شارۋانىڭ قولىن بايلاعان «شيكىلىك»

جاڭا سايتتىڭ جۇمىسىنداعى قاتەلىك سالدارىنان فەرمەرلەر اينالىم قاراجاتىنىڭ تاپشىلىعىنا ۇشىراۋى مۇمكىن. «اتامەكەن» ۇلتتىق كاسىپكەرلەر پالاتاسىنىڭ حابارلاۋىنشا, بىرنەشە باعىت, سونىڭ ىشىندە نەسيە مولشەرلەمەسىن سۋبسيديالاۋ بويىنشا ءوتىنىم بەرۋ مۇمكىن بولماي وتىر.

شارۋالاردىڭ نەسيەسىنە مەملەكەت تاراپىنان بەرىلەتىن 16% سۋبسيدياعا ءوتىنىش جىبەرە الماي وتىرعان كاسىپكەردىڭ ءبىرى – جامبىل وبلىسىنداعى «ديقان نەسيە» سەرىكتەستىگىنىڭ توراعاسى داۋلەت پەرنەبەك ۇلى.

«سايت باعدارلاماسى ءالى «شيكى». ماسەلەن, قاڭتار مەن اقپاندا نەسيە العان ازاماتتاردىڭ وتىنىشتەرىن سۋبسيدياعا جىبەرە الماي وتىرمىز. الداعى ايلاردا سۋبسيديا تۇسپەسە, شارۋالار نەسيەنى تاعى دا وزدەرى تولەۋى كەرەك بولادى. ولار ءۇشىن بۇل ۇلكەن اۋىرتپالىق», دەيدى ول.

قىزىلوردالىق كاسىپكەر المات ابدۋللاەۆ تا قازىرگى ساتتە پلاتفورمانىڭ پايىزدىق مولشەرلەمەنى سۋبسيديالاۋ دەگەن فۋنكتسياسى تولىق جۇمىس ىستەمەگەندىكتەن, ءوتىنىم تاپسىرا الماي وتىرعانىن جەتكىزدى. ونىڭ ايتۋىنشا, كاسىپكەرلەر, شارۋا قوجالىقتارى ەگىنگە, شارۋاشىلىعىن دامىتۋعا جيناپ قويعان قاراجاتتارىن نەسيەسىن جابۋ ءۇشىن تولەۋگە ءماجبۇر بولىپ, شىعىنعا ۇشىراپ جاتىر.

شارۋالار سۋبسيدياعا ءوتىنىش بەرۋ ءۇشىن بىرنەشە پلاتفورما بولسا, بۇل رەتتە gosagro.kz پورتالىمەن قاتار بۇرىنعى qoldau.kz سەكىلدى قوسىمشا جۇيەنى ىسكە قوسىپ, تاڭداۋ مۇمكىندىگى بەرىلسە دەگەن ءوتىنىش-تىلەكتەرىن ايتادى.

بيىل 2 اقپاندا وتكەن «اتامەكەن» ۇكپ تورالقاسى اگروونەركاسىپ كەشەنى كوميتەتىنىڭ وتىرىسىندا دا gosagro.kz پورتالىنا قاتىستى وزەكتى ماسەلەلەر كوتەرىلگەن-ءدى.

«بيزنەس قاۋىمداستىق وكىلدەرى بيىل جاپپاي پايدالانۋعا قوسىلعان gosagro.kz پورتالىنىڭ دايىندىعى تومەن ەكەنىن جانە qoldau.kz پورتالىنىڭ جۇمىسىن توقتاتۋ ۇلكەن اعاتتىق ەكەنىن ايتىپ وتىر. كوكتەمگى ەگىس ناۋقانىنىڭ ۋاقىتىلى وتۋىنە كەدەرگى كەلتىرىپ, تاۋەكەل تۋدىراتىن بۇل پروبلەمانى شەشۋ – كەزەك كۇتتىرمەيتىن ءىس», دەيدى پالاتانىڭ اوك جانە تاماق ونەركاسىبى دەپارتامەنتىنىڭ باسقارۋشى ديرەكتورى ەربول ەسەنەەۆ.

ۇلتتىق كاسىپكەرلەر پالاتاسىنىڭ اوك جانە تاماق ونەركاسىبى دەپارتامەنتىنىڭ ساراپشىسى جۇلدىز اۋباكىروۆانىڭ ايتۋىنشا, فەرمەرلەردەن كۇن سايىن وتىنىشتەر كەلىپ ءتۇسىپ جاتىر.

