قۇقىق بۇزۋشىلىقتىڭ الدىن الىپ, قىلمىستىق ءىستى اشكەرە ەتۋدە بەينەباقىلاۋ كامەرالارىنىڭ پايداسى زور بولىپ تۇر.
وسى ماقساتتا قاراعاندى وبلىسىندا «قاۋىپسىز قالا» جوباسى اياسىندا قوسىمشا 133 بەينەباقىلاۋ كامەراسى ورناتىلادى. جوبانى وبلىستىق اقپاراتتاندىرۋ, مەملەكەتتىك قىزمەتتەر كورسەتۋ جانە ارحيۆتەر باسقارماسى پوليتسيا دەپارتامەنتىمەن بىرلەسىپ جۇزەگە اسىرىپ كەلەدى. جىلعا جوسپارلانعان «قاۋىپسىز قالا» جوباسى 2021 جىلى ىسكە قوسىلدى. بۇگىندە 2 859 كامەرا مەن 110 اپپاراتتىق-باعدارلامالىق كەشەن ورناتىلعان.
«بيىل اۋدان اكىمدەرىنەن جانە تۇرعىنداردان قوسىمشا كامەرالار مەن اپپاراتتىق-باعدارلامالىق كەشەن ورناتۋعا سۇرانىس پايدا بولدى. ءبىز جاڭا باعدارلامانى اكىمشىلىك پوليتسيا باسقارمالارى, قاراعاندى وبلىسى پوليتسيا دەپارتامەنتىنىڭ جەرگىلىكتى پوليتسيا قىزمەتى جانە قاراعاندى قالاسى پوليتسيا باسقارماسىمەن كەلىستىك. شىلدە ايىندا 24 جىلدامدىق ولشەگىش پەن 133 بەينەباقىلاۋ كامەراسىن ورناتۋعا قاراجات ءبولىندى», دەيدى «قاۋىپسىز قالا» جوباسىنىڭ مەنەدجەرى پاۆەل ورتنەر.
قوسىمشا 133 قاۋىپسىزدىك كامەراسى تامىز ايىنىڭ سوڭىنا دەيىن ورناتىلماق. بۇل – ستاتيكالىق كامەرالار. ماماندار «قۇرىلعىلار سۋرەتكە ساپالى تۇسىرەدى» دەيدى.
تامىز ايىندا قوسىمشا اپپاراتتىق-باعدارلامالىق كەشەن ىسكە قوسىلدى. قاراعاندى, تەمىرتاۋ جانە ساران قالالارىندا جاڭا جىلدامدىق ولشەگىشتەر پايدا بولدى. اپپاراتتىق-باعدارلامالىق كەشەن العاش رەت شاحتينسك قالاسىندا ورناتىلدى. تۇرعىنداردىڭ ءوتىنىشى بويىنشا جول قوزعالىسى ەرەجەلەرىن تىركەۋدىڭ تاعى ءبىر قۇرالى اباي اۋدانىنداعى دۋبوۆكا اۋىلىنىڭ ماڭىنا قويىلدى. «سونىڭ ناتيجەسىندە بۇل جول ۋچاسكەسىندە جول قوزعالىسى ەرەجەلەرىن بۇزۋ فاكتىلەرى كۇرت تومەندەدى», دەيدى پ.ورتنەر.
قاراعاندى وبلىسى