استانادا ءوتىپ جاتقان حالىقارالىق ەرىكتىلەر فورۋمىنىڭ العاشقى سەسسياسىندا پارلامەنت سەناتىنىڭ دەپۋتاتى نۇرتورە ءجۇسىپ سەنات توراعاسى ماۋلەن اشىمباەۆتىڭ قۇتتىقتاۋ حاتىن وقىپ, سالەمىن جەتكىزدى, دەپ حابارلايدى Egemen.kz.
مەملەكەت باسشىسى قاسىم-جومارت توقاەۆتىڭ باستاماسىمەن قازاقستاندا 2020 جىلى «ەرىكتىلەر جىلى» دەپ جاريالاندى. ناتيجەسىندە قايىرىمدىلىق سالاسىندا جاڭا جوبالار قولعا الىنىپ, ىسكە اسىرىلا باستادى. بۇگىنگى فورۋم دا سونىڭ ايقىن ناتيجەسى.
وسى تۇستا نۇرتورە ءجۇسىپ پاندەميا كەزىندە الەمنىڭ تۇكپىر-تۇكپىرىندە مۇقتاجدارعا كومەك قولىن سوزا بىلگەن ەرىكتىلەردىڭ ەرەكشە جۇمىسىنا ءتانتى بولعانىن جاسىرمادى.
«ەرىكتىلەر دارىگەرلەرگە, ءتارتىپ ساقشىلارىنا, مۇقتاج وتباسىلارعا كومەكتەستى. ىندەتپەن كۇرەستىڭ الدىڭعى شەبىندە ءجۇردى دەۋگە بولادى. ۋاقىت وتكەن سايىن قازاقستاندا ەرىكتىلەر قىزمەتىنىڭ اياسى كەڭەيىپ كەلەدى. بىلتىر ەلىمىزدە وتكەن الەمدىك ءداستۇرلى دىندەر ليدەرلەرىنىڭ 7-سەزىندە دە ۆولونتەرلەر ۇلكەن قىزمەت كورسەتكەنىن بىلەمىز. سول اۋقىمدى ءىس-شاراعا 500-دەن استام ەرىكتى قاتىسىپ, ۇلكەن ۇلەس قوستى», دەدى سەناتور.