مەملەكەت باسشىسى قاسىم-جومارت توقاەۆ ۇلىقتاۋ راسىمىندە تاجىريبەسى مەن ءبىلىمىن, مۇلكى مەن قاراجاتىن قوعامعا رياسىز ۇسىناتىن بۇگىنگىنىڭ باتىرلارى جايىندا ءسوز ەتتى, دەپ حابارلايدى Egemen.kz.
«ادىلەتتى قازاقستاندا ەڭبەك ادامىنا ەرەكشە قۇرمەت كورسەتىلۋگە ءتيىس. اسىرەسە, ۇستاز, دارىگەر, ءتارتىپ ساقشىسى, قۇتقارۋشى, جۇمىسشى, شارۋا سياقتى مامانداردىڭ مارتەبەسىن ودان ءارى ارتتىرا ءتۇسۋىمىز قاجەت. ولار ەلىمىزدەگى ەڭ سىيلى ازاماتتارعا اينالۋى كەرەك. وسى كاسىپ يەلەرى ءتيىستى قۇرمەت پەن سىيعا يە بولعاندا عانا قوعامىمىز شىنىمەن جاڭاردى دەپ ايتا الامىز», دەدى مەملەكەت باسشىسى.
ونىڭ ايتۋىنشا, ناعىز قاھارماندار جۇرتتىڭ نازارىنان تىس جەردە. ولار ءبىزدىڭ ارامىزدا. باتىرلار كۇن سايىن زاۋىت ستانوگىندا جۇمىس ىستەيدى, قوعامدىق كولىك جۇرگىزەدى, ۇشاق شتۋرۆالىنا وتىرادى, قۇتقارۋشىنىڭ قورعانىس كيىمىن كيەدى, ناۋقاسقا جەدەل جاردەم بەرۋگە اسىعادى, اسكەري تەحنيكانى مەڭگەرەدى.
«ناعىز باتىرلار بالالارىمىز بەن قارت اتا-انالارىمىزدىڭ داستارحانى اس-اۋقات تولى بولۋى ءۇشىن اۋىلدا تاڭمەن تالاسا ويانادى. ءبىزدىڭ باتىرلار – ءوزىنىڭ جەكە كاسىبىن باستايتىن, جۇمىس ورىندارىن اشاتىن, قىزمەتكەرلەرى مەن ولاردىڭ وتباسىلارىنا جاڭا مۇمكىندىكتەر تۋدىراتىن كاسىپكەرلەر. ءبىزدىڭ باتىرلار – ءوزىنىڭ ماحابباتى مەن كۇش-قۋاتىن, تاجىريبەسى مەن ءبىلىمىن, مۇلكى مەن قاراجاتىن قوعامعا رياسىز ۇسىناتىن ەرىكتىلەر مەن يگى ءىس جاسايتىندار. ولاردىڭ بارلىعى – حالىقتىڭ ماقتانىشى ءارى ءۇمىتى. مىنە, وسىنداي ەڭبەك ادامدارى – ەلىمىز بەن مەملەكەتىمىزدىڭ تىرەگى», دەدى ق.توقاەۆ.