جامبىل اۋدانىنا قاراستى تاستوبە اۋىلىنداعى «قىزىل ديحان» وندىرىستىك كووپەراتيۆىنىڭ قۇرىلعانىنا شيرەك عاسىردىڭ ءجۇزى بولدى. جەمىستى ەڭبەك ەتىپ كەلە جاتقان كووپەراتيۆتىڭ جۇمىسىن جاقسى باعالايتىندار از ەمەس. نۋريتدين بەگمانوۆ باسقاراتىن ۇجىمدا اۋىل شارۋاشىلىعىنا قاجەتتى تەحنيكالار جەتكىلىكتى. سونداي-اق باسشىلىق قىزمەتكەرلەردىڭ جاعدايىن جاقسارتۋعا دا باسىمدىق بەرىپ وتىر.
كووپەراتيۆتىڭ ەنشىسىندە جالپى كولەمى 2412,18 گەكتار جەر بار. ارينە, از ەمەس. ۇجىم باسشىلارى 2282,18 گەكتار القاپتى اۋىل شارۋاشىلىعى ماقساتىندا پايدالانادى. ناقتىراق ايتار بولساق, ەگىستىك جەر كولەمى 2141,28 گەكتار بولسا, سۋارمالى جەر 1723,61 گەكتاردى قۇرايدى. ال شابىندىق جەردىڭ ۇلەسى 134,9 گەكتار.
كووپەراتيۆتە ەگىس القابىنا قاجەتتى 8 دانا تراكتور, 9 دوڭعالاقتى ك-700, متز, 2 جۇك تاسىمالداۋ كولىگى, 2 جانارماي تاسىمالدايتىن, 1 اۆتوكران, 7 دانسەپكىش جانە 52 اۋىلشارۋاشىلىق تىركەمە تەحنيكالارى بار. سونىمەن قاتار استىق وراتىن كومباين, 2 قىزىلشا كومباينى, 2 جەمشوپ كومباينى, 2 دانا ءشوپ تايلاعىش, 3 بۇرىككىش ناۋقان كەزىندە پايدالانىلادى. ءبىر سوزبەن ايتقاندا, كووپەراتيۆ باسشىسى ناۋقان كەزىندە تەحنيكا ماسەلەسىنە اسا قاتتى باس اۋىرتا بەرمەيدى.
«بۇگىنگى تاڭدا بىزدە اۋىلدىڭ ەلۋ تۇرعىنى ەڭبەك ەتىپ ءجۇر. ولار اتقارعان جۇمىستارىنا سايكەس 130-150 مىڭ تەڭگە كولەمىندە جالاقى الادى. ارينە, ەڭبەككەرلەردىڭ جاقسى ايلىق الىپ, كوتەرىڭكى كوڭىل كۇيمەن جۇمىس ىستەۋىنە قولدان كەلگەنشە تىرىسىپ ءجۇرمىز.
سوڭعى بىرنەشە جىلدىڭ بەدەرىندە قانت قىزىلشاسىن ەگۋدى قولعا العان جايىمىز بار. ناتيجەسى جامان ەمەس. سوڭعى ناۋقان كەزىندە گەكتارىنان 810 تسەنتنەردەن ءونىم الدىق. الداعى ۋاقىتتا دا جاقسى ناتيجە كورسەتۋگە نيەتتەنىپ وتىرمىز. ۇجىمداعى بارلىق ازامات ەڭبەگىنە ادال ەكەنىن ايتا كەتكەن ءلازىم. ولار ماڭداي تەرمەن تاپقان تابىستىڭ ءتاتتى بولاتىنىن جاقسى بىلەدى.
سوڭعى جىلدارى بالتامىر ەگۋگە ەلىمىز بويىنشا ايرىقشا نازار اۋدارىلىپ وتىرعانى بەلگىلى. سوندىقتان بۇل باعىتتاعى جۇمىستاردى جەتىلدىرە تۇسۋگە نيەتتىمىز. ويتكەنى قانت قىزىلشاسىن مولىنان وسىرۋگە وڭىرىمىزدە دە باسىمدىق بەرىلىپ, وعان قىزىعۋشىلىق تانىتقان شارۋالاردىڭ قاراسى ارتىپ كەلەدى. وڭىردەگى باسشىلاردىڭ قولداۋىن سەزىنگەن ءبىز ەگىستىك القابىن جىل وتكەن سايىن ارتتىرۋعا, جاڭا تەحنولوگيانى ەنگىزۋگە كۇش سالۋدامىز», دەيدى كووپەراتيۆ باسشىسى.
كووپەراتيۆ باسشىسىنىڭ سوزىنە سەنسەك, بيىلدىققا 300 گەكتارعا كۇزدىك بيداي ەگىپتى. سونىمەن قاتار 700 گەكتار القاپقا جازدىق ارپا ورنالاستىرسا, 50 گەكتار جەرگە داندىك جۇگەرى وتىرعىزعان. جوعارىدا ايتقانىمىزداي, كووپەراتيۆ باسشىسى قانت قىزىلشاسى القابىن ۇلعايتۋعا ەرەكشە دەن قويعان. بيىل 115 گەكتار جەرگە بالتامىر ەككەن.
«جالپى العاندا كووپەراتيۆ جۇمىسى جىل وتكەن سايىن شيراي تۇسۋدە. تەحنيكامىز جەتكىلىكتى. ناۋقاندى جىلداعى داستۇرگە ساي ۋاقتىلى باستايمىز. بارلىق جۇمىستاردى دەر كەزىندە اتقارامىز. بۇيىرسا, الداعى ناۋقاندا ايتارلىقتاي جاقسى ناتيجە كورسەتەمىز دەگەن ويىمىز بار. ويتكەنى اۋا رايى شارۋالارعا قارايلاسىپ تۇر», دەيدى ن. بەگمانوۆ.
سوڭعى بىرنەشە جىلدىڭ بەدەرىندە وڭىردە قانت قىزىلشاسىن وسىرۋگە ايرىقشا دەن قويىلعان. ءوڭىر باسشىسى نۇرجان نۇرجىگىتوۆ تە شارۋالارعا بالتامىر ءوسىرۋدىڭ ماڭىزدىلىعىن ءجيى ايتىپ ءجۇر. جالپى, مەملەكەت تاراپىنان قولداۋدىڭ مول ەكەنىن سەزىنگەن كووپەراتيۆتەر مەن شارۋا قوجالىق باسشىلارىنىڭ قانت قىزىلشاسىن ەگۋگە دەگەن قىزىعۋشىلىعى ارتا تۇسكەنى قۋانتپاي قويمايدى. «قىزىل ديحان» وندىرىستىك كووپەراتيۆىنىڭ ۇجىمى دا سول قاتارعا قوسىلعانى قۇپتارلىق ءىس.
جامبىل وبلىسى,
جامبىل اۋدانى