ەلىمىزدە ماۋسىمنىڭ əر ءۇشىنشى جەكسەنبىسى – مەديتسينا قىزمەتكەرلەرىنىڭ كۇنى. وسى اتاۋلى كۇنى ادام جانىنىڭ اراشاشىسى, اق حالاتتى ابزال جاندارعا ارنايى قۇرمەت كورسەتىلىپ, ەڭبەكتەرى ەرەكشە ەلەنەدى, دەپ جازادى Egemen.kz.
بۇل مەرەكە 1998 جىلدان بەرى پرەزيدەنت بەكىتكەن جارلىق بويىنشا جىل سايىن ماۋسىمنىڭ ءۇشىنشى جەكسەنبىسىندە اتاپ وتىلەدى.
وسىعان وراي بۇگىن مەملەكەت باسشىسى ەلىمىزدىڭ مەديتسينا قىزمەتكەرلەرىن كاسىبي مەرەكەسىمەن قۇتتىقتادى.
«مەديتسينا قىزمەتكەرلەرىن كاسىبي مەرەكەسىمەن قۇتتىقتايمىن! سىزدەر ءوز مىندەتتەرىڭىزدى ابىرويمەن اتقارىپ, ەل قۇرمەتىنە بولەنىپ جۇرسىزدەر. ۇلت ساۋلىعى – باستى بايلىعىمىز. مەملەكەت دەنساۋلىق ساقتاۋ سالاسىنا ءاردايىم ەرەكشە نازار اۋدارىپ, دارىگەرلەرگە ۇنەمى قولداۋ كورسەتەدى», دەلىنگەن پرەزيدەنتتىڭ قۇتتىقتاۋ حابارلاماسىندا.
سونداي-اق دەنساۋلىق ساقتاۋ ءمينيسترى اجار عينيات ەلىمىزدىڭ مەديتسينا قىزمەتكەرلەرىن قۇتتىقتادى.
ايتا كەتەيىك, بيىل اباي وبلىسىنداعى ءورت وقيعاسىنا بايلانىستى بۇل مەرەكەنى اتاپ ءوتۋ كەيىنگە شەگەرىلدى. دەنساۋلىق ساقتاۋ مينيسترلىگىنەن مالىمدەگەندەي, «DENI SAU ULT» ءسامميتىن وتكىزۋ جانە جىل سايىنعى «ALTYN SHIPAGER» ۇلتتىق مەديتسينالىق جۇلدەسىن تابىستاۋ كەيىنگە قالادى.