ء«وتىنىم بەرۋدەگى پروبلەمالار سۋبسي­ديا­­لاۋ­دىڭ بارلىق باعىتتارى بويىنشا انىقتالادى. قازىر تىڭايتقىشتار بويىنشا وتىنىمدەردى قابىلداۋ باستالدى, الايدا ءار كەزەڭدە قاتە پايدا بولادى. الدىمەن قاتە كاداسترلىق نومىرلەر شىعادى, ەلەك­ترون­دىق شوت-فاكتۋرالار, نورماتيۆتەر, جەت­كى­زۋ­شىلەر كورسەتىلمەيدى. ءاربىر كەزەڭ بيزنەس سۋبەكتىلەرى ءۇشىن پروبلەما بولىپ تۇر. مىسالى, تىڭايتقىشتار, پەستيتسيدتەر جانە تۇقىمدار بويىنشا سۋبسيديالاۋعا وتىنىمدەردى رەسىمدەۋ ءۇشىن فەرمەرلەر ەگىستىك كار­تاسىن ۇسىنۋى كەرەك. بىراق AgroOpen قىز­مەتى جەر ۋچاسكەلەرى بويىنشا بۇرىس اق­پارات بەرەدى. ديقاندار ەگىس القابى, ەگۋدى جوسپارلاپ وتىر­عان داقىلدار تۋرالى دەرەكتەردى كورسەتە المايدى. سونىمەن قاتار فەرمەرلەر جۇيەگە كىرگەن كەزدە, ءتىپتى ءوز ۋچاسكەلەرىنىڭ اۋدانى بويىنشا دا ءارتۇرلى دەرەكتەر الاتىنىن ايتادى», دەيدى ول.

ماسەلەنى سەناتور ەۆگەني بولگەرت تە كوتەردى. ول ءوزىنىڭ دەپۋتاتتىق ساۋالىندا اۋىل شارۋاشىلىعى تاۋارىن وندىرۋشىلەردىڭ پروب­لەمالارى تۋرالى ايتقان بولاتىن.

«جاڭا gosagro.kz اقپاراتتىق جۇيەسىنىڭ دۇرىس جۇمىس ىستەمەۋىنە بايلانىستى فەرمەرلەر ءوز ۋاقىتىندا ءوتىنىم بەرە الماي وتىر. وندا بىرقاتار باعىتتار بويىنشا سۋبسيديا الۋعا وتىنىمدەر بەرۋگە مۇمكىندىك جوق. ماسەلەن, جۇيە سۋبسيديا الۋ ءۇشىن قاجەت بارلىق قۇجات­تىڭ جيىنتىعىن قابىلدامايدى. قۇنى 30 ملن تەڭگەدەن ءسال اساتىن جاڭبىرلاتىپ سۋاراتىن ماشينانى ساتىپ الۋ ءۇشىن سۋبسيدياعا ءوتىنىم بەرۋ كەزىندە جاڭا gosagro.kz جۇيەسى 46 ميلليارد تەڭگە سوماسىن ەسەپتەيدى. وسى ورايدا, ونداعى ءتيىستى قىزمەت مۇنداي قاتە وتىنىمدەر قابىلدانبايدى دەپ, بىردەن جاۋاپ بەرەدى. جۇيەنىڭ قاتەلىكتەرىن شارۋالاردىڭ وزدەرى دە, ولاردىڭ ەسەپشىلەرى دە تۇزەتە الماي وتىر», دەدى دەپۋتات.

بۇل جاعداي ەگىستىككە دايىندىق تۇسىندا, ياعني شارۋالارعا جانار-جاعارماي ماتەريال­دا­رىنا, تىڭايتقىشتارعا, قوسالقى بولشەكتەرگە قارا­جات قاجەت بولعان كەزدە كەسە-كولدەنەڭ كە­لىپ وتىر. وسى رەتتە gosagro.kz اقپاراتتىق جۇ­يە­­­سى­نىڭ جۇمىسىنداعى تەحنيكالىق كەم­شىلىكتەرگە ۇكىمەت شۇعىل تۇردە نازار اۋدارۋى كەرەك.