سولتۇستىك قازاقستان وبلىسىنىڭ تايىنشا قالاسىندا گاز باللونىنىڭ دۇرىس جۇمىس ىستەمەۋىنەن وقىس وقيعا بولدى, دەپ حابارلايدى Egemen.kz.
وقيعا 6 جەلتوقسان كۇنى بولعان. ءۇي يەسى ءۇيدى جىلىتۋ ءۇشىن گاز باللونىن اكەلگەن.
«جىلى جەردە باللون كەڭەيىپ, گاز-اۋا قوسپاسى جارىلىپ, سودان كەيىن ءورت شىقتى. ءورت سالدارىنان تۇرعىن ۇيگە مەحانيكالىق زاقىم كەلدى. ءۇيدىڭ 36 جاستاعى يەسى اۋرۋحاناعا جاتقىزىلدى. ەر ادامنىڭ دەنەسىن 60 پايىز كۇيىك شالعان. دۇيسەنبى, 12 جەلتوقساندا العان جاراقاتتارىنان زارداپ شەككەن ادام مەديتسينالىق مەكەمەدە قايتىس بولدى», دەدى مەملەكەتتىك ءورت باقىلاۋ باسقارماسى باسشىسىنىڭ مىندەتىن اتقارۋشى ايدار مۇساتاەۆ.
سولتۇستىك قازاقستان وبلىسىندا سوڭعى ءبىر اپتادا 25 ءورت وقيعاسى ورىن العان. ءورت ءۇش ادامنىڭ ءومىرىن قيدى. وبلىستىڭ ءتورت تۇرعىنى ءارتۇرلى اۋىرلىقتاعى دەنە جاراقاتتارىن الدى.