كوكشەتاۋ قالاسىنىڭ تۇرعىنىنان سالماعى 2,7 كەلى بولاتىن ەسىرتكىنىڭ ءىرى كولەمى تاركىلەندى, دەپ حابارلايدى Egemen.kz.
اقمولا وبلىسى پد ەسىرتكى قىلمىسىنا قارسى كۇرەس باسقارماسىنىڭ قىزمەتكەرلەرىنە كوكشەتاۋ تۇرعىنىنىڭ ءبىرى ەسىرتكى ساتۋمەن اينالىساتىنى تۋرالى اقپارات ءتۇستى.
ەسىرتكى قىلمىسىنا قارسى كۇرەس باسقارماسىنىڭ قىزمەتكەرلەرى كۇدىكتىنى ۇستاۋ بارىسىندا قالاعا كىرە بەرىستە 44 جاستاعى جەرگىلىكتى تۇرعىن تىزگىندەگەن كولىكتى توقتاتتى. ارتقى جولاۋشى ورنىن ءتىنتۋ كەزىندە جالپى سالماعى 2,7 كەلى بولاتىن گاشيش تولتىرىلعان ءۇش پوليەتيلەن پاكەتى بار سپورتتىق سومكە تابىلدى. ەلەكتروندى تارازىلار دا تاركىلەندى.
قر قىلمىستىق كودەكسىنىڭ 296-بابىنىڭ 4-بولىگى «ەسىرتكىنىڭ, پسيحوتروپتىق زاتتاردىڭ, سول تەكتەستەر مەن پرەكۋرسورلاردىڭ زاڭسىز اينالىمىنا قاتىستى ىستەر» بويىنشا سوتقا دەيىنگى تەرگەۋ باستالدى. قازىرگى تاڭدا پوليتسەيلەر ەسىرتكى ساتىپ الىنعان ورىندى انىقتاۋ بويىنشا جۇمىس جۇرگىزۋدە.