رەسپۋبليكالىق ماڭىزى بار اۆتوموبيل جولدارىنىڭ ۇلتتىق وپەراتورى 2023 جىلدىڭ 13 قاڭتارىندا ءتورت وبلىستا كولىك قوزعالىسىنا ۋاقىتشا شەكتەۋ ەنگىزىلگەنى تۋرالى حابارلادى, دەپ جازادى Egemen.kz.
QazAvtoJol حابارلاعانداي, 11:15-تەگى جاعداي بويىنشا ەلىمىزدىڭ ءتورت وبلىسىندا ورىن العان قولايسىز اۋا-رايىنا بايلانىستى رەسپۋبليكالىق ماڭىزى بار اۆتوجولداردىڭ جەتى ۋچاسكەسىندە قوزعالىس ۋاقىتشا شەكتەلدى.
اۆتوجولداردى تازارتۋ ءۇشىن 250 بىرلىك جول-پايدالانۋ تەحنيكاسى مەن 350-دەن استام جۇمىسشى جۇمىلدىرىلدى. تاۋلىگىنە 900 تەكشە مەتر مۇزعا قارسى ماتەريال جۇمسالدى.
سونداي-اق ۇلتتىق وپەراتور 13 قاڭتاردا پاۆلودار وبلىسىنىڭ رەسپۋبليكالىق ماڭىزى بار اۆتوموبيل جولدارىندا كەلەسى باعىتتار بويىنشا قوزعالىس شەكتەلگەنىن اتاپ ءوتتى:
استانا – ەرەيمەنتاۋ – شىدەرتى اۆتوجولىنىڭ 205-259 شاقىرىمى (اقمولا وبلىسىنىڭ شەكاراسىنان شىدەرتى كەنتىنە دەيىن); قالقامان - باياناۋىل - ۇمىتكەر - بوتاقارا اۆتوجولىنىڭ 0-231 شاقىرىمى (قالقامان كەنتىنەن قاراعاندى وبلىسىنىڭ شەكاراسىنا دەيىن).