلەر امان. ال الپاۋىت كومپانيا قاۋىپسىزدىك شارالارىنا كەلگەندە ءالى دە قامسىز, الاڭسىز سەكىلدى...
كومپانيانىڭ ءباسپاسوز قىزمەتى اتالعان شاحتادان ءتىلسىز جاۋ تۇندە شىققانىن, ارنايى قۇتقارۋ توبى جەدەل قيمىلداپ, جەر استىنداعى كەنشىلەردى امان-ەسەن الىپ شىققانىن حابارلادى.
«27 تامىز كۇنى ساعات 01.55-تە «ساران» شاحتاسىنان ءورت شىعىپ, اپاتتى جويۋ جوسپارى ەنگىزىلدى. ءورت ءسوندىرىلدى. بارلىق جۇمىسشى جەر بەتىنە شىقتى. زارداپ شەككەندەر جوق, سەبەپتەرى مەن ءمان-جايى انىقتالىپ جاتىر», دەپ مالىمدەدى «ارسەلورميتتال تەمىرتاۋ» اق ءباسپاسوز قىزمەتى.
ءورت ورىن العان ءتۇنى ساران شاحتاسىندا 187 ادام جۇمىس ىستەپ جاتقان. ءتورت كەنشى كەنشاردا بولعان. بۇگىندە ءورتتىڭ شىعۋ سەبەپتەرى انىقتالىپ جاتىر. ءتىلسىز جاۋ سول كۇنى ساعات 04.00-دە اۋىزدىقتالعان.
وتكەن جەكسەنبى كەنشىلەر كۇنى ەدى. بىراق بۇل مەرەكە بيىل ءسان-سالتاناتىمەنەن اتالىپ وتپەدى. «قازاقستان» شاحتاسىنداعى قايعىلى جاعدايعا بايلانىستى وبلىس اكىمدىگى وڭىردەگى سالتاناتتى ءىس-شارالاردى توقتاتقان ەدى.
قاراعاندى وبلىسى