ءوڭىر تۇرعىندارىنىڭ ءدىني ساۋاتتىلىعىن ارتتىرۋ ماقساتىندا جامبىل وبلىسى اكىمدىگىنىڭ ءدىن ىستەرى باسقارماسى ءدىن سالاسىندا جۇمىس اتقاراتىن ماماندارعا ارنالعان وقىتۋ سەمينارىن وتكىزدى, دەپ حابارلايدى Egemen.kz.
ەكى كۇنگە سوزىلعان سەمينارعا ءدىن سالاسىنداعى اقپاراتتىق-ءتۇسىندىرۋ توپتارىنىڭ مۇشەلەرى, مەملەكەتتىڭ ءدىن سالاسىنداعى ساياساتىن ىسكە اسىرۋعا جانە ءدىني ەكسترەميزم مەن تەرروريزمنىڭ الدىن الۋعا مۇددەلى جەرگىلىكتى اتقارۋشى ورگاندار مەن قۇقىق قورعاۋ ورگاندارىنىڭ قىزمەتكەرلەرى, ارنايى جانە جالپى ءبىلىم بەرۋ ۇيىمدارىنىڭ مۇعالىمدەرى, ءدىني بىرلەستىكتەردىڭ وكىلدەرى قاتىسىپ, 200-گە جۋىق ادام قامتىلدى.
سەمينارعا «نۇر-مۇباراك» ەگيپەت يسلام مادەنيەتى ۋنيۆەرسيتەتى, «اقنيەت» اقپاراتتىق-ناسيحاتتاۋ جانە وڭالتۋ ورتالىعى» قوعامدىق قورىنىڭ ءدىنتانۋشىلارى مەن وقىتۋشىلارى, پسيحولوگتار, بلوگەرلەر قاتىسىپ, سالاداعى ەڭ وزەكتى تاقىرىپتاردا ءدارىس وقىدى. دەسترۋكتيۆتى ءدىني اعىمداردىڭ ارباۋ جولدارى مەن ولاردان تونەتىن قاۋىپ-قاتەر ماسەلەسىنە قاتىستى ايتىلعان پايىمدى پىكىرلەر كوپتىڭ كوكەيىنە قوندى. سونداي-اق تۇرعىنداردى, اسىرەسە جاستاردى جات اعىم قۇرساۋىنان ساقتاۋ ماسەلەسى دە اڭگىمە ارقاۋىنا اينالدى.
ءىس-شاراعا ارنايى شاقىرىلعان Sمم ماماندارى دا كوكەيكەستى ويلارىن ورتاعا سالدى. لەكتورلاردىڭ دارىستەرى تىڭدالعاننان كەيىن قاتىسۋشىلار سۇراقتارىن قويىپ, ماماندار تاراپىنان مازمۇندى جاۋاپ الدى.
سەمينارعا قاتىسۋشىلار جەرگىلىكتى اتقارۋشى جانە قۇقىق قورعاۋ ورگاندارىمەن بىرلەسە وتىرىپ, دەسترۋكتيۆتى ءدىني اعىمداردىڭ الدىن الۋدا جۇدىرىقتاي جۇمىلۋعا ۋاعدالاستى. اقپاراتتىق-ناسيحاتتىق توپتاردىڭ جۇمىسىن جانداندىرۋدى ءبىراۋىزدان ماقۇلدادى. سەمينار سوڭىندا قاتىسۋشىلارعا سەرتيفيكاتتار تابىستالدى.