اتىراۋ تۇرعىندارى كوشەدەگى وتكىر يىسكە شاعىمدانىپ وتىر, دەپ حابارلايدى Egemen.kz «موي گورود»باسىلىمىنا سىلتەمە جاساپ.
باسىلىم مالىمەتىنشە, كەشە ساعات 18.00-دەن باستاپ بىرتە-بىرتە قالانىڭ بارلىق اۋدانىن ءتۇتىن باسقان. بۇعان قامىستىڭ ورتەنۋى سەبەپ بولعان. وبلىستىق توتەنشە جاعدايلار دەپارتمەنتىنىڭ ورتسوندىرۋشىلەرى وقيعا ورنىنا جەتكەنى حابارلاندى.
«ساعات 9:12-دە دامبى اۋىلىنان 30 شاقىرىم جەردە, كاسپي تەڭىزى جاعالاۋىندا, «اقجايىق» رمك اۋماعىندا قامىس ورتەندى. جانۋ اۋماعى - 85 گەكتار. توتەنشە جاعدايلار دەپارتمەنتى «اق جايىق» رمك قىزمەتكەرلەرىمەن بىرلەسىپ, 80 گەكتار اۋماقتاعى جالىندى اۋىزدىقتادى», دەدى ۆەدومستۆو وكىلى.