اۋا رايىنىڭ قولايسىز بولاتىنى ەسكەرتىلسە دە تايىنشا اۋدانىنىڭ 44 جانە 24 جاستاعى ەكى تۇرعىنى شاعالالى كولىنە بالىققا اتتانعان, دەپ حابارلايدى Egemen.kz.
بالىقتىڭ قىزىعىمەن كولدىڭ جاعاسىنان ۇزاپ كەتكەن ولار بوران باستالعان سوڭ ۇيگە قايتۋدى ويلاپ كەلسە وزدەرىنىڭ «ۆاز-2110» ەسكى ماشينالارىن قار كومىپ تاستاعانىن كورەدى. بۇل جەردەن تەلەفون جەلىسى دە ۇستامايدى ەكەن, ايتەۋىر جولدان اداسپاعان بالىقشىلار ءتۇنى بويى جاياۋ ءجۇرىپ, تاڭ اتا عانا وزدەرىنىڭ قاۋىپتى جاعدايدا ەكەنىن ءبىلدىرىپ, پوليتسياعا حابار بەرەدى.
ولاردى قۇتقارۋعا اۋداندىق پوليتسيا ءبولىمىنىڭ ۋچاسكەلىك ينسپەكتورلارى ەرلان ىبىراەۆ پەن تالعات بەيسەنباەۆ اتتانادى. وزدەرىنىڭ «نيۆا» كولىگىنە ولار بالىقشىلار اداسقان چەرموشنيانكي اۋىلىنىڭ جەردى جاقسى بىلەتىن تۇرعىنى نيكولاي دولينەنكونى وتىرعىزىپ الادى.
پوليتسەيلەر شاماسى ەكى ساعاتتاي ۋاقىتتىڭ ىشىندە سۋىقتان ءتىسى تىسىنە تيمەي دىرىلدەگەن ەكى بالىقشىنى امان تاۋىپ, اجالدان قۇتقاردى. امان قالعان بالىقشىلار ۇيلەرىنە ورالىپ, جىلى جەرگە ەنگەننەن كەيىن ءبىرىنشى كەزەكتە وزدەرىنىڭ ينسپەكتورلارعا دەگەن العىسىن جەتكىزىپ, وبلىستىق پوليتسيا دەپارتامەنتىنىڭ باستىعى ا.قابىلدينوۆكە حات جازادى.