سقو پوليتسەيلەرى 50-گە جۋىق ەلىكتى جويۋعا قاتىستى كۇدىكتىلەردى ۇستادى, دەپ حابارلايدى Egemen.kz.
سقو پد ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى وبلىستىق پوليتسيا ۆەدومستۆوسىنىڭ باسقا بولىمشەلەرىمەن بىرلەسىپ, اسا ءىرى مولشەردە زاڭسىز اڭ اۋلاۋعا كۇدىكتى پەتروپاۆلدىڭ ءۇش تۇرعىنىن ۇستادى.
ۇيىمداسقان قىلمىسقا قارسى كۇرەس باسقارماسىنا پەتروپاۆل تۇرعىندارىنىڭ بىرىندە تىركەلمەگەن قارۋدىڭ بارى تۋرالى اقپارات ءتۇستى. 27 اقپاندا تاڭەرتەڭ چەليابينسك — نوۆوسيبيرسك تاسجولىنىڭ 525 شاقىرىمىن تەكسەرۋ كەزىندە پوليتسيا قىزمەتكەرلەرى 28 جاستاعى ازاماتتىڭ باسقارۋىنداعى ۆاز – 2115 اۆتوكولىگىن توقتاتتى. سالوندا 29 جانە 30 جاستاعى تاعى ەكى پەتروپاۆل قالاسىنىڭ تۇرعىندارى بولعان. اۆتوكولىكتىڭ جۇكسالعىشىن قاراۋ كەزىندە ءسىبىر ەلىگىنىڭ 4 ۇشاسى, سونداي-اق توز ەكى تىركەلمەگەن تەگىس ۇڭعىلى مىلتىق, 2 پاترون, گيلزا جانە باسقا دا اڭشىلىق قۇرال-جابدىقتار تابىلىپ, تاركىلەندى.
– بۇدان ءارى ءىس-شارالاردى وتكىزۋ كەزىندە پەتروپاۆلداعى ساياجاي قوعامدارىنىڭ بىرىندەگى ۇيدەن 2 ۇشاسى مەن 41 ەلىك تەرىسى, 119 تۇياق, 12 باس جانۋار تاركىلەندى. بۇل فاكت قر قك-ءنىڭ 337-بابىنىڭ 3-بولىگى (زاڭسىز اڭشىلىق) بويىنشا سوتقا دەيىنگى تەرگەپ-تەكسەرۋلەردىڭ بىرىڭعاي تىزىلىمىندە تىركەلدى. تاركىلەنگەن قارۋ مەن جانۋارلاردىڭ قالدىقتارى ساراپتاماعا جىبەرىلدى. كۇدىكتىلەر پەتروپاۆل قالاسى پب ۋاقىتشا ۇستاۋ يزولياتورىنا قامالدى, – دەپ حابارلايدى سقو پد ۇققكب باستىعى جاندوس باسىباەۆ.