ۇكىمەتتە پرەمەر-مينيستر ءاليحان سمايىلوۆتىڭ توراعالىعىمەن وتكەن كەڭەستە سۋ رەسۋرستارىن باسقارۋ جۇيەسىن دامىتۋدىڭ 2023-2029 جىلدارعا ارنالعان تۇجىرىمداماسىنىڭ جوباسى قارالدى, دەپ حابارلايدى Egemen.kz ۇكىمەتتىڭ ءباسپاسوز قىزمەتىنە سىلتەمە جاساپ.
ەكولوگيا جانە تابيعي رەسۋرستار ءمينيسترى ءزۇلفيا سۇلەيمەنوۆانىڭ ايتۋىنشا, قۇجاتتىڭ ماقساتى − ەلدىڭ سۋ رەسۋرستارىن ساقتاۋ جانە ۇتىمدى پايدالانۋ, ەكونوميكا جانە قورشاعان ورتا سالالارىنىڭ قاجەتتىلىكتەرىن تەڭگەرىمدى قامتاماسىز ەتۋ ماسەلەلەرىن شەشۋ.
ء«بىز سۋ ەكوجۇيەلەرىنىڭ رەتتەۋ جانە قولداۋ فۋنكتسيالارىن ساقتاۋ ءۇشىن ولاردىڭ ۇزاق مەرزىمدى تۇراقتىلىعىن قامتاماسىز ەتپەكپىز. تۇجىرىمداما جوباسى ءتورت نەگىزگى مىندەتتى قامتيدى: ونىمدىلىكتى, سۋ ساپاسىن, قولايسىز اسەرلەرگە توزىمدىلىكتى ارتتىرۋ جانە سۋ رەسۋرستارىن باسقارۋدى جەتىلدىرۋ», دەدى ز. سۇلەيمەنوۆا.
2029 جىلعا قاراي قازاقستاندا ماگيسترالدىق جانە شارۋاشىلىقارالىق ارنالار جەلىسى جاڭعىرتىلىپ, اۆتوماتتاندىرىلادى, بارلىق نەگىزگى گيدروتەحنيكالىق قۇرىلىستارعا كوپفۋنكتسيونالدى تەكسەرۋ جۇرگىزىلەدى دەپ جوسپارلانىپ وتىر.
بۇدان باسقا, قوسىمشا گيدرولوگيالىق بەكەتتەر اشىلادى, سۋمەن جابدىقتاۋعا تاريفتەر قايتا قارالادى جانە سۋدى اعىزۋ مونيتورينگىنىڭ اۆتوماتتاندىرىلعان جۇيەسى ەنگىزىلەدى.
تالقىلاۋ قورىتىندىسى بويىنشا تۇجىرىمداما جوباسى ماقۇلداندى. پرەمەر-مينيستر ءاليحان سمايىلوۆ سالالىق ۆەدومستۆوعا ايتىلعان ۇسىنىستاردى ەسكەرە وتىرىپ, قۇجاتتى پىسىقتاۋدى تاپسىردى.