قازاقستان دامۋ بانكى «KEGOC» اق ەلەكتر جەلىلەرىن باسقارۋ كومپانياسىنا وبليگاتسيالىق قارىز ءبولدى. جالپى سوماسى 10 ملرد تەڭگەنى قۇرايتىن قاراجاتتى قارىز الۋشى ەلىمىزدىڭ بىرىڭعاي ەنەرگوجۇيەسىنىڭ باتىس ايماعىنىڭ جوعارى ۆولتتى جەلىلەرىن رەكونسترۋكتسيالاۋعا جانە ەلەكتر جەلىسىن نىعايتۋعا باعىتتاماق.
جوبا تۇتىنۋشىعا ەلەكتر ەنەرگياسىن ۇزدىكسىز جانە قاۋىپسىز جەتكىزۋ, قورشاعان ورتاعا لاستاعىش زاتتار مەن تەحنيكالىق شىعارىندىلاردى ازايتۋ, سونداي-اق ەلەكتر ەنەرگياسىن تۇتىنۋدى جىلىنا 4,392 ملن كيلوۆاتت-ساعاتقا قىسقارتۋ سىندى ماڭىزدى الەۋمەتتىك اسەر بەرەدى. سونىمەن قاتار قۇرىلىس كەزەڭىندە جەرگىلىكتى ماماندار ءۇشىن 450-دەن استام جۇمىس ورنى قۇرىلادى. اۋەلىك ەلەكتر جەتكىزۋ جەلىلەرىن رەكونسترۋكتسيالاۋ ەلەكتر جەلىلەرىنىڭ تۇراقتى جۇمىس ىستەۋىن قامتاماسىز ەتەدى.
«جوبا رەسپۋبليكامىزدىڭ باتىس وڭىرىندە تۇتىنۋشىلاردى ەلەكترمەن جابدىقتاۋدىڭ وتكىزگىشتىگى مەن بەرىكتىگىن ارتتىرۋعا مۇمكىندىك بەرەدى. سونداي-اق جەلى شىعىندارىن ازايتۋعا كومەكتەسىپ, تۇتاستاي ەنەرگيا جۇيەسىنىڭ تيىمدىلىگىن ارتتىرادى», دەيدى «قازاقستان دامۋ بانكى» اق باسقارما توراعاسى نۇرلان بايبازاروۆ.
بۇل جۇمىستى قارجىلاندىرۋ ءۇشىن بانك جاقىندا KASE بيرجاسىندا دەبيۋتتىك «جاسىل» وبليگاتسيالاردى ورنالاستىرۋدان تارتىلعان قاراجاتتى پايدالانادى. قدب KASE-دە 30 ناۋرىزدا وتكەن ساۋدا-ساتتىقتا KEGOC-تىڭ «جاسىل» وبليگاتسيالارىن ساتىپ الدى. وسىلايشا, وبليگاتسيالار مەن ولاردى ورنالاستىرۋدان تۇسكەن قاراجات جوبانى قارجىلاندىرۋعا تىكەلەي جۇمسالاتىن بولدى. بۇل – وبليگاتسيالىق قارىز تۇرىندە قۇرىلىمدالعان قدب-نىڭ العاشقى مامىلەسى.
«KEGOC» اق «قازاقستان قور بيرجاسى» اق (KASE) ساۋدا الاڭىندا جىلىنا 19,51% وتەۋگە ورتاشا الىنعان كىرىستىلىكپەن جالپى كولەمى 16,9 ملرد تەڭگە بولاتىن «جاسىل» وبليگاتسيالارىن ءساتتى ورنالاستىردى. باعالى قاعازداردى وتەۋ مەرزىمى 2037 جىلعا دەيىنگى «KEGOC» اق وبليگاتسيالارىنىڭ ەكىنشى شىعارىلىمى شەڭبەرىندە ورنالاستىرىلدى. سۇرانىس پەن ۇسىنىستىڭ اراقاتىناسى – 84,8%, بۇل ينۆەستورلاردىڭ «KEGOC» اق-نىڭ «جاسىل» وبليگاتسيالارىنا دەگەن قىزىعۋشىلىعىنىڭ ارتقانىن كورسەتەدى. «جاسىل» وبليگاتسيالاردى شىعارۋ شەڭبەرىندە ەلىمىزدىڭ ءبىرتۇتاس ەلەكتر ەنەرگەتيكالىق جۇيەسىنىڭ وپەراتورى جاسىل قارجى ورتالىعىنان (AIFC Green Finance Centre) ICMA جاسىل وبليگاتسيالار قاعيداتتارىنا سايكەستىك تۋرالى سىرتقى باعاسىن (Second Party Opinion) الدى.
قدب-دەن باسقا, جوباعا بىرلەسكەن ينۆەستور رەتىندە ەۋروپا قايتا قۇرۋ جانە دامۋ بانكى قاتىسادى. بۇل بىرلەسكەن جوبا وتاندىق ينفراقۇرىلىمدى دامىتۋعا شەتەلدىك ينۆەستيتسيالاردى تارتۋ الەۋەتىن كورسەتەدى. قدب كۆازيمەملەكەتتىك سەكتوردىڭ جوبالارىن باسقا كرەديتورلارمەن بىرلەسىپ, تەك قانا سينديكاتتالعان نەمەسە بىرلەسكەن قارجىلاندىرۋ شارتتارىمەن, جوبالار ESG قاعيداتتارىنا سايكەس كەلگەن جاعدايدا قارجىلاندىرادى.
