پرەزيدەنت جاڭا سايلانعان دەپۋتتاردىڭ جەمىستى قىزمەت ەتەتىنىنە سەنىم ءبىلدىردى, دەپ حابارلايدى Egemen.kz.
مەملەكەت باسشىسى دەپۋتاتتاردىڭ ەل الدىنداعى جاۋاپكەرشىلىگىن ەسكە سالىپ, ولاردىڭ الداعى 5 جىل ىشىندە حالىقتىڭ كوڭىلىنەن شىعاتىنداي ءىس اتقاراتىنىنا سەنىم ءبىلدىردى.
«اقپاراتتىق تەحنولوگيا دامىعان قازىرگى زاماندا حالىق ءبارىن ءجىتى باقىلاپ وتىر. وسى رەتتە, دەپۋتاتتاردىڭ ەل الدىنداعى جاۋاپكەرشىلىگى ارتقانىن اتاپ وتكەن ءجون. سوندىقتان وسى عيماراتتا وتىرعان دەپۋتاتتار 5 جىل بويى سانالى, پاراساتتى تۇردە بەلسەندى جۇمىس ىستەيدى دەپ سەنەمىن. سەبەبى ەل مۇددەسى ءۇشىن قىزمەت ەتۋ قاجەت. بۇل – «مەملەكەتتىك بيلىكتىڭ بىردەن-ءبىر باستاۋى – حالىق» دەگەن قاعيدانىڭ تاعى ءبىر كورىنىسى», دەدى قاسىم-جومارت كەمەل ۇلى.
پرەزيدەنت وسى ناۋقانعا ازاماتتاردىڭ بەلسەندى اتسالىسقانىن اتاپ ءوتتى جانە سايلاۋدا جەڭىسكە جەتۋ ءۇشىن جۇيەلى ستراتەگيانىڭ ماڭىزدى بولعانىن ايتتى.
«وسى ناۋقانعا وتە كوپ ادام قاتىستى. بۇل – قالىپتى ءۇردىس. ولاردىڭ اراسىندا ماقساتى, ۇستانىمى ءارتۇرلى جاندار بار. قازىر ەلدىڭ كوزى اشىق, كوكىرەگى وياۋ, ساياسي ساۋاتى جوعارى. كەز-كەلگەن سايلاۋدا جەڭىسكە جەتۋ ءۇشىن جىلدار بويى قاجىرلى ەڭبەك ەتۋ قاجەت. حالىقتىڭ جانە تاريحتىڭ الدىنداعى جاۋاپكەرشىلىكتى سەزىنۋ كەرەك. ءبىر سوزبەن ايتساق, ۇزاق مەرزىمدى, جۇيەلى ستراتەگيانىڭ ارقاسىندا عانا جەڭىسكە جەتۋگە بولادى», دەدى مەملەكەت باسشىسى.
سونداي-اق سايلاۋعا ءتۇسىپ دەپۋتات بولا الماعان كانديداتتاردىڭ بەلسەندىلىگى ۇلكەن تاجىريبە ەكەنىن اتاپ ءوتتى.
«قاجەتتى داۋىس جيناي الماعان ۇمىتكەرلەر ءۇشىن دە بۇل – ۇلكەن تاجىريبە جانە جاڭا مۇمكىندىك. بارشاڭىزدى قازاقستان مۇددەسى ءۇشىن جۇمىلىپ جۇمىس ىستەۋگە شاقىرامىن», دەدى توقاەۆ.