اۋليەكول اۋدانىندا ورتتەن زارداپ شەككەن ازاماتتارعا ارنالعان 91 تۇرعىن ءۇي سالىندى. الايدا جاقىندا عانا قونىس تويىن تويلاعان كەيبىر ۇيلەردىڭ تۇرعىندارى كارىزدەردىڭ تولىپ كەتكەنىنە شاعىمدانا باستادى, دەپ حابارلايدى Egemen.kz.
قوستاناي وبلىسى اكىمدىگىنىڭ قۇرىلىس, ساۋلەت جانە قالا قۇرىلىسى باسقارماسىنىڭ باسشىسى بەرىك تاڭجارىقوۆتىڭ ايتۋىنشا, جوبادا سەپتيكتەردى ورناتۋ قاراستىرىلماعان, وسىعان بايلانىستى مەردىگەرلەر ەسەبىنەن ۋاقىتشا سەپتيكتەر ورىندالعان.
«اۋا رايىنىڭ بۇزىلۋى مەن جاۋىن-شاشىننىڭ سالدارىنان تۇرعىن ۇيلەردىڭ اۋماعىندا سۋدىڭ جينالۋى بايقالادى», دەدى ول.
باسقارما باسشىسى اتاپ وتكەندەي, ينجەنەرلىك-گەولوگيالىق زەرتتەۋلەرگە سايكەس ۇيلەردىڭ ىرگەتاسى ىلعالدان قورعالعان, ياعني ۇيلەردى سۋ باسۋ قاۋپى جوق.
بەرىك تاڭجارىقوۆ قازىرگى ۋاقىتتا ءۇي ماڭىنداعى اۋماقتا سۋ ايداۋ جۇمىستارى جۇرگىزىلىپ جاتقانىن اتاپ ءوتتى.
سونداي-اق ول تۇرعىن ۇيلەردىڭ جەكە كارىزىنە جوبالاۋ-سمەتالىق قۇجاتتاما ازىرلەنىپ جاتقانىن حابارلادى.
«جوبالاۋ-سمەتالىق قۇجاتتامانى ازىرلەۋ اياقتالعاننان كەيىن قۇرىلىس-مونتاج جۇمىستارى ورىندالادى», دەپ قوستى ب.تاڭجارىقوۆ.
اۋليەكولدەگى جاڭا ۇيلەردىڭ تۇرعىندارى تولىپ كەتكەن سەپتيكتەردىڭ سۋرەتتەرىن جەرگىلىكتى بۇقارالىق اقپارات قۇرالىنا جىبەرگەن. ولاردىڭ ايتۋىنشا, جاڭا ۇيلەردىڭ كىلتتەرى تاپسىرىلعان كۇننەن باستاپ نەبارى 10 كۇن وتكەن.
بۇعان دەيىن قوستاناي وبلىسىنىڭ اكىمى ارحيمەد مۇحامبەتوۆ مەملەكەت باسشىسىنىڭ شەشىمى بويىنشا تۇرعىن ءۇي قۇرىلىسىنا 2,3 ملرد تەڭگە, ونىڭ 600 ملن تەڭگەسى ينجەنەرلىك كوممۋنيكاتسيالاردى سالۋعا باعىتتالعانىن ايتقان ەدى. جاڭا ۇيلەر 12 قۇرىلىس ۇيىمىنىڭ كۇشىمەن تۇرعىزىلعان. وسىلايشا, قىسقا مەرزىمدە بىرىڭعاي ارحيتەكتۋرالىق ستيلدە 91 ءۇي سالىندى.