25 جەلتوقساندا وسكەمەندە 15 جانە 13 جاستاعى ەكى بالا جوعالىپ كەتتى, دەپ حابارلايدى Egemen.kz Polisia.kz سايتىنا سىلتەمە جاساپ.
ەر ادام پوليتسياعا بالالارىنىڭ جوعالىپ كەتكەنى تۋرالى حابارلاعان. ونىڭ ايتۋىنشا, ونىڭ 15 جاستاعى ۇلى مەن 13 جاستاعى قىزى 25 جەلتوقسان كۇنى كەشكە ۇيدەن كەتىپ, ورالماعان. بالالار تەلەفوندارىن ۇيدە قالدىرىپ كەتكەن.
كامەلەتكە تولماعانداردىڭ جۇرگەن جەرىن انىقتاۋ ماقساتىندا دابىل بويىنشا جەدەل-ىزدەستىرۋ توبى دەرەۋ جينالدى. ءتارتىپ ساقشىلارى كەز-كەلگەن اقپاراتقا يە بولا الاتىن تانىستارى مەن كۋاگەرلەردەن سۇحبات الىپ, ىرگەلەس اۋماقتاردى, اۋلالاردى, تۇرعىن ۇيلەردىڭ كىرەبەرىستەرىن, گۇلزارلاردى, ساياباقتاردى, جاستار جينالاتىن ورىنداردى مۇقيات زەرتتەدى. ىزدەۋ جاياۋ جانە قىزمەتتىك اۆتوكولىكتەردى پايدالانۋ ارقىلى جۇزەگە اسىرىلدى.
– قابىلدانعان شارالاردىڭ ناتيجەسىندە 40 مينۋتتان كەيىن كامەلەتكە تولماعانداردى بوران-2 پاترۋلدىك ەكيپاجىنىڭ قىزمەتكەرلەرى سالاۋات شاكىروۆ پەن قۋانىش اكيمەەۆ وستروۆسكي كوشەسىنەن تاپتى. كامەلەتكە تولماعاندار اكەسىمەن رەنجىسكەننەن كەيىن ۇيدەن كەتكەندەرىن ايتتى. قازىرگى ۋاقىتتا ولاردىڭ ءومىرى مەن دەنساۋلىعىنا ەشقانداي قاۋىپ ءتونىپ تۇرعان جوق. ۇيگە امان-ەسەن جەتكىزىلدى, – دەدى وسكەمەن قالاسى پب باستىعى اندرەي مۋلا.
تابىلعان جاسوسپىرىمدەردىڭ اكەسى قۇقىق قورعاۋ ورگاندارىنا جانە ونىڭ كامەلەتكە تولماعان بالالارىن ىزدەۋگە كورسەتكەن كومەگى ءۇشىن بارلىق ازاماتتارعا العىسىن ءبىلدىردى.