ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا زەينەت جاسىنداعى قىزمەتكەرلەردىڭ جۇمىسىن جالعاستىرۋ مۇمكىندىگىنە قاتىستى پىكىر ءبىلدىردى, دەپ حابارلايدى Egemen.kz.
«ەڭبەك كودەكسىنە سايكەس, جۇمىس بەرۋشىلەرگە قىزمەتكەردىڭ ەڭبەك وتىلىنە قاراي ەڭبەك شارتىن جالعاستىرۋ نەمەسە جالعاستىرماۋ تۋرالى شەشىم قابىلداۋعا مۇمكىندىك بەرىلدى. كوپتەگەن جۇمىس بەرۋشىلەر مۇنداي جۇمىسشىلاردى بۇرىنعى قىزمەتىندە سول جالاقىمەن قالدىرادى», دەدى تامارا دۇيسەنوۆا سەنات وتىرىسىندا.
ونىڭ ايتۋىنشا, ەڭبەك مينيسترلىگى مۇنداي مۇمكىندىككە كەدەرگى كەلتىرمەيدى.
«سونىمەن قاتار ولار رەسپۋبليكالىق بيۋدجەتتەن قاراستىرىلعان زەينەتاقى تولەمدەرىن الاتىن بولادى. ءيا, كەي جاعدايلاردا بۇل وتباسىلىق بيۋدجەتكە قاجەت بولعاندىقتان جۇمىسىن جالعاستىرعىسى كەلەتىن ادامدار بولۋى مۇمكىن. بۇل ادامنىڭ ءوز تاڭداۋى», دەيدى تامارا دۇيسەنوۆا.
بۇل رەتتە تىلشىلەر مينيسترگە «زەينەت جاسىنا جەتكەندە جۇمىسىڭىزدى جالعاستىراسىز با؟» دەگەن سۇراق قويدى.
«ەگەر مەنىڭ تاجىريبەم قاجەت بولسا, مەن جۇمىستى جالعاستىرار ەدىم. تاجىريبەم قاجەت بولماسا, ارينە, مەن دە زەينەتكەرلىككە شىعامىن. زەينەتاقى تولەمدەرىن الامىن», دەپ جاۋاپ بەردى ت.دۇيسەنوۆا.