«KEGOC» اق ۇلتتىق ەلەكتر تورابىنىڭ (ۇەت) اكتيۆتەرىنە يەلىك ەتىپ, باسقارادى. قىزمەتتىڭ نەگىزگى تۇرلەرى تابيعي مونوپوليالار سالاسىنا جاتادى. كومپانيانىڭ بالانسىندا ۇەت-تى قۇرايتىن ۇزىندىعى شامامەن 27 000 كم بولاتىن, كەرنەۋى 220-1150 كۆ ەلەكتر جەتكىزۋ جەلىلەرى جانە ترانسفورماتورلارىنىڭ بەلگىلەنگەن قۋاتى 38,99 گۆا بولاتىن 82 قوسالقى ەلەكتر ستانساسى بار. جۋىردا كومپانيا وتكەن جىلدىڭ ناتيجەلەرىن تالقىلاپ, بيىلعا ارنالعان نەگىزگى مىندەتتەرىن بەلگىلەدى. ءبىرتۇتاس ەلەكتر ەنەرگەتيكالىق جۇيەسىنىڭ وپەراتورى وندىرىستىك مەجەنى ورىنداۋ, ينۆەستيتسيالىق جوبالاردى مەرزىمىندە ىسكە اسىرۋ, قىزمەتكەرلەر ءۇشىن قاۋىپسىز ەڭبەك جاعدايلارىن جاساۋ, ءال-اۋقاتتى ارتتىرۋ باعىتىنداعى بەلگىلەنگەن بارلىق جوسپارىن ويداعىداي ىسكە اسىردى. KEGOC «تۇركىستان قالاسىن سىرتقى ەلەكترمەن جابدىقتاۋ سحەماسىن كۇشەيتۋ» جوباسى شەڭبەرىندە كەرنەۋى 220 كۆ «ورتالىق» قوسالقى ستانساسىنىڭ قۇرىلىسىن اياقتادى; حالىقارالىق قايتا قۇرۋ جانە دامۋ بانكىنە 46,3 ملن تەڭگە كولەمىندەگى قارىز مەرزىمىنەن بۇرىن قايتارىلدى; ينۆەستيتسيالىق جوبالاردى ىسكە اسىرۋ ءۇشىن «جاسىل» وبليگاتسيالار ءساتتى ورنالاستىرىلدى. ەنەرگەتيكا مينيسترلىگى وكىلدەرىنىڭ, «سامۇرىق-قازىنا» اق كومپانيالار توبىنىڭ HSE سالاسىنداعى باسشىلارى مەن ساراپشىلارىنىڭ, سونداي-اق تمد ەلدەرى كومپانيالارىنىڭ قاتىسۋىمەن ەڭبەك قاۋىپسىزدىگى جانە ەڭبەكتى قورعاۋ جونىندەگى ءبىرىنشى فورۋمى وتكىزىلدى. كومپانيا ءوز قىزمەتكەرلەرىنىڭ دەنساۋلىعىن ەرىكتى مەديتسينالىق ساقتاندىرۋ باعدارلاماسىن, سونداي-اق جەڭىلدەتىلگەن پايىزدىق مولشەرلەمە بويىنشا بانكتىك قارىز بەرۋ ارقىلى جوعارى بىلىكتى كادرلاردى تارتۋ ءۇشىن جەڭىلدەتىلگەن نەسيەمەن باسپانا ساتىپ الۋ باعدارلاماسىن ىسكە قوستى.
بيىل «قازاقستان بەج وڭتۇستىك ايماعىنىڭ ەلەكتر جەلىسىن كۇشەيتۋ» جانە «باتىس قازاقستاننىڭ ەنەرگوجۇيەسىن قازاقستان بەج-مەن بىرىكتىرۋ» جوبالارى بويىنشا جۇمىس جالعاسادى. سونىمەن قاتار كومپانيانى قور نارىعىنا (IPO) شىعارۋدى قامتاماسىز ەتۋ, ESG-رەيتينگىن الۋ, سونداي-اق كومپانيا قىزمەتكەرلەرىنىڭ ءال-اۋقاتىن ارتتىرۋ بويىنشا جوسپارلانعان ءىس-شارالاردى جۇزەگە اسىرماق.
كومپانيانىڭ باسقارما توراعاسى قانىش مولداباەۆتىڭ ايتۋىنشا, اتقارىلعان ءىس-شارالار قىزمەتكەرلەردى ىنتالاندىرۋعا, ولاردىڭ ءال-اۋقاتىن ارتتىرۋعا, سونداي-اق كومپانياداعى كورپوراتيۆتىك مادەنيەت پەن الەۋمەتتىك تۇراقتىلىقتىڭ جوعارى دەڭگەيىن قولداۋعا قوسىمشا سەرپىن بەردى. ۇيلەسىمدى جۇمىستىڭ ارقاسىندا «KEGOC» اق الداعى ۋاقىتتا كۇردەلى تەحنيكالىق جانە تەحنولوگيالىق مىندەتتەردى شەشۋگە دايىن ەكەندىگىن جەتكىزىپ وتىر.