انتيكوررۋپتسيالىق قىزمەت تەرگەپ جاتقان قىلمىستىق ىستەردى جەدەل سۇيەمەلدەۋ اياسىندا سوت تورەلىگىن ىسكە اسىرۋ جونىندەگى قىزمەتكە ارالاسۋعا باعىتتالعان اسا اۋىر جەمقورلىق قىلمىستار جاسالىنعانى انىقتالدى, دەپ حابارلايدى Egemen.kz.
سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز قىزمەتى حابارلاعانداي, جاسىرىن ءىس-شارالار كەشەنىنىڭ ناتيجەلەرى بويىنشا پارا بەرۋگە وقتالعان قر مادەنيەت جانە سپورت ەكس-ءمينيسترى ا.مۇحامەدي ۇلىنىڭ جۇبايى اشكەرەلەندى. Cونداي-اق اتالعانداردىڭ مۇددەلەرىن قورعاۋدى جۇزەگە اسىرعان ادۆوكات الاياقتىق پەن پارا بەرۋگە يتەرمەلەۋ كۇدىگىمەن ۇستالدى.
«ا.مۇحامەدي ۇلىنىڭ قىلمىستىق جازاسىن جەڭىلدەتۋ جانە قاماۋدان بوساتۋ سىلتاۋىمەن قورعالۋشىنىڭ جۇبايىنان سوت ورگاندارىنىڭ لاۋازىمدى ادامدارىنا بەرۋ ءۇشىن پارا رەتىندە 460 000 اقش دوللارى سوماسىندا اقشالاي قاراجات العان. تەرگەۋ امالدارى بارىسىندا 255 000 اقش دوللارى كولەمىندەگى قاراجات انىقتالىپ, تاركىلەندى. قالعان سومانى ول ءوز قالاۋى بويىنشا جۇمساعانى انىقتالدى. سونىمەن بىرگە استانا قالاسىنىڭ قىلمىستىق ىستەر جونىندەگى اۋدانارالىق سوتىنىڭ ۇكىمىمەن ا.مۇحامەدي ۇلى 8 جىلعا باس بوستاندىعىنان ايىرىلدى», دەلىنگەن حابارلامادا.
ەكس-ءمينيستردىڭ وكىلى ۇستالىپ, ۋاقىتشا ۇستاۋ يزولياتورىنا قامالدى.
مۇحامەدي ۇلىنىڭ جۇبايى اسا ءىرى كولەمدە پارا بەرۋگە وقتالۋى بويىنشا كۇدىكتى بولىپ تانىلدى.
قر قپك 201-بابىنا سايكەس, تەرگەۋ مۇددەسىنە وراي وزگە اقپارات جاريالاۋعا جاتپايدى.
كونستيتۋتسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروتسەستىك كودەكسىنىڭ 19-بابى 1-بولىگىنە سايكەس, قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى.