پرەمەر-مينيستر ءاليحان سمايىلوۆتىڭ قاتىسۋىمەن وتكەن يدم-ءنىڭ كەڭەيتىلگەن القا وتىرىسىندا ۆيتسە-مينيستر يران شارحان ونەركاسىپتىك دامۋ, گەولوگيا جانە جەر قويناۋىن يگەرۋ باعىتىندا بىلتىر اتقارىلعان جۇمىستار مەن وسى جىلعا ارنالعان جوسپارلار تۋرالى ايتىپ بەردى, دەپ حابارلايدى Egemen.kz.
يندۋستريا جانە ينفراقۇرىلىمدىق دامۋ ءمينيسترىنىڭ ورىنباسارى ايتقانداي, 2022 جىلدىڭ قورىتىندىسى بويىنشا وڭدەۋ ونەركاسىبىندەگى ءوندىرىس كولەمى 3,4%-عا ءوستى. وڭدەلگەن ءونىمنىڭ ەكسپورتى بىلتىرعى 10 ايدا 21,7 ملرد تەڭگەگە نەمەسە 34,9%-عا جەتتى.
«2025 جىلعا دەيىن 134 مىڭعا جۋىق تۇراقتى جۇمىس ورنىن اشىپ, ونىڭ ىشىندە مونوقالالاردا – 13 مىڭ, سونداي-اق اۋىلدى جەرلەردە – 61 مىڭ جۇمىس ورنىن اشۋ ارقىلى 734 جوبانى ىسكە قوسۋ جوسپارلانعان. بارلىق جوبا تولىعىمەن قۋاتىنا شىققان كەزدە ءوندىرىس كولەمى شامامەن 10,4 ترلن تەڭگەگە جەتەدى», دەدى ي.شارحان.
وڭدەۋ ونەركاسىبىندەگى جوبالاردى قارجىلاي تۇرعىدا قولداۋ ءۇشىن يندۋستريا جانە ينفراقۇرىلىمدىق دامۋ مينيسترلىگى نەسيەلەۋ, ليزينگتىك قارجىلاندىرۋ, كاپيتالعا ۇلەستىك قاتىسۋ مەن ونەركاسىپتىك گرانتتاردى بەرۋ سىندى تەتىكتەردى پىسىقتادى. ماسەلەن, 2022 جىلى دامۋ ينستيتۋتتارى ارقىلى جالپى سوماسى 425,5 ملرد تەڭگەگە جوعارىدا اتالعان سالاداعى جوبالاردى قارجىلاندىرۋ قاراستىرىلدى. ۆەدومستۆونىڭ اقپاراتى بويىنشا بيىل قاجەتتى جوبالاردى قارجىلاندىرۋ ءۇشىن جالپى سوماسى 399,2 ملرد تەڭگەگە قۇجاتتاما دايىندالعان.
سونداي-اق قازىر وڭدەۋ ونەركاسىبىن دامىتۋ ماقساتىندا قارجىلاندىرۋدىڭ قوسىمشا كوزدەرى مەن تەتىكتەرى جان-جاقتى ويلاستىرىلىپ, پىسىقتالىپ جاتىر.
بۇل رەتتە مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس «ونەركاسىپتىك ساياسات تۋرالى» زاڭ قابىلدانعانىن ايتا كەتكەن ورىندى. ونىڭ نەگىزگى ماقساتى باسەكەگە قابىلەتتى ءارى جوعارى تەحنولوگيالىق, سونداي-اق ەكسپورتقا باعدارلانعان ءونىم ءوندىرىسىن ۇلعايتۋ جانە وڭدەۋ ونەركاسىبىن تۇراقتى جولعا قويۋ ارقىلى دامۋدىڭ شيكىزاتتىق مودەلىنەن ارىلۋ جاتادى. وسىعان بايلانىستى يدم جۇيەلى شارالاردى قابىلداپ جاتقانىن ايتا كەتەيىك. ونىڭ ىشىندە ينۆەستيتسيالىق جوبالاردى ىسكە اسىرۋ, قولجەتىمدى قارجىلاندىرۋدى كوزدەيتىن تەتىكتەردى ازىرلەۋ مەن وڭدەۋشى كاسىپورىنداردى وتاندىق شيكىزاتپەن قامتاماسىز ەتۋدى ايتۋعا بولادى.